Qhov Zoo los ntawm Ib tug Aub Tom

Thaum lub caij ntuj kub xyoo 2009, kuv tus phooj ywg tus aub tom kuv lub ntsej muag. Hmoov tsis muaj ces tus aub tom es ua rau kuv daim di ncauj ntuag, es kuv yuav tsum coj mus xaws.

Tom qab kuv raug sab li ntawd, kuv kuj poob siab heev thiab. Kuv cia kuv tej kev cov nyom no kav kuv tej kev xav mus xav los, thiab kuv kuj xav hais tias kuv lub neej raug puas tsuaj tag nrho lawm. Kuv txaj muag heev vim yog kuv daim di ncauj thiab kuv tsis xav tawm mus ntsib leej twg hlo li. Raws li kuv xav kuv tej tswv yim npaj ua hais txog ntawm kev ntaus phias ab naum, ntaus pob, mus tom lub koom txoos, ua luam dej, los yog mus kawm ntawv txhua qhov raug puas tsuaj mus thiab vim yog kuv raug sab li ntawd.

Tiam sis thaum twg kuv thov Vajtswv, txais tej koob hmoov pov thawj hwj, nrog kuv niam kuv txiv nkawd tham, los yog thaum twg kuv cov kwv tij neej tsa thiab kuv cov phooj ywg tuaj xyuas kuv, kuv lub siab txawm kaj me ntsis thiab kuv zoo siab txawm yog ib lub caij ntxim tu siab heev. Tsis ntev ces kuv txawm pom tau hais tias yog lwm tus neeg xav txog qhov uas kuv raug sab ntawd, ces lawv khuv leej txog kuv xwb.

Qhov uas muaj los rau kuv no tau pab kuv ua ib tug neeg zoo dua, thiab kuv kawm hais tias kuv yuav tsum tsis txhob txhawj xeeb txog qhov uas saib lwm tus neeg xav li cas txog kuv. Kuv kuj tau koob hmoov thiab vim qhov uas kuv raug sab ntawd pab kuv pom tau hais tias kuv yuav tsum xav txog kuv tus kheej tsawg dua thiab pab hlub lwm tus neeg ntau dua. Kuv sab ntsuj plig tau dag zog ntau thaum lub sij hawm no.

Kuv kawm tau hais tias tej kev cov nyom yog ib feem ntawm Leej Txiv Saum Ntuj Ceeb Tsheej lub tswv yim rau peb. Yog tias peb nrhiav kom tau qhov zoo thiab tsis txhob pom qhov tsis zoo xwb, ces peb kov yeej tau tej kev cov nyom, rais los mus ua ib tug neeg zoo dua, thiab cia qhov uas tau muaj los rau peb ntawd ntxiv dag zog rau peb zaj lus tim khawv.