Mwurin Ahmw Sapwung kan—Pil Iangahki me Laud Kan

Wahnparon Piter wia aramas wadawad men nan Kadehde Kapw. E ahneki komwad oh pwoson en kak alu pohn sehdo kolahng rehn Sises, ahpw mwurin ansou kis e mweidehng ah masopwehk en powehdi ih oh ahpw tepda kihrla, ahpw pekipeki rehn Kauno en sewese (kilang Madiu 14:28–31). Mendahte atail sohte ese mengihtikpen en Piter ah mour ni unsek, kitail ese pak ehu me e sengisengloal.

Kisin awa kei mwohn arail pahn salihedi Sises Krais, E kohpada me Piter pahn kahmahmkihla Ih pak siluh mwohn maleko ah pahn kakeroht pahk riau. Piter sohte men kamehlele kokohpo oh “koasoain pohnmwahsohki me, I sohte mwahn pahn kahmahmki me I sehsei komwi, mehnda ma I pahn iang komwi pwoula” (Mark 14:31).

Mehlel, en Sounkomouro kokohpo pweidahr. Nan ansou kamasopwehk me kapil irailpene ansou me Sounkomouro pahn selidi, en Piter komwado pitiedi peinih. Mwurin ah kahmahmkilahr Sounkomouro pak riau, oh pil pwurehng kesilipak en ansou, Piter “tepda lokaia kehlail oh kahukihla, nda, I sehse aramas menen me kumwail ndindahn” (Mark 14:71).

Ansou me maleko kakeroht keriapak oh Piter tamandahr kokohp en Sounkomouro, “e … sengisengiloaliki” (Madiu 26:75).

Ahpw kaidehn keimwseklahn soaiepeho mwo!

Sang ni soahng koaros me kitail kak esehla nan pwuhk sarawi kan, en Piter masopwehk sohte pilehu powehdi ah kadehdepen Sises Krais. E kadehdehki Sounkomouro ansou koaros me e kak, mendahte kahpwal me kakete lelohng sang ni ah pahn wia met. Tamataman, Piter padpadahkehng irail akan me ahpwte kalohpwuihala Sises Krais! Keperpehu udahn mehlel.

Ansou me Piter kamwahuihala ohl emen me ipwikihdi mwator, ni ah kaweid ih, “Ni mwaren Sises Krais en Nasaret uhda oh alu”(Wiewia Kan 3:6), Ih oh Sohn ahpw selidi oh irail ahpw kapeidek ia mwomwen ah wia mwekid kopwuriamweiwo.

Piter sapeng ni inen, “Kumwail koaros oh pil mehn Israel kan koaros, sang ni manaman en mwaren Sises Krais, iei ih me kumwail kalohpwuwalahr, oh Koht ketin kaiasadahr sang mehla, oh ohl menet me kesikesihnen mwohmwail met mwahulahr mehlel sang ni manaman en mwaren Sises Krais.

“Takai me kumwail sounkou ihmw kan kesepwekelahr uhd wiahla takain pwukakeimw. Pil sohte komour nan ehu mwohmw tohrohr: pwe ihte mwahr wet me Koht ketkihong aramas akan, pwe en wia Sounkomourpatail nin sampah” (Wiewia kan 4:10–12).

Ia uwen kaselel en pasapeng wet! Oh wia kasansal mwahu pen ah koasoandi kan.

Kitail koaros pahn wiahda dihp nan mour wet. Mendahte atail kin songosong atail kak koaros, kitail udahn pahn kin sapwungala nan atail koapwoaroapwoar oh ineng kan nan ansou kan. Nin duwen Jeffrey R. Holland (1940–2025), Preseden en Pwihn en Wahnparon Ehk Riemeno, padahngkiher ansou ehu, “Likin Sapwellimen Koht Iehros Unseko, aramas sohte unsek kan te me Koht kin ketin sewese.”

Kesempwalpen palingenomw sohte kin kohsangete de koasoandi sangete ni ahmw sapwung kan—pil iangahki me laud kan! Pwehki en Piter ah koluhla oh Krais ketin mahkohng, ah kahmahmkihla Krais sohte kawuhdihsang ah kadehdehki ih ansou kei mwuri, padahngki, oh wekidala me tohto ki manaman laud. Pwuhk sarawi kan direki karasaras akan me pid irail sounidawehn Krais kan me dipada, koluhla, oh wenla mwohrail ni pwoson Krais.

Tepelo pahn ansou koaros song en pitihkinuhk me ahmw sapwung kan wie tohtohla oh ke sohte pahn kak powehdi koaros. Pohnsehse ah likamw kan!

Tamara W. Runia, Sounsawas Keieu nan Presedensi Lap en Peinakapw akan, padahngki: “Kumwail anahne rong met, eri ipahn nda lepin lokaia pwukat ni ngihl laud: Ke sohte wia ngihl me mih nan ahmw madamadau de sapwung kan me ke wiadahr kan. Ke mwein pil anahne nda mepwukat ni ngihl laud. Ndahng Tepelo, ‘Kaidehn rahnet.’ Manokehla tepelo.

“Kehn pepehm en, pahtou laud me kin wekiduhk ohng ahmw Sounkomouro, koh kilang Sapwellime mahk ah pahn pidelong nan ahmw mour oh iangahki kempoakepahm kan koaros. I inouki me ansouohte me kitail pahn wahdo atail mohngiong ohla kan ni sohte masopwehk Reh, E kin ansouohte awiawiher.”

Nan ansoun Ihster wet, ni ahmw pahn ahneki ansou mwahu en medewe mwahu Tomwpen Sounkomouro, tamataman me kisakis en kak koluhla oh pilehu song wia ehu kisakis keieu laud me ke kak alehdi. Pwehki Sises Krais, dipomw me keieu sakanakan kan kak ale mahkpe oh koskosla duehte sein toutou kei.

“Sounkomouro kin ansou koaros marainsang rotorot en dihp,” Sister Runia padahngki.

Pwehki Sises Krais, koapwoaroapwoar kak ansou koaros mie sang ni ahmw pahn kin mehleliongete Ih.