Kalpasan dagiti Biddutyo—Uray Dagiti Dadakkel a Biddut

Maysa a makaay-ayo a tao ni Apostol Pedro iti Baro a Tulag. Naaddaan iti pammati ken tured a magna iti rabaw ti danum nga agturong ken ni Jesus, ngem idi agangay impalubosna a parmeken isuna ti butengna ket nangrugi a lumned, a nangpukpukkaw iti Apo tapno agpatulong (kitaen iti Mateo 14:28–31). Idinto a ditayo ammo amin a detalye ti biag ni Pedro, ammotayo ti maysa a gundaway a nagsangit isuna iti nasaem.

Sumagmamano nga oras laeng sakbay ti pannakatiliw ni Jesucristo, impadtona nga ilibakto ni Pedro Isuna iti mamitlo a gundaway sakbay ti panagtaraok iti mamindua ti maysa a kawitan. Nagkedked ni Pedro a mamati iti kasta a padto ket “sipapasnek nga insungbatna, No matayak a mairaman kenka, pulos a dikanto paglikudan” (Marcos 14:31).

Siempre, pimmudno ti padto ti Mangisalakan. Babaen iti buteng ken amak a naipalawlaw iti pannakatiliw ti Mangisalakan, naawanan iti tured ni Pedro. Kalpasan ti panangilibakna iti mamindua a gundaway nga am-ammona ti Mangisalakan, ken iti panangibagana iti mamitlo a gundaway, ni Pedro “nangrugi nga agilunod ken agsapata, a kunkunana, Diak am-ammo dayta a tao nga ibagbagayo” (Marcos 14:71).

Idi nagtaraok ti kawitan iti mamindua nalagip ni Pedro ti padto ti Mangisalakan, "isu … nagsangit iti nasaem" (Mateo 26:75).

Ngem saan a dayta ti gibus ti estoriana!

Babaen iti amin makasursurotayo kadagiti nasantuan a kasuratan, dagiti buteng ni Pedro saanto pulos mangrimbaw iti pammaneknekna maipapan ken ni Jesucristo. Situtured a nagpaneknek maipapan iti Mangisalakan iti tunggal gundaway, ania man ti bukod a pagpeggadan iti panangaramidna iti daytoy. Laglagipen, mangisursuro ni Pedro iti tattao a nangilansa iti nabiit ken ni Jesucristo iti krus! Pudno ti peggad.

idi inagasan ni Pedro ti pilay a lalaki manipud pay idi nayanak, a nangbilbilin kenkuana, "Iti nagan ni Jesucristo ti Nazaret tumakder ket magnaka” (Dagiti Aramid 3:6), natiliw a kaduana ni Juan ket napagsaludsodan no kasano nga inaramidna daytoy a milagro.

Situtured nga insungbat ni Pedro, “Rebbengyo amin nga ammuen, kasta met dagiti amin a tattao ti Israel, a babaen ti nagan ni Jesucristo a taga Nazaret, isu nga inlansayo iti krus, ngem pinagungar ti Dios manipud kadagiti natay, uray babaen kenkuana nga agtakder daytoy a tao ditoy iti sangoyo a naimbagan.

“Daytoy ti bato nga imbellengyo dakayo nga agpatpatakder, nagbalin a kangrunaan a bato. Isu laeng ti pakasarakantayo iti pannakaisalakan: awan sabali a nagan nga inted ti Dios kadagiti tao a mabalin a pakaisalakanan" (Dagiti Aramid 4:10–12).

Anian a natured a sungbat! Ken ti nalawag a pakakitaan dagiti kombiksionna.

Agbasol ti tunggal maysa kadatayo ditoy a biag. iti baet dagiti nagaed unay a panagkagumaantayo, agkurangtayo kadagiti namnama ken panggeptayo sagpaminsan. Kas iti naminsan nga insuro ni Presidente Jeffrey R. Holland (1940–2025), Presidente ti Korum dagiti Sangapulo-ket-dua nga Apostol, “Malaksid iti kasasaad ti naan-anay a Bugbugtongna nga Anak, dagiti saan a naan-anay a tao ket addaan pay aramid ti Dios kadakuada amin.”

Saan a mailadawan wenno limitado ti naespirituan a pategtayo babaen dagiti biddutyo--uray dagiti dadakkel a biddut! Gapu ta nagbabawi isuna ken pinakawan ni Cristo, ti panangilibak ni Pedro ken ni Jesus ket saan a nanglapped kenkuana iti panangpaneknek, panangisuro ken pannakapasurotna iti agangay nga addaan iti naidaklan a bileg. Napnuan dagiti nasantuan a kasuratan kadagiti pagarigan dagiti dadduma pay a disipulo a nagbasol, nagbabawi, ken nagtultuloy nga addaan pammati ken ni Cristo.

Kanayonto a gandaten ti Satanas ti mangkumbinsi kadakayo a dagiti biddutyo ket manayonan ken dikayto kaano man kabaelan ti mangparmek kadagitoy. Diyo ikankano dagiti kinaulbodna.

Insuro ni Sister Tamara W. Runia, Umuna a Mamagbaga iti Panguluen ti Young Women: “Nasken a mangngeganyo daytoy, isu a sawek dagitoy a balikas iti napigsa: Saan a dakayo ti timek iti uloyo wenno dagiti biddut nga inaramidyo. Mabalinyo met a kasapulanyo nga isao dayta iti napigsa. Ibagayo ken ni Satanas, ’Saan nga ita.’ Ikabilyo iti likudanyo.

“Riknaenyo dayta a guyod, ti nadiosan a ladingit a mangiturong kadakayo iti Mangisalakanyo, ket siputanyo ti paraburna a sumrek iti biagyo ken iti biag dagiti ay-ayatenyo. Ikarik nga iti kanito a mangyegtayo iti maysa nga agladladingit a situtured iti Mangisalakan, adda a dagus Isuna sadiay.”

Daytoy a panawen ti Paskua ti Panagungar, bayat ti panangutobyo a naan-anay iti Pannubbot ti Mangisalakan, laglagipen a ti kabaelan nga agbabawi ken mangpadas manen ket ti maysa a kaindaklanan a sagut a maawatyo. Gapu ken ni Jesucristo, mapakawan dagiti kadakkelan a biddutyo ket kalpasanna maibellengda a kas napuskol a kadena.

“Agnanayon a naranraniag ti Mangisalakan ngem iti kinalidem ti panagbain,” insuro ni Sister Runiia.

Gapu ken ni Jesucristo, umun-una a makapagraniag ti namnama a narayrayray bayat ti panangtalinaedyo a nakapokus Kenkuana.