O Le Faitotoa ma le Ala

O loo tatou sailia uma le ola faavavau, o lona uiga o le faaolaina ma faaeaina i le tikeri aupito maualuga o le malo selesitila, lea e mafai ona tatou ola ai i luma o le Tama Faalelagi o ni aiga.

I le faaopoopo atu i le faatuatua ia Iesu Keriso ma le salamo, o sauniga ma feagaiga o le perisitua e faatagaina i tatou e ulu atu i le ala e tau atu i le ola e faavavau. Tusa lava po o anafea na e ulu ai i totonu o lenei ala po o fea foi o e i ai i luga o le ala—pe na e fanau i le Ekalesia pe na e liliu mai mulimuli ane, pe sa e malosi i le lotu i lou olaga atoa pe o lena faatoa e toe foi mai i le Ekalesia—e mafai ona e alualu i luma i le ala a o e taulai atu i au feagaiga ma le mea e mafai ona e faia e maua ai ma tausia ai.

Ma e taua le iloa o sauniga ma feagaiga o le perisitua e le na o le ofoina mai o le folafolaga o se lumanai mamalu. Latou te tuuina mai foi ia i tatou le malosi, faamafanafanaga, ma le lagolago tatou te manaomia nei ina ia mulimuli i le ala, ma tumau ai e oo i le iuga i le amiotonu.