మీ తప్పుల తర్వాత—పెద్ద తప్పులు కూడా

కొత్త నిబంధనలో అపొస్తలుడైన పేతురు ఒక ఆసక్తికరమైన వ్యక్తి. అతనికి యేసు వైపు నీటిపై నడిచేంత విశ్వాసం మరియు ధైర్యం ఉంది, కానీ కొన్ని క్షణాల తర్వాత అతను తన భయాలను తనని అధిగమించడానికి అనుమతించాడు మరియు మునిగిపోవడం ప్రారంభించాడు, సహాయం కోసం ప్రభువుకు మొరపెట్టాడు (మత్తయి 14:28–31 చూడండి). పేతురు జీవితం గురించిన వివరాలన్నీ మనకు తెలియనప్పటికీ, ఆయన ఒకానొక సమయంలో మిక్కిలిగా ఏడ్చిన సందర్భం గురించి మనకు తెలుసు.

యేసు క్రీస్తు బంధించబడటానికి కొన్ని గంటల ముందు, రెండుమారులు కోడి కూయకమునుపే పేతురు తనను ఎరుగనని ముమ్మారు చెబుతాడని ఆయన ప్రవచించారు. అలాంటి ప్రవచనాన్ని నమ్మడానికి పేతురు నిరాకరించాడు మరియు “నేను నీతోకూడ చావవలసి వచ్చినను నిన్ను ఎరుగనని చెప్పనే చెప్పననెను” అని మరింత ఖండితముగా చెప్పెను (మార్కు 14:31).

అయితే, రక్షకుని ప్రవచనమే నిజమైంది. రక్షకుని బంధీకరణ సమయంలో నెలకొన్న భయాందోళనల మధ్య, పేతురు ధైర్యం అతనిని విఫలపరిచింది. రక్షకుడిని తాను ఎరుగనని రెండుసార్లు తిరస్కరించిన తర్వాత, మూడవసారి ఒత్తిడి ఎదురైనప్పుడు, పేతురు “మీరు చెప్పుచున్న మనుష్యుని నేనెరుగనని చెప్పి, శపించుకొనుటకును ఒట్టుబెట్టుకొనుటకును మొదలు పెట్టెను” (మార్కు 14:71).

రెండోసారి కోడి కూయగానే, రక్షకుని ప్రవచనాన్ని పేతురు గుర్తుచేసుకుని, “సంతాప పడి యేడ్చెను” (మత్తయి 26:75).

కానీ అది అతని కథకు ముగింపు కాదు!

మనం లేఖనాల నుండి నేర్చుకోగలిగిన దాని ప్రకారం, పేతురు యొక్క భయాలు మరెప్పుడూ యేసు క్రీస్తుపై ఆయనకున్న సాక్ష్యాన్ని అధిగమించలేదు. అతను తనకు ఎదురయ్యే ప్రతి సందర్భంలోనూ, తన ప్రాణాలకు ముప్పు ఉన్నప్పటికీ రక్షకుని గురించి ధైర్యంగా సాక్ష్యమిచ్చాడు. గుర్తుంచుకోండి, అప్పుడే యేసు క్రీస్తును సిలువ వేసిన ప్రజలకే పేతురు బోధిస్తున్నాడు! ప్రమాదం నిజంగానే ఉంది.

పుట్టినప్పటి నుండి కుంటివాడైన ఒక వ్యక్తిని పేతురు స్వస్థపరిచి, “నజరేయుడైన యేసుక్రీస్తు నామమున లేచి నడువుము” అని ఆజ్ఞాపించినప్పుడు, (అపొస్తలుల కార్యములు 3:6), అతనిని మరియు అతనితో పాటున్న యోహానును బంధించి, ఈ అద్భుతాన్ని ఎలా చేశాడని ప్రశ్నించారు.

పేతురు ఎంతో ధైర్యంగా ఇలా సమాధానమిచ్చాడు, “మీరందరును ఇశ్రాయేలు ప్రజలందరును తెలిసికొనవలసినదేమనగా, మీరు సిలువవేసినట్టియు, మృతులలోనుండి దేవుడు లేపినట్టియు నజరేయుడైన యేసు క్రీస్తు నామ ముననే వీడు స్వస్థతపొంది మీ యెదుట నిలుచుచున్నాడు.

“ఇల్లు కట్టువారైన మీరు తృణీకరించిన రాయి ఆయనే; ఆ రాయి మూలకు తలరాయి ఆయెను. మరి ఎవనివలనను రక్షణ కలుగదు; ఈ నామముననే మనము రక్షణ పొందవలెను గాని, ఆకాశము క్రింద మనుష్యులలో ఇయ్యబడిన మరి ఏ నామమున రక్షణ పొందలేము అనెను” (అపొస్తలుల కార్యములు 4:10–12).

ఎంత ధైర్యవంతమైన సమాధానం! మరియు ఆయన దృఢ సంకల్పానికి ఇది స్పష్టమైన నిదర్శనం.

ఈ జీవితంలో మనలో ప్రతి ఒక్కరం పాపం చేస్తాము. మనం శాయశక్తులా ప్రయత్నించినప్పటికీ, కొన్ని సమయాల్లో మన ఆశయాలను మరియు ఉద్దేశాలను చేరుకోవడంలో వెనుకబడిపోతుంటాము. పన్నెండుమంది అపొస్తలుల సమూహ అధ్యక్షులైన జెఫ్రీ ఆర్. హాలండ్ (1940–2025) ఒకప్పుడు బోధించినట్లుగా, “ఆయన ఏకైక పరిపూర్ణ కుమారుడైన యేసు క్రీస్తు విషయంలో తప్ప, దేవుడు ఇప్పటివరకు పని చేయాల్సి వచ్చినవారందరూ అపరిపూర్ణులైన మనుషులే.”

మీ ఆధ్యాత్మిక విలువ మీ తప్పుల ద్వారా నిర్ణయించబడదు లేదా పరిమితం చేయబడదు—అవి పెద్ద తప్పులైనప్పటికీ! అతను పశ్చాత్తాపపడ్డాడు మరియు క్రీస్తు అతన్ని క్షమించారు కాబట్టి, పేతురు క్రీస్తును తిరస్కరించడం వలన అతను తరువాత గొప్ప శక్తితో సాక్ష్యం ఇవ్వకుండా, బోధించకుండా మరియు అనేకులను మార్చకుండా నిరోధించబడలేదు. లేఖనాలు, పాపం చేసి, పశ్చాత్తాపపడి, క్రీస్తునందు విశ్వాసంతో ముందుకు సాగిన ఇతర శిష్యుల ఉదాహరణలతో నిండి ఉన్నాయి.

సాతాను ఎల్లప్పుడూ మీ తప్పులు పెరిగిపోతున్నాయని మరియు మీరు వాటిని ఎప్పటికీ అధిగమించలేరని మిమ్మల్ని నమ్మించడానికి ప్రయత్నిస్తాడు. అతని అబద్ధాలను పట్టించుకోకండి!

యువతుల ప్రధాన అధ్యక్షత్వములో మొదటి సలహాదారిణి అయిన సహోదరి తమారా డబ్ల్యు. రూనియా ఇలా బోధించారు: "మీరు దీన్ని వినాలి, కాబట్టి నేను ఈ మాటలు బిగ్గరగా చెబుతాను: ఈ హానికరమైన ఆలోచనలు మీ లోపలి నుండి రావు మరియు మీ తప్పుల ద్వారా మాత్రమే మిమ్మల్ని నిర్వచించలేము. మీరు కూడా దానిని బిగ్గరగా చెప్పాల్సి రావచ్చు. సాతానుతో, “ఈ రోజు కాదు” అని చెప్పండి. అతన్ని మీ వెనుకకు నెట్టండి.

ఆ ఆకర్షణను, మిమ్మల్ని మీ రక్షకుని వైపు మళ్లించే దైవచిత్తానుసారమైన దుఃఖాన్ని అనుభూతి చెందండి మరియు ఆయన కృప మీ జీవితంలోకి, మీరు ప్రేమించే వారి జీవితాల్లోకి ప్రవేశించడాన్ని చూడండి. మనం విరిగిన హృదయాన్ని ధైర్యంగా ఆయన వైపుకు తీసుకువచ్చిన క్షణంలో, ఆయన వెంటనే అక్కడ ఉంటారని నేను వాగ్దానం చేస్తున్నాను.”

ఈ ఈస్టరు సమయంలో, మీరు రక్షకుని ప్రాయశ్చిత్తం గురించి మరింత లోతుగా ధ్యానించినప్పుడు, పశ్చాత్తాపపడి మళ్లీ ప్రయత్నించే సామర్థ్యం మీరు ఎప్పటికీ పొందగలిగే గొప్ప బహుమతులలో ఒకటి అని గుర్తుంచుకోండి. యేసు క్రీస్తు కారణంగా, మీ అతి ఘోరమైన తప్పులు క్షమించబడి, భారీ గొలుసుల వలె తొలగించబడతాయి.

“క్రీస్తు ఎల్లప్పుడూ అవమానం అనే చీకటి కంటే ప్రకాశవంతంగా ఉంటారు,” అని సహోదరి రూనియా బోధించారు.

యేసు క్రీస్తు కారణంగా, మీరు ఆయనపై దృష్టి కేంద్రీకరించినప్పుడు, నిరీక్షణ ఎల్లప్పుడూ మీ ముందు ప్రకాశవంతంగా వెలుగుతుంది.