Nambawan Presidensi Toktok, Epril 2018
Taim Yumi Wok Long Go Het Wantaim
I kam long Presiden Russell M. Nelson
Ol Dia brata na susa, mi daunim mi yet long stap wantaim yupela long dispela moning. Fopela de i go pinis yumi putim i go malolo wanpela bikpela man, wanpela profet bilong God—Presiden Thomas S. Monson. Nogat wanpela tok bai inap long wokim gutpela toktok long bikpela na gutpela bilong laip bilong em. Mi bai oltaim oltaim laikim tru pasin poroman bilong mipela wantaim pasin bilong tok tenkyu long wanem samting em i tisim mi. Nau yumi i mas lukluk i go het long taim i kam yet wantaim olgeta feit long Bikpela bilong yumi, Jisas Krais, husat em dispela sios i bilong em.
Tupela de i go pinis olgeta Aposol i stap laip bin bung long rum antap bilong Salt Lake Temple. Long dispela taim ol bin mekim wanpela disesen olgeta i wanbel long en, nambawan taim, long stretim gen Nambawan Presidensi nau na nambatu, olsem bai mi sevim yupela olsem Presiden bilong Sios. Toktok i sot long tokim yupela wanem samting mi pilim long ol brata bilong mi—ol brata husat holim olgeta prishud ki we i bin kam bek gen long dispela graun thru long Profet Joseph Smith long dispela laspela dispensesen—putim han bilong ol antap long het bilong mi long odenim na makim mi olsem Presiden bilong Sios. Em i bin wanpela sekret na daun pasin ekspiriens.
Na bihain em i bin kamap risponsibiliti bilong mi long makim husat Bikpela bin redim long kamap olsem ol kaunsela bilong mi. Hau bai mi kisim tupela tasol long ol Twelpela narapela Aposol, wanwan bilong ol husat mi lavim tumas? Mi pilim bikpela tenkyu long Bikpela long bekim ol preya bilong mi. Mi tok tenkyu tru olsem Presiden Dallin Harris Oaks na Presiden Henry Bennion Eyring tupela i hamamas tasol long sev wantaim mi olsem Nambawan na Nambatu Kaunsela. Presiden Dieter F. Uchtdorf i kisim bek ples bilong em insait long Kwarom bilong ol Twelpela Aposol. Em i kisim pinis ol bikpela wok we em yet i gat wanpela bikpela save long en.
Mi givim bikpela hamamas long em na long Presiden Eyring long gutpela sevis tru tupela i givim olsem ol kaunsela long Presiden Monson. Tupela bin save stret long wok bilong ol, dedikeit tru long wok bilong ol na gat bikpela laik long wok bilong ol. Yumi gat bikpela tenkyu tru long tupela. Tupela laik tasol long sev nau long wanem hap i gat nid long tupela.
Olsem dispela Aposol nambatu long krismas bilong em, Presiden Oaks tu bai kamap Presiden bilong Kwarom bilong ol Twelpela Aposol. Tasol, bikos em i singautim em i go long Nambawan Presidensi na bihainim wantaim oda bilong Sios, Presiden M. Russell Ballard, nambatu long krismas bilong em, bai sev olsem Ekting Presiden bilong dispela kwarom. Nambawan Presidensi bai wok klostu wantaim dispela Twelpela long mekim kamap laik bilong Bikpela na surikim sekret wok bilong Em go het.
Mipela i tenkim yupela tru long ol preya bilong yupela. Planti lain long olgeta hap long wol i wok long ofaim preya bilong mipela. Long moning bihain long dai bilong Presiden Monson, wanpela liklik mangi fopela krismas bilong em i bin ofaim wankain long ol dispela preya. Mi kolim sampela long dispela i kam long leta mama bilong em i bin raitim i kam long meri bilong mi, Wendy. Benson i bin prei olsem, “Papa long Heven, tenk yu olsem Presiden Thomas S. Monson bai inap lukim meri bilong em gen. Tenk yu long nupela profet bilong mipela. Halivim em long bai strong na noken poret olsem em i nupela. Halivim em long gro i go long kamap helti na strong. Halivim em long gat pawa long wanem em i gat prishud. Na halivim mipela long olgeta taim kamap naispela lain.”
Mi tenkim God long ol dispela kain pikinini olsem na long ol papamama husat i sirias long komitmen long raitpela pasin, gutpela was bilong papamama—ol long olgeta papamama, tisa, na memba husat i karim bikpela hevi tasol ol i sev yet wantaim laik. Mi tok gen, long wanwan bilong yupela, mi tok tenk yu tu wantaim daun pasin.
Bikpela I Stap long Poret
Taim yumi wok long go het wantaim, mi askim yupela long tingting long bikpela pasin tru we Bikpela i save ronim Sios bilong Em. Taim Presiden bilong Sios i dai, i nogat misteri long hau husat bai ol i makim long sev long dispela hap. I no save gat eleksen, nogat kempein, tasol isi isi wok bilong holi plen bilong husat bai kam bihain, dispela Bikpela Em yet i save makim.
Wanwan de long sevis bilong wanpela Aposol em i de bilong lainim na redim ol samting long gat moa risponsibiliti long taim i kam yet. Em i save kisim planti yia long wanpela Aposol long muv long junia sia i go long sinia sia long dispela sekol. Namel long dispela taim, em bai kisim nambawan eksperiens long wanwan sait long wok bilong Sios. Tu em bai kam save gut tru long olgeta pipol long dispela ples graun, na long ol histori bilong ol, kalcha bilong ol, tokples bilong ol olsem wok bilong em bai kisim em i go olgeta taim long olgeta hap bilong ples graun. Dispela wei bilong husat bai kam bihain long lidasip bilong Sios em i wanpela kain em yet. Mi no save long narapela em i olsem dispela. Dispela i no inap long mekim yumi kirap nogut, long wanem dispela em i Sios bilong Bikpela. Em i no save wok bihainim pasin bilong ol man.
Mi bin sev insait long Kwarom bilong ol Twelpela ananit long faivpela Presiden bilong Sios bipo. Mi bin lukim wanwan Presiden kisim revelesen na givim bekim long dispela revelesen. Bikpela bin save olgeta taim na bai olgeta taim tisim na givim gutpela skul long ol profet bilong Em. Bikpela i stap long poret bilong en. Mipela husat i bin odein long sanap olsem witnes bilong holi nem bilong Em long olgeta hap bilong dispela wol bai go het yet long lukluk long save long laik bilong Em na bihainim.
Stap long dispela Kavanen Rot
Nau, long wanwan memba bilong dispela Sios mi tok, stap long dispela kavanen rot. Komitmen bilong yu long bihainim Sevia long mekim kavanen wantaim Em na bihain long holim pas long ol dispela kavanen bai opim dua long olgeta blesing bilong spirit na privilis i stap bilong ol man, ol meri, na ol pikinini long olgeta hap.
Olsem wanpela nupela Presiden, mipela laik long stat wantaim pinis bilong dispela long tingting. Long dispela as, mipela work long toktok long yupela i kam long temple. Pinis bilong dispela long we yumi wanwan laik wok hat long kisim pawa insait long haus bilong Bikpela, sil olsem ol famili, kamap feitful long ol kavanen yumi mekim insait long temple we i mekim yumi inap long kisim dispela bikpela moa presen bilong God—em bilong laip oltaim oltaim. Ol odinens bilong temple na ol kavanen yupela mekim long temple em ol ki long strongim laip bilong yupela, marit na famili bilong yupela, na save bilong yupela long pait agens long ol kam nogut bilong ol birua. Lotu bilong yupela long temple na sevis bilong ol tumbuna bilong yupela long temple bai blesim yupela wantaim moa revelesen na pis bilong yupela wanwan na bai strongim komitmen bilong yupela long stap long dispela kavanen rot.
Nau, sapos yupela bin sanap aut long dispela rot, inap mi askim yupela wantaim olgeta hop insait long bel bilong mi long plis kam bek. Wanem kain wari bilong yupela, wanem kain salens bilong yupela, i gat i stap wanpela ples bilong yupela long dispela, em Sios bilong Bikpela. Yupela na ol lain bilong yupela husat i no bon yet bai kisim blesing long ol laik bilong yupela nau long kam bek long dispela kavanen rot. Papa bilong yumi long Heven laikim stret ol pikinini bilong Em, na Em i laikim yumi wanwan long go bek long ples bilong yumi wantaim Em. Dispela em i bikpela gol bilong Sios bilong Jisas Krais bilong ol Lata-de Seint—long halivim yumi wanwan long go bek long ples bilong yumi.
Mi tokaut long bikpela lav bilong mi long yupela—lav we i bin wok long gro long ol dispela yia i go pinis we mi bin wok long bungim yupela, lotu wantaim yupela, wok long sevim yupela. Holi wok bilong mipela em long go long olgeta neisen, wanples, wantok, na olgeta pipol, wok long halivim long redim wol long Nambatu Kam bilong Bikpela. Dispela bai mipela wokim wantaim feit long Bikpela Jisas Krais, olgeta taim save olsem Em i gat kontrol. Dispela em wok bilong Em an Sios bilong Em. Mipela ol wokman bilong Em.
Mi tokaut strong long divosen bilong mi long God em Oltaim Oltaim Papa bilong yumi na long Pikinini Man bilong Em, Jisas Krais. Mi save long Tupela, mi lavim Tupela na wanbel long sevim Tupela—na yupela—wantaim olgeta win i stap yet insait long laip bilong mi. Long sekret nem bilong Jisas Krais, amen.
© 2018 ikam long Intellectual Reserve, Inc. All rights reserved. Printim long USA. Tok orait long Inglis: 6/17. Tok orait long tanim tokples: 6/17. Tanim tok bilong First Presidency Message, April 2018. Tok Pisin. 15048 878