Ɔsom Akwankyerɛ, Ɔpɛnimma 2019

Deɛ Buronya Abasɛm no kyerɛ yɛn fa Ɔsom ho

“Wei yɛ ɔdɔ berɛ wɔ afe no mu. To dwom; Buronya bɛba seesei ara. Ka Yesu awoɔ ho abasɛm, berɛ a na ɔyɛ abɔfra, a ɔbaa asaase soɔ” (“The Nativity Song,” Children’s Songbook, 52).

Buronya berɛ yɛ berɛ a ɛyɛ nnwanwa, nnwanhwɛfoɔ, nwan adididaka, ne nsoromma nya nkyerɛaseɛ sononko prɛkopɛ. Ɛho bɛhia wɔ adeɛ titiri kɛseɛ baako a ɛsii wɔ nnipa abakɔsɛm mu: Yesu Kristo awoɔ. Mmusua pii na wɔda Kristo abasɛm ho foni adi wɔ wɔn afie mu. Afoforɔ nso bɔmɔden sɛ wɔbɛkenkan N’awoɔ ho nsɛm anaa wɔbɛka ɔyɛkyerɛ bi ho. Te sɛdeɛ Kristo ho nsɛm a aka teɛ no, ɔsom adesua pii wɔ N’awoɔ abasɛm no mu fa sɛdeɛ yɛne wiase bɛkyɛ ne hann no. “Buronya abasɛm no yɛ ɔdɔ abasɛm,” Titenani Henry B. Eyring, Fotufoɔ a ɔtɔ so Mmienu wɔ Atitenafoɔ a wɔdi kan no na ɔseɛ.

“Wɔ Kristo awoɔ abasɛm mu no, yɛtumi hunu, te nka nipa su a na Ɔyɛ ne sɛdeɛ Ɔteɛ. Ɛno ma yɛn nnesua mu yɛ ha wɔ kwan no so. Na ɛbɛboa yɛn ma yɛn werɛ afi yɛn ho na yɛama afoforɔ nnesoa ayɛ ha.”¹

“Na ɛkwan nni hɔ ma wɔn wɔ ahɔhogyebea hɔ” (Luke 2:7)

Ahɔhogyeɛ wura no amma Agyenkwa no dan, nanso, ɛnni sɛ yɛyɛ saa mfomsoɔ no! Yɛbɛtumi ama Agyenkwa no kwan wɔ yɛn akoma mu berɛ a yɛrema yɛnuanom mmaa ne mmarima kwan wɔ yɛn pono ho, yɛn fie mu ne yɛn amammerɛ mu. Abusua amammerɛ pii bɛtumi ayɛ dɛ paa sɛ yɛde afoforɔ ka ho a. Daiana ne n’abusua wɔ amammerɛ bi sɛ wɔbɛto nsa afrɛ obi na wɔne no adi Buronya. Ɔpɛnimaa biara, wɔsusu ho yi deɛ wɔbɛto nsa afrɛ no.² Ɛbia w’abusua nso bɛtumi ahyɛ biribi saa ase. Ɛbia obi a wosom no bɛpɛ sɛ ɔbɛka wabusua ho ama mo ato buronya nnwom abom. Wobɛtumi nso agya kwan wɔ w’abusua didipon ho ama obi a ɔnni abusua wɔ baabi a woteɛ no.

Kwan pa bɛn na yɛbɛfa so akae Agyenkwa no a ɛkyɛn sɛ yɛbɛdi Ne nhwɛsoɔ so? Kae sɛ Ɔto nsa frɛ “nnipa nyinaa sɛ wɔn mmra ne nkyɛn na wɔmmɛsɔ ne papayɔ nhwɛ; na ɔmpo obiara, fitaa ne tuntum, akoa ne owura, ɔbaa ne barima; na ɔkae ananafoɔ; na obiara te sɛ Nyankopɔn, Jewfoɔ ne Ananafoɔ” (2 Nephi 26:33). Gya kwan ma afoforɔ mmɛka ho.

“ Wɔ saa kuro no mu na nnwanhwɛfoɔ binom wɔ ɛsrɛ so rehwɛ wɔn mmoa anadwo no” (Luke 2:8)

Ɛfata sɛ saa nnwanhwɛfoɔ yi bɛka wɔn a wɔdii kan maa abofra Agyenkwa no akwaaba ho. Tete nkɔmhyɛfoɔ no frɛ Yesu Kristo sɛ “Isreal Dwanwɛfoɔ” (Nnwom 80:1) ne Ɛwiase nyinaa so Ɔhwɛfoɔ” (1 Nephi 13:41). Na Kristo ankasa aka sɛ, “Me ne odwanhwɛfoɔ papa no, na menim me nnwan” (Yohane 10:14). Sɛ yɛbɛhu yɛn nnwan na yɛahwɛ wɔn so hia paa wɔ ɔsom mu sɛdeɛ Agyenkwa no yɛ no.

Wɔ nkania no ne afɛfɛdeɛ no nyinaa mu no, nneɛma pii wɔ Buronya mu a yɛbɛtumi ahwɛ. Nanso adeɛ a ɛyɛ fɛ paa wɔ buronya mu ne sɛ yɛbɛkae na yɛama yɛn ani akɔ wɔn a yɛsom wɔn no ho na yɛahwɛ yɛn nnwan so. Sɛ wobɛhu obi adeɛ a ɔpɛ paa anaa ne nhyehyɛeɛ a ɔwɔ ma afofida bi tumi kyerɛ sɛ worehwɛ obi so. Yɛhwɛ afoforɔ so berɛ a yɛhu na yɛboa yɛ wɔn ahiadeɛ—nea ɛda adi ne deɛ asie.

Berɛ a Cheryl kunnu, Mick firii mu mpofirim no, ɔyɛɛ basaa. Wɔ Buronya a ɛdikan no rebɛn no, na wayɛ ankonam. Nyame nkyɛ adeɛ sɛ, na onuabaa Shauna a ɔsom no wɔ hɔ. Shauna ne ne kunu, Jim, too nsa frɛɛ no wɔ afofie nna pii mu. Wɔn hunuu Cheryl nkatasoɔ sɛ atete na wɔfaa adwene sɛ wɔbɛyɛ ho biribi. Aka nna kakra ama Buronya aduru no, Shauna ne Jim de Buronya akyɛdeɛ: ataadeɛ fɛɛfɛ bi maa Cheryl. Na wɔnim Cheryl ahiadeɛ honam mu ne atenka mu sɛ ɔhia awerɛkyekyerɛ. Wɔbɔɔ mmɔden sɛ wɔbɛboa na wayɛ nhwɛsoɔ papa ama yɛn sɛdeɛ yɛn nso yɛbɛtumi ahwɛ yɛn nnwan so.³

“Na nnwanhwɛfoɔ no ka kyerɛɛ wɔn ho sɛ, Moma yɛnkɔ Bethlehem” (Luke 2:15)

“Moma yɛn kɔ” yɛ nkanyan frɛ! Nnwanhwɛfoɔ no ansusu sɛ wɔn ayɔnkofoɔ no abrɛ dodo sɛ wɔbɛtwa saa kwan no. Wɔn anyɛ koom ankɔ Bethlehem wɔ wɔn pɛ mu. Wɔde anigyeɛ kakyerɛɛ wɔn ho sɛ, “Moma yɛnkɔ no ntɛm so!”

Ɛwɔm sɛ yɛntumi mfrɛ yɛn ayɔnkofoɔ sɛ wɔmmɛhwɛ abofra Agyenkwa no, nanso yɛbɛtumi ato nsa afrɛ wɔn sɛ wɔne yɛn nsom ma wɔnte Buronya honhom nka (anaa Kristo Honhom no). “Kwan a ɛma Buronya honhom kɔ soro ne sɛ yɛbɛma yɛn werɛ afi yɛn ho na yɛasom afoforɔ,” Bonnie L. Oscarson, Mmaayewa Titenani a watwam na ɔseɛ.⁴ Susu sɛ wokuta kanea. Ɛbɛboa afoforɔ ma wɔn ahunu adeɛ, nanso susu ho ɔhyew a wɔbɛnya sɛ wode wo kanea no sɔ wɔn deɛ ma wɔn na wo ma wɔn kwan sɛ wɔn nso nkuta wɔn ankasa kanea.

Kristo ankasa kyerɛɛ sɛ wɔn a wɔdi N’akyi no bɛnya abrabɔ mu han (hwɛ Yohane 8:12). Kwan baako a yɛbɛfa so anya saa bɔhyɛ hann no ne sɛ yɛbɛsom sɛdeɛ Ɔyɔɔɛ no. Ɛno nti ɛne afoforɔ nkyɛ han no berɛ a wofrɛ wɔn sɛ wɔne wo nsom. Kwan bɛn so na wo ne wɔn a wohwɛ wɔn no bɛsom abom? Mobɛtumi abom anoa aduane anaa akɔkyɛ obi adeɛ mpofirim. Mobɛtumi ate ɛhan a ɛfiri Kristo mu ba no nka berɛ a yɛredi ne nhwɛsoɔ so wɔ ɔsom mu.

“Wɔn ka kyerɛɛ afoforɔ deɛ wɔn ate fa saa abofra no ho” (Luka 2:17)

Ɛnyɛ den sɛ yɛbɛhu anigyeɛ a nnwanhwɛfoɔ no nyaaɛ berɛ a wɔrebɔ Kristo awoɔ ho dawuro. Asoro Abɔfoɔ dii ho adanseɛ, nkɔmhyɛ Agyenkwa no aba! Na ɔwɔ ha! Nokorɛ, sɛ yɛbɛka Agyenkwa no asɛmpa no yɛ ade titire wɔ Buronya berɛ. Soro Abɔfoɔ no too dwom. Nsoromma no kyerɛɛ kwan. Na nnwanhwɛfoɔ no bɔɔ ho dawuro.

Yɛbɛtumi de yɛn nne aka Buronya abasɛm ho berɛ a yɛreka asɛmpa no na yɛredi Agyenkwa no ho adanseɛ. “Berɛ a wo wɔ akwanya sɛ wobɛgyina Agyenkwa no anan mu wɔ ɔsom mu no, bisa woho sɛ,’kwan bɛn so na mɛtumi ne obi anaa abusua bi akyɛ asɛmpa kanea no?’” Onuabaa Jean B. Bingham, Mmaakuo Titenani. “Ɛdeɛn na Honhom no hyɛ me sɛ menyɛ?”⁵

Wei yɛ adwenkyerɛ binom a wobɛtumi asusu ho berɛ a worehwehwɛ kwan a wobɛfa so akyɛ wadanseɛ fa Agyenkwa no ne N’asɛmpa ho:

Hwehwɛ twerɛsɛm a ɛka w’atenka fa Agyenkwa no ho anaa sɛnti a w’ani sɔ No. Ɛno wɔn a wosom no nkyɛ.
Mane no atwerɛ bi wɔ intanɛt so na fa Buronya sini bi ka ho. Ebinom a ɛyɛ kama wɔ ChurchofJesusChrist.org!
Ka adeɛ sononko bi anaa amammerɛ bi a ɛma wo kae Kristo.

Nya gyidie sɛ Honhom Kronkron no bɛdi w’adanseɛ no ho adanseɛ sɛdeɛ Ɔdii adanseɛ kyerɛɛ Simeon ne Anna sɛ abofra Yesu ne Agyenkwa no (Hwɛ Luka 2:26, 38).

“Sɛ yɛbɛhyɛ [Yesu Kristo] aninonyam wɔ asaase so a, ɛwɔ sɛ yɛyɛ deɛ Ɔyɔɔɛ na yɛkyerɛ ɔdɔ ne ahummɔbrɔ ma afoforɔ,” Ɛlda Dieter F. Uchdorf a ɔka Asomafoɔ Dumienu Kuo ho no na ɔseɛ. “Wei yɛbɛtumi ayɛ no da biara, wɔ kasa ne suban mu. Yɛmma wei nyɛ yɛn Buronya amammerɛ, ɛmfa ho ne baabi a yɛ wɔ—sɛ yɛbɛyɛ bɔnefakyɛfoɔ, ayemyɛfoɔ, mmɔbrɔhunufoɔ, anisɔfoɔ, na yɛne onibiefoɔ bɛkyɛ deɛ yɛwɔ.”⁶

© 2019 by Intellectual Reserve, Inc. All rights reserved. Wɔtintim no wɔ USA Borɔfo Kasa ho Kwan-ma: 6/18. Nkyerɛaseɛ ho kwan-ma: 6/18. Nkyeraseɛ a ɛfa Ministering Principles, December 2019. Twi. 15773 503