Tukihn Tahfonglac Lom—Finne Ma Yohk Emet sac

Mwet Sap Peter el sie mwet ohi ke Wuhlweacng Sasuc. Oasr luhlahlfongi ac puhlaik lal in fahsr fin kof ah nuh yurin Jisus, tuhsruhk kihtin pacl tok ah el lwelah sahngeng lal ah in kuhtwanguhllah ac el muhtwacwacack in tili, ac el wowoyak nuh sin Leum in kahsrwel (liye Mattew 14:28–31). Ke kuht tiac etuh nohfohn ke moul lal Peter, kuht etuh ke pacl se el tuhng arulacna upac.

Ao ekahsr met liki sruhuh Jisus ah, El palye muh Peter elac lahfwekuhnuhl pacl tolu met liki won ah kahklah. Peter el sruhnga luhlahlfongi kain palye se “nga ac fah tiana fahk ouingan, nga finne wi kom misa, Nga fah tiana lahfwekin kom ke kutena ma” (Mark 14:31).

Ahok, palye luhn Mwet Lahngo eklac pwacye. Ke tuhninfong ac sahngeng apuhnlah sruhuh lun Mwet Lahngo ah, wacngihnlac puhlaik lal Peter ah. Tukihn el lahfwekihn pacl luo lah el tiac etuh ke Mwet Lahngo, ac ilucsyuck ke pacl ahktolu, Peter “el muhtwacwacack in lain ac fulwahk, fahk, nga tia etuh mwet se kowos kaskas kac an” (Mark 14:71).

Ke won sac kahklah pacl ahkluo ac Peter el esamwack palye luhn Mwet Lahngo, “el … tung arulana upa” (Matthew 26:75).

Tuhsruhk tiac pa ingacn sahflahiyen sramsram kacl uh!

Ke ma nuhkwewa kuht lotwelah ke ma suhmuhslah, sahngeng lal Peter tiac sifilpac kuhtwanglah luhlahlfongi lal ke Jisus Kraist. El puhlaik in fahkwack luhlahlfongi kuh ke Mwet Lahngo ke pacl fal nuhkwewa, finne ke fosrngah ke moul lal sifacna in oruh ohinge. Esamlah, Peter el tuh luti mwet ma tuhfahna unilyac Jisus Kraist ac! Mwe sensen ah pwacye.

Ke Peter el tuh unwelah sie mukul ul e kena el isuslac ah, fahk nuh sel, “Ke inen Jesus Christ lun Nazareth tuyak ac fahsr!” (Acts 3:6), el tuh sruhuh weluhl John ac siyuckyuck lah el oruh fuhkah mwenmwen sac.

Peter el puhlaik in topuk “Lela kowos nukewa in etu … ke inen Jesus Christ lun Nazareth, suc kowos tuh uniya fin sakseng, ac su God El akmoulyauk liki misa, … lah mwet se tu ye motowos inge.

“Pa inge eot se su mwet musa sisla, sikyak tuh pa inge eot se ma yohk sripa oemeet. El mukena pa oasr ku la in molela mwet uh: tu wangin sie ine saya su God El sang ku nu se, in molikutla” (Acts 4:10–12).

Fuhkah wolacnaiyacn top uh! Ac mwe ahkpwacye kahlwem ke luhlahlfongi kuh lal.

Kuht kais sie ac oruh ma koluk ke moul se inge. Kuht finne srihke kuhiyacsr, kuht ac fototolac ke mwe finsrak lasr ac kena lasr pacl nuhke pacl. Oacna ke Prestuhn Jeffrey R. Holland (1940–2025), Prestuhn luhn U luhn Mwet Sap Singucul Luo, luti sie pacl ah, “Sahyenna Wen Wolacna Nahtuhl, mwet tiac fas pa mwet ma God el orekmakihn uh.”

Yohk srihpac ke ma luhn nguhn yurum ac tiac ahkkuhtweyac kuh taran in te ahluhkwelah tahfonglac kom oraclah—finne ma yohk emet sac! Ke srihpen el auliyak ac Kraist El nuhnak muhnahs nuh sel, lahfwekihn lal Peter ke Kraist tiacna tulokihnilyac liki fahkwack Kacl tok, luti, ac eklac ke kuh luhlahp. Ma suhmuhslah sesseslah ke srihkasrak luhn mwet tuhma lutlut sahyac suc orekma koluk, auliyak, ac fahsr nuh met ke luhlahlfongi ke Kraist.

Satan elac srihke in oruh kom in luhlahlfongi lah tahfonglac lom an ac kap nuh lucng ac kom ac fah tiacna kuhtwanglah. Nimet lohacng nuhke kikiacp lal uh!

Tahmtahel Tamara W. Runia, Mwet Kahsruh Se Met ke Prestuhnsi luhn Muhtwacn Fuhsr, el luti: “Kom enenuh in lohng ma se inge, oruh nga ac fahk kahs inge in yohk: Tiac kom pa puhsra se insifom kuh tahfonglac ma kom tuh oraclah. Sahp kom enenuh in fahk pac in yohk. Fahk nuh sel Satan, ‘Tiac mihseng.’ Fihlilyac fintukum.

“Puhla ke ulul sac, ahsor ke ma furokkomlac nuh yurin Mwet Lahngo lom, ac liye luhngse Lal utyak nuh in moul lom ac moul luhn mwet kom luhngse. Nga olwelah lah mihnit sena kuht puhlaik in use inse muhsahllah se nuh Yohrohl, El sun acn we tari.”

Ke puhlan pacl in Istuh se inge, ke kom motko yohkna ke Iwaclah luhn Mwet Lahngo, esam lah kuh ke auliyak ac sulpac srihke pa sie mwe sang yohk emet kom ac kuh in eis. Ke srihpen Jisus Kraist, ma koluk upac emet lom kuh in eis nuhnak muhnahs kac ac sisyucklac oacna sein toasr uh.

“Mwet Lahngo El kahlwem ne tok likina lohsr ke mwekihn,” Tahmtahel Runia el tuh luti.

Ke srihpen Jisus Kraist, finsrak kuh in tohlwack acn metoh in kahlwem pacl nuhkwewa ke kom muhtana in El.