Muaj Kev Xyiv Fab Thaum Mus Txhawb Pab Lwm Tus

Kev xyiv fab txhais tias “kev zoo siab kawg nkaus.”¹ Cov yaj saub hauv hnub nyoog kawg no tau piav meej tias kev xyiv fab los qhov twg los thiab yus nrhiav tau li cas. Thawj Tswj Hwm Russell M. Nelson hais tias, “Peb txoj kev xyiv fab yeej tsis nyob ntawm seb peb raug dab tsi hauv peb lub neej tiam sis kev xyiv fab nyob ntawm seb peb tsom ntsoov rau dab tsi hauv peb lub neej. … Kev xyiv fab yeej los ntawm [Yexus Khetos] thiab muaj kev xyiv fab vim muaj Nws. Nws yog lub hauv paus ntawm tag nrho kev xyiv fab.”²

Thaum Lihais noj cov txiv ntawm tus ntoo uas cawm txoj sia, ua rau nws “muaj kev xyiv fab loj heev” (1 Nifais 8:12). Ua rau nws xav muab cov txiv no rau cov uas nws hlub.

Qhov uas peb txaus siab txhawb pab lwm tus yuav ua rau peb thiab lawv muaj kev xyiv fab li no. Tus Cawm Seej qhia Nws cov thwj tim tias cov txiv uas peb txi thaum Nws yog peb lub hauv paus ua rau peb muaj kev xyiv fab loj kawg nkaus (saib Yauhas 15:1–11). Qhov uas peb ua Nws tej hauj lwm thaum peb ua hauj lwm thiab nrhiav kev kom coj lwm tus los cuag Nws yuav ua rau peb muaj kev xyiv fab (saib Lukas 15:7; Amas 29:9; Lus Qhuab Qhia thiab Kev Khi Lus 18:16; 50:22). Peb yuav muaj kev xyiv fab no txawm peb raug kev tawm tsam thiab kev txom nyem (saib 2 Kauleethaus 7:4; Kaulauxais 1:11).

Tus Cawm Seej tau coj yam ntxwv zoo tag nrho qhia peb tias lub hauv paus ntawm kev xyiv fab tiag tiag hauv lub neej no yog kev pab lwm tus. Thaum peb txhawb pab peb cov kwv tij thiab cov muam zoo li tus Cawm Seej tau ua, nrog kev hlub hauv peb lub siab, peb muaj kev xyiv fab uas ua rau peb zoo siab kawg.

Muam Jean B. Bingham, Koom Haum Niam Tsev tus Tuam Thawj Tswj Hwm tau qhia hais tias, “Thaum peb muab siab npuab [kev txhawb pab], peb yuav hloov los ua ib co neeg Xi-oos thiab peb yuav muaj kev xyiv fab loj kawg nkaus nrog rau cov uas peb tau pab thaum peb taug kev ua cov thwj tim.”³

Muaj ntau txoj kev kom muaj kev xyiv fab ntxiv thaum peb mus txhawb pab lwm tus. Muaj ob peb lub tswv yim:

1. To taub vim li cas koj mus txhawb pab. Muaj ntau yam uas qhia vim li cas yuav tsum txhawb pab lwm tus. Qhov tseem ceeb, peb tej hauj lwm yuav tsum muaj raws li Vajtswv tej lub hom phiaj “kom tib neeg txais tau txoj kev tsis txawj tuag thiab txoj sia nyob mus ib txhis” (Mauxes 1:39). Thaum peb ua raws li Thawj Tswj Hwm Russell M. Nelson tej lus kom pab lwm tus thaum peb taug raws txoj kev khi lus, peb yuav muaj kev xyiv fab los ntawm kev koom tes ua Vajtswv tej hauj lwm.⁴ (Xwv kom kawm ntxiv txog qhov uas vim li cas peb ua kev txhawb pab, cia li nyeem “Tej Ntsiab Cai txog Kev Txhawb Pab: Lub Hom Phiaj uas Yuav Hloov Peb txoj Kev Txhawb Pab,” nyob hauv phau Ib Hlis Ntuj 2018 Liahona.)

2. Ua kev txhawb pab vim xav pab tib neeg tsis yog vim xav ua hauj lwm xwb. Thawj Tswj Hwm Thomas S. Monson tau qhia peb ntau zaus tias: “Tsis txhob cia qhov teeb meem uas nej yuav kho rais los mus ua qhov tseem ceeb tshaj tus neeg uas yuav tsum hlub.”⁵ Kev txhawb pab yog kev hlub tib neeg, tsis yog kev ua hauj lwm xwb. Thaum peb hlub lwm tus ib yam li tus Cawm Seej hlub, peb yuav txais tau kev xyiv fab uas los ntawm kev hlub lwm tus.

3. Ua kom yooj yim thaum mus txhawb pab. Txwj Laug M. Russell Ballard, tus Thawj Tswj Hwm Sawv Cev ntawm Pawg Kaum Ob tug Thwj Tim, tau qhia peb tias: “Tej yam tseem ceeb yeej los ntawm tej yam me thiab yooj yim. … Tej yam me me thiab yooj yim uas peb ua los ntawm kev ua siab zoo thiab kev pab yuav los koom ua ke qhia tias peb tau ua neej hlub peb Leej Txiv Saum Ntuj Ceeb Tsheej, tau rau siab ua tus Tswv Yexus Khetos txoj hauj lwm, thiab muaj kev kaj siab lug thiab kev xyiv fab txhua lub sij hawm peb ncav tes pab lwm tus.”⁶

4. Tsis txhob txhawj thaum ua kev txhawb pab. Tsis yog koj lav ris lwm tus txoj kev cawm seej. Qhov ntawd yog nyob ntawm tus neeg thiab tus Tswv nkawd ob leeg xwb. Peb txoj kev lav ris yog kom hlub lawv thiab pab lawv los cuag Yexus Khetos, tus uas yog lawv tus Cawm Seej.

Tej lub sij hawm tib neeg tsis tshua xav thov kev pab, yog li ntawd qhov uas peb qhia tias peb xav pab yeej yog qhov uas lawv xav tau. Tiam sis peb yuav tsum tsis txhob yuam tib neeg kom cia peb pab thiab. Yeej zoo yog tias yus thov kev tso cai ua ntej yus muab kev txhawb pab.

Txwj Laug Dieter F. Uchtdorf ntawm Pawg Kaum Ob tug Thwj Tim tau hais txog ib tug niam tsev uas tsis muaj tus txiv uas raug mob qhua maj—ces nws cov me nyuam raug mob ib yam thiab. Nws lub tsev uas feem ntau nws tu du dais txawm sw sw me ntsis. Muaj tais diav thiab tej khaub chaws nyob pawg lug.

Thaum lub sij hawm uas nws tsis paub nws yuav ua li cas, ob tug viv ncaus ntawm Koom Haum Niam Tsev twb khob qhov rooj. Nkawd tsis tau hais tias, “Qhia wb paub yog wb pab tau.” Thaum nkawd pom teeb meem no, nkawd twb pib ua hauj lwm.

“Nkawd tu tej yam sw sw, coj qhov kaj nrig rau lub tsev, thiab hu nkawd ib tug phooj ywg kom mus yuav khoom noj thiab nqa tuaj rau tus niam tsev no. Thaum ob tug mus xyuas tom tsev no ua tiav nkawd tej hauj lwm thiab mus tsev, tus niam tsev los kua muag ntau—nws los kua muag vim nws zoo siab heev.”⁷

Ob tug uas pub kev pab thiab tus uas txais kev pab twb tau muaj kev xyiv fab.

Yog peb saib xyuas kom muaj kev xyiv fab, kev kaj siab lug thiab kev txaus siab hauv peb lub neej, ces peb haj yam yuav muaj cib fim qhia lwm tus thaum peb mus txhawb pab lawv. Kev xyiv fab yog los ntawm tus Vaj Ntsuj Plig Dawb Huv (saib Kalatias 5:22 and Lus Qhuab Qhia thiab Kev Khi Lus 11:13). Yog ib yam uas peb thov Vajtswv kom tau (saib Lus Qhuab Qhia thiab Kev Khi Lus 136:29) thiab cia los rau hauv peb lub neej. Nov yog ob peb lub tswv yim kom peb muaj xyiv fab hauv peb lub neej:

1. Suav koj cov koob hmoov. Thaum koj xav txog koj lub neej, sau ntawv hauv koj phau ntawv ceev xwm txheej txog tej yam uas Vajtswv tau foom koob hmoov rau koj.⁸ Saib tej yam zoo uas nyob ib puag ncig koj.⁹ Cia li tsom ntsoov rau tej yam uas ua rau koj tsis muaj kev xyiv fab thiab sau ntawv txog tej kev kho teeb meem ntawd los sis txog kev to taub tej ntawd zoo dua ntxiv. Thaum lub caij Easter no, cia li siv sij hawm kom muab siab npuab tus Cawm Seej ntxiv (saib Lus Qhuab Qhia thiab Kev Khi Lus 101:36).

2. Xyaum kom saib meej meej. Thaum yus nyob ntsiag to xav ntsoov ces haj yam yooj yim muaj kev xyiv fab.¹⁰ Cia li mloog zoo seb tej yam dab tsi ua rau koj muaj kev xyiv fab (saib 1 Xwm Txheej Vaj Ntxwv 16:15). Tej lub sij hawm yuav tsum tsis txhob saib tej kev lom zem media kom saib meej meej.¹¹

3. Txhob muab koj tus kheej piv rau lwm tus. Tib neeg hais tias kev sib piv yeej zoo li tus uas nyiag kev xyiv fab. Povlauj ceeb toom hais tias “lawv ib tug ntsuas ib tug thiab muab ib tug piv rau ib tug [lawv tsis muaj tswv yim]” (2 Kauleethaus 10:12).

4. Nrhiav kev tshwm sim. Tus Cawm Seej qhia tias: “Yog hais tias nej thov, nej yuav tau txais kev tshwm sim ntxiv rau kev tshwm sim, kev txawj ntse ntxiv rau kev txawj ntse, kom nej yuav paub tej txuj ci uas neeg paub tsis txog thiab tej yam kaj siab lug—tej uas coj tau kev xyiv fab los, tej uas coj tau txoj sia nyob mus ib txhis los” (Lus Qhuab Qhia thiab Kev Khi Lus 42:61).

Koj yuav ua li cas kom muaj kev xyiv fab ntxiv nyob hauv nej lub neej los ntawm kev txhawb pab lwm tus?