Hau Bai Yumi I Ken Kamapim wanpela Kalsa bilong Bungim Wantaim long Sios?

Sevia i bin dispela stretpela eksampol bilong valuim na bungim wantaim ol narapela lain. Taim Em i bin kisim ol Aposol bilong Em, Em i no bin lukluk tumas long posisen, mani, o bikpela wok. Em i valuim wanpela Samaritan meri long wel bilong kisim wara, na testifai long em long diviniti bilong Em maski long hau ol Ju i bin lukluk daun long ol Samaritan (lukim Jon 4). Em i save lukluk long lewa na i no save rispektim ol manmeri (lukim 1 Samuel 16:7; Doktrin na ol Kavanen 38:16, 26).

Sevia i bin tok:

“Wanpela nupela komanmen mi givim long yupela, Olsem yupela lavim wanpela narapela, olsem mi bin lavim yupela, olsem yupela lavim tu wanpela narapela.

Long dispela bai olgeta manmeri i save olsem yupela ol disaipol bilong mi, sapos yupela bin lavim wanpela go long narapela” (Jon 13:34-35).

Sampela taim em i hat long luksave sapos wanpela i pilim olsem ol i stap long ausait. Planti lain no inap long tokaut—olsem i no klia tumas. Tasol wantaim lav long lewa bilong yumi, soim rot bilong Holi Gos, na yumi trai long lukim, yumi i ken luk save taim wanpela man o meri i no inap long pilim ol i stap insait long ol Sios miting na ol ektiviti.

Ol Sampela Sain We Yumi Inap Long Luk Save Sapos Wanpela I Pilim Olsem Ol I Stap Ausait:

• Ol bodi toktok we i no op, olsem taim wanpela is foldim han o ai i lukluk i go daun.

• Sindaun long baksait bilong rum o sindaun yu yet.

• Long i no go long sios o long go wanwan taim tasol.

• Long lusim ol miting o lusim ektiviti kwiktaim tumas.

• Long i no go insait long ol toktok wantaim ol narapela o long ol lesen.

Ol dispela i ken sain bilong ol narapela filing tu, olsem pasin bilong sem, wari, o long i no pilim stret. Ol memba i ken pilim “narakain” taim ol i nupela memba bilong Sios, ol i bilong narapela kantri o kalsa, o ol i bin gat wanpela taim nogut long laip bilong ol i no long taim go pinis we i senisim laip bilong ol, olsem marit i bruk, dai bilong wanpela famili memba, o kam bek long misin bipo long taim bilong ol long kam bek.

Maski long wanem as bilong dispela i kamap, yumi mas noken holim bek long putim han go aut long lavim ol. Wanem tok yumi mekim na wanem samting yumi wokim i ken kamapim wanpela filing olsem olgeta lain i welkam na olgeta lain yumi nidim ol.

Sampela Wei long Kamap Bungim Wantaim na long Welkamim:

• Noken olgeta taim sindaun wantaim ol wankain lain tasol long sios.

• Aburusim pasin bilong lukluk ausait long ol manmeri na lukim dispela trupela man o meri. (Long moa long dispela topik, lukim “Ministering Is Seeing Others as the Saviour Does,” Liahona, June 2019, 8–11.)

• Bungim ol narapela kam insait long ol toktok.

• Invaitim ol narapela long kam insait long laip bilong yu. Yu i ken bungim ol kam insait long ol ektiviti yu wok long plenim.

• Painim na bildim antap long ol wankain interes.

• Noken holim bek pasin bilong poroman wantaim wanpela long wanem ol i no mitim wankain pasin na tingting olsem yu.

• Taim yu lukim wanpela samting i narakain long wanpela man or meri, yu mas gat interes long dispela na noken mekim olsem em i no impoten o Aburusim dispela samting.

• Soim lav na givim i go sampela gutpela toktok.

• Kisim taim long tingting wanem em i min tru taim yumi tok dispela Sios em i bilong olgeta manmeri, i no meta long ol narakain samting bilong ol. Hau bai yumi i ken mekim dispela kamap tru?

Planti taim em i no isi long pilim gutpela raun long ol lain husat i narakain long yumi. Tasol wantaim taim yumi traim traim, yumi ken kamap moa beta long painim valu long ol narakain samting na hamamas long dispela narakain samting yumi ken putim go insait olsem wanwan man o meri i ken bringim i kam. Olsem Elda Dieter F. Uchtdorf bilong Kwarom bilong ol Twelpela Aposol i bin tis, ol narakain samting bilong yumi, i ken halivim long mekim yumi gutpela moa, na lain bilong hamamas moa: “Kam, halivim yumi long bildim na strongim wanpela kalsa bilong hilim, gutpela pasin, na marimari i go long olgeta pikinini bilong God.”³

Christl Fechter i bin muv i go long narapela kantri bihain long pait i bin brukim ples bilong em. Em no bin save long dispela tokples gut na no bin save long wanpela man o meri long nupela ples bilong em, olsem na long pastaim stret em i bin pilim longwe long olgeta lain na i bin pilim olsem em wanpela tasol i stap.

Olsem wanpela memba bilong Sios, em i bin kisim strong na stat long go long nupela wod bilong em. Em i bin wari olsem wei bilong toktok bilong em bai stopim ol lain long toktok long em o olsem ol bai jasim em olsem em i singol meri.

Tasol em i bin bungim ol narapela lain husat i no bin lukluk long ol narakain samting long laip bilong em na welkamim em i go insait long ol poroman grup bilong ol. Ol i putim han kamaut wantaim lav, na i no long taim em i painim em yet bisi long halivim long tisim wanpela Praimeri klas. Ol pikinini bin kamap olsem bikpela eksampol long wanbel, na filing bilong ol i lavim em na nidim em i strongim feit bilong em na halivim em long wokim nupela gen divosen bilong em bilong bipo yet long Bikpela.