2020
Papah ki Doadoahk en nan Tehnpas Sarawi
Mahs 2020

Koasondih kan en Pwukoahn Papah, Mahs 2020

Papah ki Doadoahk en nan Tehnpas Sarawi

Ni ansou me kitahil kin sewese mehtei kan perenkihda kapai kan en Tehnpas Sarawi, kitail wie doadoahk en papah.

ministering

Mehn kasanal sang Getty Images; photograph of Tegucigalpa Honduras Temple

Kalapw towehda Tehnpas sarawi udahn mie katepe. Preseden Russell M. Nelson padahngki me “Tehnpas sarawi pahn kihong kitail mour soutuk oh lapalapala oh mwahuong atail peneinei kan. …

“… Emen emen kitail anahne kakehlepen ngehno oh kaskuhl kan me mie ohngete nan tehnpas en Kauno.”1

Pwehn iang towehda tehnpas sarawi kitail anahne doadoahngki mwahu atail ansou, atail pwukoah kan, oh mehn kaweid kan koaros, pil iangahki kaunopada pali ngehn. Kitail kin wia doadoahk en papah ansou me kitail kin diarada en riatail kan kahpwal kan oh seweseirail kamwahuiala.

Tehnpas Sarawi wia Kapai ehu me koaros kak alehdi

Emen misineri me ahpwtehn pwursang misin, Meg, kilangada kisin serepein men me mwomwohd pohn sehr en komoal likin tehnpas sarawi en Kona Hawaii mwohn ah pahn lel ni wenihmw en doulongalahu. Meg ahnekihda pepehm ehu me e anahne lokaiahng kisin serepeino, ahpw e sehse dahme e pahn inda. Eri ih idek rehn serepeino ia wehwehn pelpel me mih pohn keimwin patehn nehu. Peideko kahrehiong kisin serepein pwulopwulo, Lani, ah kak ehukihong Meg duwen ih.

Lani kosoiahiong Meg duwen ah kahpwal en kak pwurodo oh kehlailda ni unsek nan mwomwohdisoht, pil duwen towe kan me mwahu me kin sewese, oh ah kin kasik me ehu rahn e pahn kak katengtengehng nah kisin serepeino.

Meg lukehiong Lani en iangihda ira kohla mwohndi nan wasahn ouiouo nan tehnpas sarawio. Ira pahn saik kak sipelehla wasahu nan tehnpas sarawio ahpw ira kak dauliala wenihmw en doulongalahu. Lani pwungkihda, ira eri doulongala. Tohn doadoahk en tehnpas sarawio ko kaweidkin ira en mwohni pohn sehr ieu me mih pahn kilel en Sounkomouro.

Ni ara mwomwohd, Lani mwengininginki, “Udahn i men doulongodo nan Tehnpas sarawie rahnet ahpw i saloh.” Pwehki Meg ah idawehn kaweid en Ngehno, e sewesehda sapengala en Lani ah kapakapo.

Iren kaweid kan en sewese irail akan me sohte naineki kisin likoun mweimwei en nan tehnpas sarawi`

Irail akan me sohte naineki kisin likoun mweimwei en tehnpas sarawi pil kak alehdi kapai en tehnpas sarawi.

  • Ehukihda ahmw pepehm duwen Kauno ah kapaiukada sang ni doadoahk en tehnpas sarawi.

  • Lukehiong emen en iang towehda kalangadahn tehnpas sarawi de wasahn irail me kin pwarek’ kan. Komw kak diar ansou en kalangadahn tehnpas sarawi kan me kohkohdo nan temples.ChurchofJesusChrist.org.

  • Kilang kilel oh esehla laud duwen tehnpas sarawi nan temples.ChurchofJesusChrist.org.

Sewese kamangaieng mehteikan en towehda tehnpas sarawi

Mendahte toweh kan ah mie neirahil kisin likoun mweimwei en tehnpas sarawi, iang kokohla nan tehnpas sarawi kak pil doadoahk laud. Ekei kin anahne en seiloak doh. Ekei mwein mie neirail kisin seri pwelel de aramas mah me anahne epwelpe. Kitail kak sawaspene pwehn kamangaila doadoahk en tehnpas sarawi ong koaros.

Leola Chandler udahn ahneki ansou apwal en apwalih ah pwoud me soumwahu oh neira seri pahmen. Ih eri medewehda en katohrehla niare koaros en kin iang towehda tehnpas sarawi. E wiahla mehn kameleilei oh kakehlail ong ih nan eh mour.

Ehu rahno e rongada me mie lih mah kei me udahn men kohla nan tehnpas sarawi ahpw sohte wararail mehn peidaid. Leola pekihda me e pahn wairail. Mwurin sounparehr 40, e sohte kin kelehpw kohla ni tehnpas sarawio.2

Leola alehdi kapai, oh e pil kaipaida mehteikan ansou me e pekihda en wahla lih oko ni tehnpas sarawio.

Iren kaweid kan en sewese mehteikan en towehda Tehnpas Sarawi

Ia mwomwen ahmw pahn sewese mehteikan en kak kalapw towehda tehnpas sarawi? Ke pil kak diar me iren kaweid pwukat pil kak seweseiuk.

  • Wiahki ehu kohla. Pekihda de koasoanehdi en kihda mehn peidaid ong emen. E pil kakete kakehlailihki pil emen en iang tewohda tehnpas sarawi.

  • Pekihda tohn ahmw peneinei de ward en iang seweseiuk wiahda tiahk sarawi kan en kadoudokomw kan, mehlel ansou me mie dir en eden peneinei kan me onopadahr en wia tiahk sarawi kan.

  • Pekihda ken kilang nein ehu pwopwoud seri pwe irahn kak iang towehda tehnpas sarawi. De pil koasoanehdi ahn emen emen ansoun kilang seri.

Ansou me Tehnpas Sarawio Doh

Cgandradas “Roshan” oh Sheron Anthony mehn Colombo, Sri Lanka, pilada irail en katengtengpene nan Tehnpas sarawi. Kempoakepahrail Ann oh Anton udahn pereniki arail koasoandio. Ahpw irail ese me seiloak ong tehnpas sarawi en Manila Philippine sohte pweitikitik.

Roshan ih Sheron nekidalahr uwen sent ieu oh pwaindi neirail tikit en sounpihr sounpwong kei mwowe pwe irail en kak pwain. Eri, rahno ahpw lelehr. Ahpw ansou me re lel Malaysia, irail diarada me ma re pahn douluhl la Philippine, irail pahn anahne Visa de iangih ehu sounpihr tohrohr. E sohte mengei en alehdi visa, oh irail pil sohte kak pwain tikit en ehu sounpihr tohrohr. Irail udahn sohte kakehng medewe me irail pahn pwurala nimwarailo ahpw sohte katengtengpene.

Ni arail sehselahr dahme irail pahn wia, Roshan ahpw eker Anton. Anton ih Ann udahn men sawas. Ira iangehr katengtengpene nan tehnpas sarawi iangahki me malaulau kei nan Sri Lanka, oh ira ese ia uwen kapai laud me e kihong ira. Ira ahpwtehn doadoahngki neira nekineko oh sewesehki emen kisehra me anahne sawas, oh sohte neira sent itarehng pwainda pilehu tikit ong Roshan ih Sheron.

Nan Sri Lanka, e wia kisehn arail tiahk me ohl emen pahn anahne pwainda mwaramwar kohl ong ah pwoud pwehn mie nein liho sent ansou me ohlo pahn mehla. Ann medewehda en netikihla ah mwaramwaro pwehn kak sawas pwainda tikit. Ah kadek lamalamo kahrehiong Roshan ih Sheron ara kak lella ni tehnpas sarawi en Manila.

Ann kosoaia, “I ese kesempwalpen katengtengpene nan tehnpas sarawi.” “I ese me Sheron ih Roshan pahn wia kakehlepen pranto. I sohte men irahil en katiasang ara ansou kesempwalo.”3

Iren madamadau kan me kak sewese Irail Akan me Sohte Kakala ni Tehnpas Sarawi

Ke kakete pehkeriong en papah irail akan me sohte kakala ni tehnpas sarawi ekei ansou de ansou koaros de pwehki uwen pweilaud. Ahpw kumwail kakete diar ahl akan me pahn seweseirail en paieki kapai kan en tehnpas sarawi.

  • Padahk, de patpene nan kaunop en kohla tehnpas sarawi de nan kasukuhl en poadepen peneinei.

  • Kihong irail kilel in tehnpas sarawi pwe ren langahda nan imwarail kan.

  • Ma ke kolahr ni tehnpas sarawi, ehukihda ahmw pepehm kan oh irail kan me ke lelohng oh ahmw kadehdehpen tiahk sarawi kan.

  • Seweseirail ese kalaudehla arail wehwehki inou kan me re wiadahr oh mwomwen arail pahn kolokol. Song doadoahngki “Understanding Our Covenants with God: An Overview of Our Most Important Promises,” sang nan Sulai 2012 Liahona.

© 2020 sang Intellectual Reserve, Inc. All rights reserved. Ntingda nan USA. Kamanaman ong ni lokaiahn wai: 6/19. Kamanaman ong kawehwe: 6/19. Kawehwehpen Ministering Principles, March 2020. Pohnpeian. 16985 885

Ireh kan

  1. Russell M. Nelson, “Becoming Exemplary Latter-day Saints Liahona,Nop. 2018, 114.

  2. Tehk LaRene Gaunt, “Finding Joy in Temple Service,” Ensign, Oak. 1994, 8.

  3. Ann Ih Anton pwurehng alehdi mwararahu sang ni koasoandi en pali en sawas en tehnpas sarawi en mwomwohdisoht, me kin kohda pak ehu ong towe kan en mwomwohdisoht me sohte kak pwain pwe irail en iang kohla ni tehnpas sarawi.