O Fale e 2 Sa Nofo Ai Iosefa Samita

Saunia e Jan Pinborough

Mekasini a le Ekalesia

Sau e vaavaai i se nofoaga taua i le talafaasolopito o le Ekalesia!

O Palamaira, Niu Ioka, o le nofoaga lea sa amata ai le Toefuataiga o Le Ekalesia a Iesu Keriso o le Au Paia o Aso e Gata Ai i le 193 tausaga ua mavae. Sa asiasi atu Luka, Rasela, ma Iulia S. i lenei nofoaga faapitoa e aoao atili ai e uiga i le mea sa nofo ai le Perofeta o Iosefa Samita ma le ala sa ia fesoasoani ai e toefuatai mai le Ekalesia i le lalolagi.

O Le Falelaau

O le falelaau lenei sa fausia ia foliga i le fale sa nofo ai Iosefa mai le 12 i le 19 o ona tausaga.

1.O Iosefa e toalima ona uso ae toatolu ona tuafafine. Sa o se fale pumoomoo mo ni tagata e toa 11!

2.Sa masani ona faapotopoto le aiga i le laulau ai e faitau le Tusi Paia. Ina ua 14 ona tausaga, sa faitau Iosefa i le Iakopo 1:5: “A e afai ua leai se poto i so outou, ina ole atu ia i le Atua.” Sa i ai sana fesili taua e fesili atu i le Atua.

3. I le taeao po o se tasi aso o le tautotogo i le 1820, sa savalivali atu ai Iosefa i se togalaau e latalata i le latou falelaau ma tatalo ai po o le fea o lotu e tatau ona auai ai. Sa faaali mai le Tama Faalelagi ma Iesu Keriso ma ta’u mai ia te ia e aua nei auai i se lotu o na lotu. Sa fetalai mai Iesu o le a fesoasoani Iosefa e toe aumai le Ekalesia a le Alii i le lalolagi.

4.O tama uma e toaono o le aiga sa momoe i se potu i le fogafale i luga. I se tasi po i le 17 o tausaga o Iosefa, sa faaali faatolu mai ai le agelu o Moronae ma ta’u mai ia te ia e uiga i papatusi auro o le a faaliliuina e Iosefa ma lolomiina o le Tusi a Mamona. Sa maua e Iosefa ia papatusi i le fa tausaga mulimuli ane.

O Le Fale Faatafafa

Ina ua 19 tausaga o Iosefa, sa siitia atu lona aiga i se fale fou. Sa nofo ai iina i le taimi sa ia mauaina ai papatusi auro mai le Mauga o Kumora.

5. Sa o mai nisi o tagata e taumafai e gaoi ia papatusi auro. Sa nana e Iosefa i lalo o piliki i le pito i luma o le magalafu lenei.

6. Sa momoe tuafafine o Iosefa o Sofarania ma Katerina i le potumoe laitiiti lenei. I se tasi o po sa afifi ai e Iosea ia papatusi i se ie ma nana i le va o teineiti e toalua i luga o lo la moega.