Helmuth Hübener

Helmuth Günther Hübener (1925–42), membru tal-Knisja f’Hamburg, il-Ġermanja, kien l-iżgħar persuna tar-reżistenza Ġermaniża kontra n-Nażiżmu li ngħatat is-sentenza tal-mewt fuq l-ordni tal-Qorti tal-Poplu Speċjali (Volksgerichtshof) f’Berlin. Mill-bidu tal-1941, Hübener ipproduċa serje ta’ fuljetti anti-Nażiżti li kienu jinkludu l-kummentarju politiku tiegħu u traskritti tax-xandiriet tar-radju tal-Alleati. Bl-għajnuna ta’ żgħażagħ oħra, huwa qassam dawn il-fuljetti ma’ Hamburg kollu. Fi Frar 1942, il-Qorti sabet lil Hübener ħati ta’ “konġura biex jitwettaq tradiment għoli u ta’ sapport tal-għadu li jwassal għal tradiment” u ordnat l-esekuzzjoni tiegħu; it-tribunal ikkundanna wkoll lit-tliet ħbieb tiegħu Rudolf Wobbe, Karl-Heinz Schnibbe, u Gerhard Düwer talli “semgħu stazzjon tar-radju barrani u xerrdu aħbarjiet ta’ radju barrani.” Hübener ingħata s-sentenza tal-mewt fl-età ta’ 17-il sena, tmien xhur wara. Wobbe, Schnibbe, u Düwer ġew issentenzjati għal xogħol iebes u baqgħu fil-kampijiet tal-priġunieri sa tmiem it-Tieni Gwerra Dinjija.

Hübener twieled Hamburg fl-1925. Ommu, Emma Guddat Kunkel, mara xebba, ħadmet biex tkun tista’ trabbi lil Helmuth u lil żewġ ħutu ikbar, Hans u Gerhard. Riżultat ta’ dan, Helmuth u ħutu qattgħu l-parti kbira taż-żgħożija tagħhom man-nanna tagħhom, Wilhemine Sudrow, li kienet tgħix fil-qrib. Fl-1939, Emma żżewġet lil Hugo Hübener, ħaddiem tal-kostruzzjoni u membru tal-Partit tan-Nażi, li iktar tard adotta lil Helmuth.

L-istess bħall-ġirien tagħhom, bosta Qaddisin tal-Aħħar Żmien Ġermaniżi għall-ewwel kellhom it-tama fil-wegħdiet tal-Partit Nażiżta ta’ stabbiltà ekonomika ġdida u ta’ tkattir fil-kburija nazzjonali. Xi membri tal-Knisja ngħaqdu mal-partit filwaqt li oħrajn opponew ir-reġim b’mod attiv. Kien hemm oħrajn li baqgħu newtrali. Helmuth Hübener ra b’għajnejh stess dan l-ispettru ta’ partiċipazzjoni fi ħdan il-partit. Il-president tal-fergħa tiegħu, Arthur Zander, kien membru fil-Partit Nażiżta li ried iġiegħel lill-membri biex jisimgħu x-xandiriet fuq ir-radju mill-partit, hedded li jirrapporta membri dwar attivitajiet anti-governattivi, u, fl-1938, waħħal tabella fuq il-bieb tad-dar tal-laqgħat li tgħid li l-Lhud ma kinux milqugħin. Xi ftit membri kienu jattendu l-laqgħat tal-Knisja bl-uniformi militari Nażiżta u bl-uniformi tas-servizz ċivili. Min-naħa l-oħra, Otto Berndt, il-president tad-distrett ta’ Hamburg, kien jippriedka minn fuq il-pulptu. Għalkemm huwa rreżista l-idea tax-xandiriet tar-radju, huwa ħeġġeġ privatament ir-reżistenza tal-membri, u ta’ spiss kien jimministra lill-konvertiti Lhud. Għalkemm Hübener għall-ewwel ipparteċipa fil-Jungvolk (il-grupp, organizzat min-Nażiżti għat-tfal) u fiż-Żgħażagħ ta’ Hitler, huwa biż-żmien ċaħad l-ideoloġija tal-partit.

Fir-rebbiegħa tal-1941, Hübener skopra radju ta’ frekwenza baxxa li kien ta’ ħuh, u kien joqgħod jisma’ l-aħbarjiet ta’ billejl li kienu jxandru l-British Broadcasting Corporation (BBC)—reat taħt il-liġi Nażiżta. Xi drabi, kienu jingħaqdu miegħu tnejn minn sħabu tal-knisja, Karl-Heinz Schnibbe u Rudolf (Rudi) Wobbe. Hübener ma damx biex beda jipproduċi fuljetti anti-Nażiżti li kien ikollhom informazzjoni meħuda mix-xandiriet flimkien ma’ kummentarju. Bl-uża ta’ karti saħħara u żewġ tajprajters li ssellef mill-fergħa, Hübener kien jagħmel kopji ta’ dawn il-fuljetti, li hu, Schnibbe, and Wobbe kienu jwaħħlu mat-tabelli tal-bulettin tal-Partit Nażiżta, kienu jxerrdu fit-toroq, u jimpostjaw fil-posta tan-nies. Hübener ippruva mingħajr suċċess jirreklutw żgħażagħ oħra biex jgħinuh. Għal tmien xhur sħaħ, Hübener pproduċa serje ta’ fuljetti li kienu jisfidaw ir-rettorika tal-partit u jikkontestaw t-tagħrif uffiċjali dwar il-gwerra. Kien ukoll jikkritika b’mod dirett lil uffiċjali tal-partit. Il-Führer “se jibgħat eluf sħaħ minkom fin-nirien sabiex itemm ir-reat li huwa beda,” kiteb Hübener f’wieħed mill-fuljetti. “Eluf sħaħ minn fost in-nisa u t-tfal tagħkom se jisfaw romol u orfni. U għal xejn!”

Fi Frar tal-1942, aġenti tal-Gestapo arrestaw lil Hübener, Wobbe, Schnibbe, u Düwer fuq akkużi ta’ reati varji taħt il-liġi Nażiżta, inkluż “konġura biex jitwettaq tradiment għoli.” Fil-11 ta’ Awwissu , matul ġuri li dam ftit iktar minn disa’ sigħat, l-erbgħa li huma dehru quddiem il-Qorti tal-Poplu Speċjali f’Berlin, magħmul minn tliet membri. L-erbgħa li huma nstabu ħatjin. Lil Hübener qatagħuhielu għall-mewt, filwaqt li Wobbe, Schnibbe, u Düwer ġew issentenzjati għal min 4 sa 10 snin xogħol iebes fil-kampijiet. Hübener ngħata s-sentenza tal-mewt bil-giljottina fis-27 ta’ Ottubru, 1942.

Ftit wara li Hübener ġie arrestat, il-president tal-fergħa Arthur Zander kiteb “skomunikat” fuq ir-reġistru ta’ sħubija ta’ Helmuth. Madanakollu, il-president tad-distrett Otto Berndt irrifjuta li jagħti l-firma tiegħu meħtieġa biex din l-azzjoni tkun approvata. Anton Huck, membru fil-presidenza tal-Missjoni Ewropea, ipprova t-tieni firma. Bosta mexxejja tal-Knisja wara qalu li kellhom l-intenzjoni li jiddistakkaw il-Knisja minn Hübener biex jipproteġu lill-Qaddisin tal-Aħħar Żmien mill-korla tal-uffiċjal Nażiżti. Wara li ntemmet it-Tieni Gwerra Dinjija, l-Ewwel Presidenza biddliet id-deċiżjoni li Hübener jiġi kkomunikata u, fl-1948, Hübener ingħata ordinanzi tat-tempju bi prokura.

Fis-snin ta’ wara l-Gwerra, Helmuth Hübener ġie mfakkar għar-reżistenza tiegħu kontra r-reġim Nażiżt. Kien hemm wirjiet biex ifakkruh fi skola vokazzjonali f’Hamburg, fit-Tifkira tar-Reżistenza Ġermaniża f’Berlin, u fil-Ħabs ta’ Plötzensee, fejn Hübener ingħata l-mewt. Barra minn hekk, hemm ċentru taż-żgħażagħ, skola, u żewġ toroq f’Hamburg li jġibu ismu. Sa mis-snin 40, gruppi politiċi, soċjali, u reliġjużi organizzaw bosta ċelebrazzjonijiet fit-8 ta’ Jannar (għeluq sninu) u fis-27 ta’ Ottubru (id-data tal-esekuzzjoni tiegħu) biex jikkommemoraw l-erojiżmu tiegħu. Fit-8 ta’ Jannar, 2020, skola f’ċentru ta’ detenzjoni ġovanili viċin il-Ħabs ta’ Plötzensee ġiet imsemmija f’ġieħ Hübener. Ultimament, forsi l-ħsibijiet ta’ Hübener stess f’ittra li bagħat waqt l-aħħar mumenti tiegħu jservu bħala l-aqwa tifkira tal-qawwa tiegħu tal-konvinzjoni u t-tama dejjiem tiegħu: “Jiena grat ħafna lil Missieri tas-Smewwiet li din il-ħajja mill-aktar meraviljuża se tintemm illum filgħaxija. Hekk jew hekk, ma stajtx inġerraħha iktar! Missieri fis-Smewwiet jaf li m’għamilt xejn ħażin. … Jiena naf li Alla jgħix, u Huwa se jkun l-imħallef xieraq ta’ din il-kwistjoni. Sakemm ningħaqdu mill-ġdid f’dik id-dinja aħjar!“

Suġġetti relatati: Ġermanja, It-Tieni Gwerra Dinjija