Molaetsa Go Nonofo ya Banana wa kgwedi le kgwedi, Moranang 2026

Morago ga Diphoso Tsa Gago—Le e leng Tse Dikgolo

Ka David Dickson

Dimakasine tsa Kereke

Re ka ithuta go le gontsi go tswa go Moaposetole Petere ka ga Mmoloki, Tefo ya Gagwe, le go leka gape.

Bontsi jwa rona re dirile kgakologelo e le nngwe e re eletsang e kete re ka e lebala. E ka tswa e ne e le motsotso wa go tlhabiwa ke ditlhong, kotsi e e botlhoko ya mmele, kgotsa go ngangisana fa o ne o bua mafoko a o eletsang e kete o ka a busetsa morago, go na le dinako tse dintsi mo botshelong fa konopo ya “go dira” kgotsa le e leng go “phimola” e utlwala e gogela thata.

Perofeso e e Botlhoko e a Diragadiwa

Moaposetole Petere e ne e le motho yo o kgatlhang mo Kgolaganong e Ntšha. O ne a na le tumelo le bopelokgale jwa go tsamaya mo godimo ga metsi go ya kwa go Jeso, mme morago ga metsotsonyana fela o ne a letlelela poifo ya gagwe go mo fenya mme a simolola go nwela, a goela kwa Moreneng go kopa thuso (bona Mathaio 14:28–31). Le fa re sa itse dintlha tsotlhe tsa botshelo jwa ga Petere, re itse nako nngwe fa a ne a lela botlhoko.

Dioura fela pele ga Jeso Keresete a tshwarwa, O ne a perofesa gore Petere o tlaa Mo itatola ga raro pele ga mokoko o lela gabedi. Petere o ne a gana go dumela perofeso e e ntseng jalo mme “a gatelela ka thata a re: Fa nka swa le wena, ga nkitla ke go itatola ka gope” (Mareko 14:31).

Gone mme, perofeso ya Mmoloki e ne ya fetoga boammaaruri. Ka letshogo le poifo e e neng e le teng mo go tshwarweng ga Mmoloki, bopelokgale jwa ga Petere bo ne jwa mo palela. Morago ga a setse a latotse gore o itse Mmoloki gabedi, le go gatelelwa lekgetho la boraro, Petere “a simolola go rogakana le go ikana, a re: Ga ke mo itse monna yo lo buang ka ene” (Mareko 14:71).

Fa mokoko o lela gabedi mme Petere a gakologelwa perofeso ya Mmoloki, “a … lela botlhoko” (Mathaio 26:75).

Mme seo ga se bokhutlo jwa polelo ya gagwe!

Kgokgotsho ya Retologa, ka Bosakhutleng

Ka tsotlhe tse re ka di ithutang mo dikwalong tse di boitshepo, dipoifo tsa ga Petere ga di ise di ko di fete bopaki jwa gagwe ka ga Jeso Keresete gape. O ne a paka ka bopelokgale ka Mmoloki ka tshono nngwe le nngwe, go sa kgathalesege kotsi ya botho mo go direng jalo. Gakologelwa, Petere o ne a ruta batho ba ba neng ba sa tswa go bapola Jeso Keresete! Kotsi e ne e le ya mmatota.

Fa Petere a ne a fodisa monna yo a neng a tlhotsa go tswa botsalo, a mo laela a re, “Mo leineng la ga Jeso Keresete wa Nasaretha nanoga o tsamaye” (Ditiro 3:6), o ne a tshwarwa mmogo le Johane mme a bodiwa gore o dirile jang kgakgamatso e.

Petere a araba ka bopelokgale a re, “A go itsiwe mo go lona lotlhe le mo bathong botlhe ba Iseraele gore ka leina la ga Jeso Keresete wa Nasaretha, yo lo mmapotseng, yo Modimo a mo tsositseng mo baswing, ke ka ene monna yo a emeng fa pele ga lona a fodile.

“Yo ke ene lentswe le le nyaditsweng ke lona baagi, le le dirilweng tlhogo ya kgokgotsho. Mme ga go na poloko mo go ope o sele, gonne ga gona leina lepe le lengwe fa tlase ga legodimo le batho ba le neetsweng, le re tshwanetseng go bolokiwa ka lone” (Ditiro 4:10–12).

A karabo ya bopelokgale! Le bosupi jo bo bonalang sentle jwa ditumelo tsa gagwe.

Batlhanka Ba Ba Sa Itekanelang, Ba Ba Kgonang Go Direla

Mongwe le mongwe wa rona o tlile go leofa mo botshelong jono. Ntswa go le jalo mo maitekong a rona a a molemo thata, re tlile go tlhaela mo ditsholofelong le mo maikaelelong a rona nako le nako. Jaaka Poresidente Jeffrey R. Holland (1940–2025),Poresidente Ya Khoramo ya Baaposetole ba ba Lesome le Bobedi, a kile a ruta, “Ntle le mo kgannyeng ya Morwawe yo o Tsetsweng a le esi yo o itekanetseng, batho ba ba sa itekanelang ke botlhe ba Modimo a kileng a tshwanelwa ke go dira le bone.”

Boleng jwa gago jwa semoya ga bo tlhalosiwe kgotsa ga bo lekanyediwe ke diphoso tsa gago—le tse dikgolo! Ka Ntlha ya gore o ne a ikwatlhaya mme Keresete a mo itshwarela, go itatola ga ga Petere ga ga Keresete ga go a ka ga mo thibela gore moragonyana a pake, a rute, le go sokologa ka thata e kgolo. Dikwalo tse di boitshepo di tletse ka dikao tsa barutwana ba bangwe ba ba neng ba leofa, ba ikwatlhaya, mme ba tswelela ka tumelo mo go Keresete.

Satane o tlaa nna a leka go go sokasoka pelo gore diphoso tsa gago di a oketsega le gore ga o kitla o kgona go di fenya. Itlhokomolose maaka a gagwe!

Kgaitsadi Tamara W. Runia, Mogakolodi wa Ntlha mo Boporesidenteng jwa Makgarejwana, o ne a ruta jaana: “O tlhoka go utlwa se, ka jalo ke tlaa buela mafoko ano kwa godimo: Ga o lentswe le le mo tlhogong ya gago kgotsa diphoso tse o di dirileng. Le wena o ka nna wa tlhoka go buela seo kwa godimo. Bolelela Satane gore, ‘E seng gompieno.’ Mo beye kwa morago ga gago.

“Utlwa kgogelo eo, bohutsana jwa poifomodimo jo bo go retololelang kwa Mmoloking wa gago, mme o lebelele tshegofatso ya Gagwe e tsena mo botshelong jwa gago le matshelo a bao o ba ratang. Ke solofetsa gore motsotso o re tlisang pelo e e phatlogileng ka bopelokgale kwa go Ene, O teng ka bonako.”

Malatsi a Gago a a Phatsima kwa Pele

Paka eno ya Paseka, fa o ntse o akanya ka Tetlanyo ya Mmoloki ka botlalo, gakologelwa gore bokgoni jwa go ikwatlhaya le go leka gape ke nngwe ya dimpho tse dikgolo tse o ka di amogelang. Ka ntlha ya ga Jeso Keresete, diphoso tsa gago tse di maswe thata di ka itshwarelwa mme morago ga moo tsa latlhiwa jaaka dikeetane tse di bokete.

“Mmoloki o phatsima ka bosakhutleng go feta lefifi la ditlhong,” go rutile Kgaitsadi Runia.

Ka ntlha ya ga Jeso Keresete, tsholofelo e ka phatsima ka metlha kwa pele fa o nna o tsepamisitse mogopolo mo go Ene.

© 2026 ka Intellectual Reserve, Inc. All rights reserved. E gatisitswe mo USA. Tetla ya Sekgoa: 6/19. Tetla ya thanolo: 6/19. Thanolo ya Monthly For the Strength of Youth Message, April 2026. Tswana. 20064 763