Irisie Mbrasɛm no na Erodɔ Binom

Sɛ yɛdwen ɔdɔ ho a, ɔtaa dɛ dza odzi kan a ɔba hɛn adwen mu nye cene mu akɔndɔdze, chocolate, na nhyiren. Mbom ɔdɔ—nokwar ɔdɔ—kɔ bun mu koraa na ɔyɛ etuhoakyɛdze koraa kyɛn dɛm. Jesus Christ tsenaa ase maa hɛn na Owui maa hɛn osian No dɔ a Ɔwɔ ma hɛn no ntsi. Nokwar, mbrasɛm akɛse ebien no nye yɛbɔdɔ Nyankopɔn na yɛbɔdɔ obiara so (hwɛ Matthew 22:36–40). Mbom yebesi dɛn botum akyerɛ binom dɛ yɛdɔ hɔn?

President Uchtdorf kyɛ Christ N’abɛbusɛm no a ɔfa mbabanyin beenu no ho, ɔbaako no a ɔyɛ edwuma ma n’egya na ɔbaako no a ɔnnyɛ no. Agyenkwa no si no tadua dɛ babanyin kor no a ɔyɛɛ setsie ma n’egya no nko na ɔdɔ no nokwar mu no. Dɛmara so, sɛ yɛyɛ setsie ma Nyankopɔn Ne mbrasɛm a, yɛkyerɛ dɛ yɛdɔ No na yɛpɛ dɛ yɛsan kɔ Ne nkyɛn.

Mbom yebesi dɛn akyerɛ dɛ yɛdɔ obiara so? President Uchtdorf kyerɛkyerɛ ɔno so mu: “Sɛ yɛdɔ hɛn mfɛfo ampaara a, yɛtsen hɛnho dze boa ‘ehiafo na abɔbɔfo, ayarfo nye hɔn a wɔretseetsee hɔn.’ Hɔn a wɔdze etuhoakyɛ yɛ ayamuhyehye ndzeyɛɛ yinom dze som no, hɔnara nye Jesus Christ esuafo no.”

Ntsi ber a odzi do a ibohu w’awofo, nua, anaa nyɛnko bi no, dwen mbrɛ ibɔsom hɔn dze akyerɛ dɔ a ewɔ ma hɔn no. Ɔremma ɔwo na hɔn nko nnya enyigye, mbom ɔbɛma w’Egya a ɔwɔ Sor no so enyi agye.