Ālkin Bōd eo Am̧—Jekdoon Bōd ko Reļļap

Rijjilōk Piter ekar juon armej ekabwilōn̄lōn̄ ilo Kallim̧ūr Ekāāl. Ekar ewōr an tōmak im peran n̄an etetal ioon dān n̄an Jisōs Kraist, jet iien tokālik ekar jino mijak, im ej jino an tulọk im e laṃōj im ba Irooj, Kwōn lọmọọren eō (lale Matu 14:28–31). Men̄e jejjab lukkuun jeļā kōn mour eo an Piter, jejeļā juon iien ekar meo̧ buruōn im lukkuun jan̄.

Jejjo̧ awa ko m̧okta jān aer kar bōke im kalbuuji, Ekar kanaan bwe Piter enaaj kaarmejete e jilu alen m̧okta jān an kako ikkūr ruo alen. Piter ekar makoko in tomāk ilo kanaan in im “ej kaḷapḷọk an ba, Eḷaññe Ij meje Eok, I jāmin kaarmejjete Eok ñan jidik” (Mark 14:31).

Aaet, kanaan eo an Rilo̧mo̧o̧r ekar m̧ool. Kōn mijak im poktak ilo iien raar bōk im kalbuuji Rilo̧mo̧o̧r, Piter ekar lukkun mijak im ebbweer. Ke em̧oj an kaarmejete Rilo̧mo̧o̧r ruo alen, im ke rekar bar kajjitōk ippān kein ke jilu alen, ejino an kajje im ba “I jaje armej in koṃij kōnono kake.(Mark 14:71).

Ke kako eo ej ikkūr ruo alen Piter ekar keememej kanaan eo an Rilo̧mo̧r, ekar … meo̧ buruōn im lukkuun jan̄ (Matu 26:75).

Ak ejjab jemļo̧kin bwebwenato eo an!

Ak jemaron̄ ekkatak jān jeje ko rekwojarjar bwe, mijak eo an Piter ekar jab anjo̧ ioon kam̧ool eo an kōn Jisōs Kraist. Ekar lukkuun kam̧ool kōn Jisōs Kraist iien otemjej, jekdo̧o̧n ekar kauwōtata n̄an e. Keememej, Piter ekar katakin ro me rekar debwāāle Jisōs Kraist. Ekar lukkuun kauwōtata.

Ke Piter ekar kemour juon armej e kūrro jān lọjien jinen, im jiron̄ e, “Ilo etan Jisōs, ri Nazeret, kwōn jutak im etal.” (Jerbal 3:6), raar jibwe erro Jon im kajjitōk ippāer ekōjkan an kōm̧m̧ane kabwilōn̄lōn̄ in.

Piter ekar uwaak, “Eṃṃan koṃwin otemjej jeḷā, kab armej in Israel otemjej, bwe ilo etan Jisōs Kraist Ri Nazeret, Eo koṃ ar debwāāl E, Eo Anij ear kajerkakpeje jān ro re mej, aet ilo E armej in ej jutak im mour iṃaan mejemi.

“E in ejṃaan eo, koṃ ri kal ar kajekdọọn E, eo eṃōj kōṃṃan E jabōn. Im mour ilo ejjeḷọk bar juon, bwe ejjeḷọk bar juon āt iuṃwin lañ, im letok ñan armej bwe jen mour ilo E” (Jerbal 4:10–12).

Ej juon uwaak eļap an em̧m̧an! Im juon kam̧ool eo ealikkar kōn kam̧ool eo an.

Kajjojo iaad jej jerawiwi ilo mour in. Jekdoon n̄e jej lukkuun tiljek, jenej baj wōt likjab jān ad kōjatdikdik im ad kōttōpar jān iien n̄an iien. Āinwōt Būreejtōn Jeffrey R. Holland (1940–2025), Būreejtōn eo an Doulul eo an Jon̄oulruo ro, kar ba juon iien, “Aolep armej ro Anij ekar jerbal ippāer ejjeļo̧k juon iaer ewānōk ijjeļo̧kin wōt Eo Nejin Emake Wōt.”

Aorōkin jetōb eo am̧ ejjab lōm̧ ak wōr jon̄an kōn bōd ko am̧—jekdoon bōd ko am̧ reļļap! Kōnke ekar ukweļo̧k im Kraist ekar joļo̧k an bōd, an Pita kar kaarmejet Kraist ekar jab bōbrae e jān an kar bar kam̧ool kōn kraist tokālik, katakin, im ukōt armej kōn kajoor eļap. Jeje ko rekwojarjar robrak kōn waanjon̄āk ko kōn rikaļoor ro jet ro rekar jerawiwi, rekar ukweļo̧k, im wōnm̧aanļo̧k wōt kōn tōmak ilo Kraist.

Setan enaaj kajjieon̄ aolep iien n̄an ukōt ļōmņak ne am̧ bwe kwon ļōmņak ke ej ļapļo̧k wōt bōd kane am̧ im bwe kojamin nej anjo̧ jāni. Kōjekdoon riab ko an!

Sister Tamara W. Runia, Rikakpilōklōk eo Kein Kajuon ilo Būreejtōnji eo Eutiej an Doulul eo an Jiron̄, ekar katakin: “Kwoj aikuj ron̄ menin, kōn menin inaaj buul ba naan kein: Kwojjab ainikien eo ilo bōram̧ ak bōd eo kwar kōm̧m̧ane. Komaron̄ bar aikuj lam̧ōj. Ba n̄an Setan, ‘Ejjab Rainin.’ Likūt e Itulikim.

“En̄jake men in ej dāpij kōj, burom̧ōj kōn bōd eo im ekōm̧m̧an bwe kwon oktaļo̧k n̄an Rilo̧mo̧o̧r, im lale an jouj eo An deļon̄e mour eo am̧ im mour ko an ro kwoj iakwe er. Ij kallim̧ur bwe iien eo wōt jej etal kōn bōro erub ilo peran n̄an E, E ekajju pojak ijeņ.”

Jijen in Ijtō in, ilo am̧ kejokļo̧kjeņ eļap kōn Pinmuur eo an Rilo̧mo̧o̧r, keememej bwe maron̄ n̄an ukweļo̧k im bar kajjieon̄ juon alen ej juon iaan menin letok ko reļļaptata komaron̄ bōke. Kōn Jisōs Kraist, bōd ko am̧ reļļaptata remaron̄ jakoļo̧k āinwōt jet jāin ko reddo.

“Rilo̧mo̧o̧r ej lukkuun kōmeramļo̧k jook ko an maroklep,” Sister Runia ekar katakin.

Kōn Jisōs Kraist, kōjatdikdik emaron̄ meram aolep iien ilo am̧ pād wōt ilo am̧ kalimjōk E.