I muri a’e i tā ’outou mau hape—’oia ato’a te hape rahi

E ta’ata fa’ahiahia mau te ’āpōsetolo Petero i roto i te Faufa’a ’Āpī. E fa’aro’o tōna ’e te itoito ’ia haere nā ni’a i te pape ia Iesu ra, tēra rā tau taime ri’i i muri mai ’ua fa’ati’a ’oia i tōna mata’u ’ia nā ni’a a’e iāna ’e ’ua ha’amata i te paremo, ma te pi’i i te Fatu i te tauturu (hi’o Mataio 14:28–31). Noa atu ’aita tātou i ’ite maita’i i te mau ’ohipa ato’a o te orara’a o Petero, ’ua ’ite tātou ē, ’ua ta’i maramara ’oia i te tahi taime.

Tau hora noa hou Iesu Mesia ’a haruhia ai, ’ua tohu ’oia (Iesu) ē, e huna Petero iāna e toru taime hou te moa e ’ā’aoa ai e piti taime. ’Ua pāto’i Petero i te ti’aturi i taua tohura’a ra ’e « ’ua parau ’ū’ana roa mai ra rā ’oia, nā ’ō mai ra, pohe noa atu ā vau i ’ō na ia ’oe na, e ’ore roa vau e huna ia ’oe » (Mareko 14:31).

’Oia mau, ’ua tupu mau te tohura’a a te Fa’aora. Nō te ri’ari’a ’e te mata’u e ha’ati ra i te harura’ahia te Fa’aora, ’ua ’ō’ore te itoito o Petero iāna. I muri a’e i te hunara’a e piti taime ē ’ua mātau ’oia i te Fa’aora ’e i te fa’ahepora’ahia i te toru o te taime, « ’ua ’anatema ihora [Petero] i reira ra ma te tapu, nā ’ō atu ra, ’aore au i ’ite i tenā na ta’ata tā ’outou e parau na » (Mareko 14:71).

I te taime ’a ’ā’aoa ai te moa e piti taime ’e ’a ha’amana’o ai Petero i te tohura’a a te Fa’aora, « rahi roa atu ra [tōna] ’oto » (Mataio 26:75).

E ’ere rā te reira te hope’ara’a o tōna ’ā’amu !

Nā roto i te mau mea ato’a tā tātou e nehenehe e ’apo mai i roto i te mau pāpa’ira’a mo’a, ’aita fa’ahou te mau mata’u o Petero i nā ni’a a’e i tōna ’itera’a pāpū nō Iesu Mesia. ’Ua fa’a’ite pāpū ’oia ma te itoito nō ni’a i te Fa’aora i te mau taime ato’a, noa atu te huru o te ’ati tāna e fa’aruru. ’A ha’amana’o na, ’ua ha’api’i Petero i te hō’ē nūna’a ’o tei fa’asātauro iho nei ia Iesu Mesia ! E mea mau te ’ati.

’A fa’aora ai Petero i te hō’ē ta’ata piri’o’i mai tōna fānaura’ahia mai, ma te fa’aue atu iāna, « ’a ti’a ’oe i ni’a, ’a haere i te i’oa o lesu Mesia nō Nazareta » (Te ’ohipa 3:6), ’ua haruhia ’oia ’e ’o Ioane ’e ’ua uiuihia ’oia e mea nāhea ’oia i te ravera’a i te semeio.

’Ua pāhono atu Petero ma te itoito, « ’ia ’ite mai ’outou ato’a ’e te ta’ata ato’a o ’Īserā’ela nei ē, nō te i’oa o Iesu Mesia nō Nazareta, tā ’outou i fa’asātauro iho nei, ’o tei fa’ati’ahia e te Atua mai te pohe mai, nōna i ti’a atu ai teie nei ta’ata i mua i tō ’outou aro ma te ma’i ’ore nei.

« ’O te ’ōfa’i teie i fa’aru’ehia e ’outou e te feia patu fare, ’e ’ua riro iho nei ’ei ’ōfa’i ti’avā. ’Aore roa ho’i e ora ia vetahi ’ē, ’aita atu ho’i e i’oa e fa’a’itehia mai i te ta’ata i raro a’e i teie nei ra’i e ora ai te ta’ata nei » (Te ’ohipa 4:10–12).

’Auē ïa pāhonora’a itoito ! ’E e ha’apāpūra’a māramarama o tōna mau ti’aturira’a.

E hara tātou tāta’itahi i roto i teie orara’a. Noa atu tā tātou mau tauto’ora’a maita’i roa a’e, i te tahi mau taime e nehenehe tātou e ’ore e manuiā i tō tātou mau tīa’ira’a ’e tō tātou mau hina’aro. Mai tā te peresideni Jeffrey R. Holland (1940–2025), te peresideni nō te pupu nō te Tino ’Ahuru ma Piti ’āpōsetolo i ha’api’i i te hō’ē taime, « ta’a noa atu i tāna Tamaiti fānau tahi maita’i roa a’e, ’o te mau ta’ata hapehape ana’e tā te Atua e ’ohipa nei mai te ’ōmuara’a mai o te tau ».

’Aita tō ’outou faufa’a pae vārua i fa’ata’ahia ’aore rā i tā’ōti’ahia e tā ’outou mau hape—’oia ato’a te mau hape rahi ! Nō te mea ’ua tātarahapa ’oia ’e ’ua fa’a’ore te Mesia i tāna hara, ’aita te hunara’a Petero i te Mesia i ’ōpani iāna i muri iho ’ia fa’a’ite pāpū, ’ia ha’api’i, ’e ’ia fa’afāriu ma te mana rahi. ’Ua ’ī te mau pāpa’ira’a mo’a i te mau hi’ora’a o te tahi atu mau pipi ’o tei hara, ’o tei tātarahapa ’e ’o tei tāmau māite noa ma te fa’aro’o i te Mesia.

E tāmata noa Sātane i te ’ume mai ia ’outou ē, e rahi noa atu tā ’outou mau hape ’e e’ita roa atu e ti’a ia ’outou ’ia upo’oti’a i ni’a i te reira. ’Eiaha e ha’apa’o atu i tāna mau ha’avare !

’Ua ha’api’i te tuahine Tamara W. Runia, tauturu hō’ē i roto i te peresidenira’a rahi o te Feiā ’Āpī Tamāhine : « ’Ia fa’aro’o ’outou i teie parau e ti’a ai, nō reira, e parau atu vau i te reira parau ma te reo pūai : E ’ere ’outou i te reo i roto i tō ’outou upo’o, ’aore rā, te mau hape tā ’outou i rave. E ti’a ato’a paha ia ’outou ’ia parau ha’apūai i te reira. ’A parau atu ia Satane, ‘’eiaha i teie mahana’. ’A tu’u iāna i muri ia ’outou.

« ’Ia ’ite mai ’outou i taua ’umera’a ra, te ’oto hanahana ’o tē fāriu atu ia ’outou i tō ’outou Fa’aora, ’e ’a hi’o i tōna aroha ’ia tomo i roto i tō ’outou orara’a ’e i roto i te orara’a o te feiā tā ’outou i here. Tē parau fafau atu nei au ē, i te taime ’a fa’a’ite mai ai tātou iāna ma te itoito i te hō’ē ’ā’au ’oto, ’oi’oi roa tei reira ’oia ».

I teie tau Pāsa, ’a feruri ai ’outou ma te hōhonu a’e i te tāra’ehara a te Fa’aora, ’a ha’amana’o ē, te ’aravihi nō te tātarahapa ’e nō te tāmata fa’ahou ’o te hō’ē ïa o te mau hōro’a rahi roa a’e tā ’outou e nehenehe e fa’ari’i. Maoti Iesu Mesia, e nehenehe tā ’outou mau hape ’ino roa a’e e fa’a’orehia ’e i muri iho e fa’aru’ehia mai te mau fifi teiaha.

« E mea ’ana’ana noa a’e te Fa’aora i te pōiri o te ha’amā », ’ua ha’api’i te tuahine Runia.

Maoti Iesu Mesia, e nehenehe te tīa’ira’a e ’ana’ana noa ’a vai fa’atumu noa ai ’outou i ni’a iāna.