Zaj Lus hauv For the Strength of Youth Txhua Hli, Plaub Hlis Ntuj 2026
Tom Qab Koj Yuam Kev—Twb Yog tej Yam Loj Thiab
Peb kawm tau ntau yam los ntawm tus Thwj Tim Petus hais txog tus Cawm Seej, Nws txoj Kev Theej Txhoj, thiab sim ua dua ib zaug ntxiv.
Petus Tsis Lees Paub, los ntawm Carl Bloch
Peb feem coob muaj ib yam peb tau ua thiab nco txog uas kheev lam peb tsis nco qab txog tau. Txawm tias yog ib lub sij hawm uas txaj muag heev, ib qho kev sib tsoo uas mob heev, los yog ib qho kev sib cav uas koj hais tej lo lus uas kheev lam koj tsis tau hais, yeej muaj ntau lub sij hawm hauv peb lub neej uas kheev lam peb “rov qab ua” tau los yog tiag tiag ib qho nias tau kom “lwv tawm” yuav zoo kawg.
Kev Muaj Raws Li tej Lus Qhia Yam Yuav Muaj Los uas Iab Heev
Tus Thwj Tim Petus yeej yog ib tug neeg ntxim nyiam hauv Phau Tshiab. Nws muaj siab ntseeg thiab siab loj mus kev saum dej mus rau Yexus, tiam sis tom qab ntawd nws txawm ntshai thiab pib tog mus, nqua hu rau tus Tswv cev tes pab nws (saib Mathais 14:28–31). Txawm tias peb tsis paub txhua yam txog Petus lub neej los, peb paub txog ib zaug thaum nws quaj ntau.
Ob peb teev ua ntej Yexus Khetos raug ntes, Nws hais raug Petus hais tias Petus yuav tsis lees paub Nws peb zaug ua ntej qaib qua ob zaug. Petus tsis kam ntseeg hais tias yuav muaj li ntawd thiab “teb tawv qhawv hais tias, Txawm yog kuv yuav nrog koj tuag los kuv yuav tsis hais tias kuv tsis paub koj ib zaug li” (Malakaus 14:31).
Ham tsis, qhov uas tus Cawm Seej qhia tias yuav muaj txawm muaj tiag. Vim txaus ntshai heev thaum tus Cawm Seej raug ntes, Petus poob siab tsis ua siab loj. Tom qab uas nws tsis lees paub tus Cawm Seej ob zaug, thiab luag nug nws zaum thib peb, Petus “txawm twv hais tias, Kuv tsis paub tus txiv neej uas nej hais ntawd.” (Malakaus 14:71).
Thaum tus qaib qua zaum thib ob thiab Petus nco qab qhov uas tus Cawm Seej hais ntawd, “nws … quaj tu siab kawg li” (Mathais 26:75).
Tiam sis nws zaj dab neeg tsis xaus li ntawd!
Mus Dhau Ces Kaum Tsev, Mus Ib Txhis Li
Raws li peb nyeem hauv cov vaj lug kub, Petus tej kev ntshai yeej tsis kov yeej nws zaj lus tim khawv txog Yexus Khetos dua ib zaug ntxiv. Nws ua siab loj ua tim khawv txog tus Cawm Seej txhua lub sij hawm, txawm tias nws pheej hmoov ua li ntawd. Nco qab ntsoov hais tias, Petus tab tom qhia ib haiv neeg uas tau muab Yexus Khetos ntsia saum ntoo khaub lig. Yeej muaj xwm txheej tiag.
Thaum Petus kho ib tug neeg uas ceg tawv txij thaum nws yug los, Petus txib tus ntawd hais tias, “Kuv tuav Yexus Khetos tuaj Naxales tuaj lub npe hais rau koj hais tias koj cia li sawv thiab mus kev” (Tes Hauj Lwm 3:6), ces nws thiab Yauhas txawm raug ntes thiab lawv noog nws saib nws ua li cas ua tau qhov txuj ci tseem ceeb no.
Petus ua siab loj teb lawv hais tias, “Yog nej nug li ntawd, kuv teb rau nej thiab cov Ixayees sawv daws hais tias twb yog Yexus tus uas yog neeg Naxales ua rau tus txiv neej uas sawv tab meeg nej no zoo ntag. Yexus yog tus uas nej muab ntsia rau saum tus ntoo khaub lig, tiam sis Vajtswv twb tsa nws sawv hauv qhov tuag rov qab los lawm.
“Yexus yog tus uas Vajtswv Txoj Lus qhia tseg hais tias, Lub Pob Zeb uas cov kws ua tsev muab pov tseg, nim no twb muab lub ntawd los ua lub thawj lawm. Tsis muaj leej twg cawm tau peb dim peb lub txim, tsuas yog Yexus tib leeg xwb thiaj cawm tau; tsis muaj dua lwm tus uas Vajtswv tso los cawm peb neeg ntiaj teb kom peb dim peb lub txim.” (Tes Hauj Lwm 4:10–12).
Nws teb yam muaj siab loj heev! Thiab tsam no yog puav pheej meej meej hais tias nws ntseeg tiag.
Tub Qhe Tsis Zoo Tag Nrho, Tiam Sis Muaj Peev Xwm Pab Zoo Tag Nrho
Peb txhua tus yuav poob ua txhaum hauv lub neej no. Txawm tias peb sim ua zoo, peb yuav poob qee zaum thiab ncav tsis cuag peb txoj kev cia siab thiab lub siab xav. Ib yam li Thawj Tswj Hwm Jeffrey R. Holland (1940–2025), Thawj Tswj Hwm ntawm Pawg Kaum Ob tug Thwj Tim, hais ib zaug hais tias, “Tsuas yog Nws Tib Leeg Tub uas zoo tag nrho xwb, Vajtswv tsuas siv tau cov neeg tsis zoo tag nrho xwb.”
Koj tej kev yuam kev—twb yog cov loj thiab—tsis hais txog qhov uas koj muaj nqi ntawm sab ntsuj plig. Vim nws hloov siab lees txim thiab Khetos zam txim pub rau nws, qhov uas Petus tsis lees paub Khetos tsis tab kaum nws es tom qab no nws muaj hwj chim ua tim khawv, qhia, thiab pab tib neeg hloov siab. Cov vaj lug kub muaj ntau zaj lus piv txwv hais txog lwm cov thwj tim uas poob ua txhaum, hloov siab lees txim, thiab mus tom ntej muaj siab ntseeg rau ntawm Khetos.
Ntxwg Nyoog yeej yuav sim qhia koj hais tias koj tej kev yuam kev sib tshooj thiab koj yeej yuav tsis muaj peev xwm kov yeej tej kev yuam kev ntawd. Tsis txhob ntseeg nws tej lus dag ntawd!
Muam Tamara W. Runia, tus Pab Cuam Thib Ib hauv Koom Haum Ntxhais Hluas Pawg Tuam Thawj Tswj Hwm, tau qhia hais tias: “Nej yuav tsum hnov qhov no, ces kuv yuav hais tej lus no nrov: Nej tsis yog lub suab hauv nej lub hlwb los sis nej tej kev txhaum. Tej zaum nej yuav tsum hais qhov ntawd nrov thiab. Cia li hais rau Dab Ntxwg Nyoog tias, ‘Tsis yog hnub no.’ Hais kom nws khiav mus.
“Cia li hnov kev tu siab uas rub nej kom tig mus rau tus Cawm Seej, thiab saib Nws txoj kev tshav ntuj nkag rau hauv nej lub neej thiab lub neej ntawm cov neeg uas nej hlub. Kuv cog lus tias tib lub sij hawm uas peb coj peb lub siab mob mus rau Nws, ces tam sim ntawd Nws nyob ntawd.”
Christus Consolator, los ntawm Carl Bloch
Hnub Tom Ntej Yeej Zoo
Lub Caij Easter no, thaum koj xav ntau dua txog tus Cawm Seej txoj Kev Theej Txhoj, nco qab ntsoov hais tias lub cib fim hloov siab lees txim thiab sim dua ib zaug ntxiv yog lub txiaj ntsim zoo kawg nkaus uas koj txais tau. Vim yog Yexus Khetos, koj txais kev zam txim tau rau koj tej kev yuam kev thiab hle tau tej saw hlau hnyav.
“Tus Cawm Seej yeej ci ntsa iab dua qhov tsaus ntuj ntawm kev poob ntsej muag,” Muam Runia tau qhia.
Vim yog Yexus Khetos, txoj kev cia siab yeej los ci ntsa iab tom hauv ntej thaum koj tsom ntsoov Nws.
© 2026 los ntawm Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, April 2026. Hmong. 20064 295