Pagkatapos sang Imo mga Kasaypanan—Bisan ang Dalagko nga Kasaypanan

Si Apostoles Pedro isa ka makawiwili nga tawo sa Bag-ong Katipan. May pagtuo sia kag kaisog nga maglakat sa ibabaw sang tubig padulong kay Jesus, pero ginutlo lang pagkatapos, gintugotan niya ang iya kahadlok nga magpangibabaw kag nag-amat nga maglugdang, nga nagapangayo sang tabang sa Ginuo (tan-awa sa Mateo 14:28–31). Bisan wala naton mabal-i ang tanan nga detalye sang kabuhi ni Pedro, nahibal-an naton ang isa ka tion nga naghibi sia sing todo-todo.

Inoras lamang antes gindakop si Jesucristo, nagpropesiya Sia nga ipanghiwala Sia ni Pedro sing tatlo ka beses antes magpamalo ang sulog nga manok sing duha ka beses. Indi magpati si Pedro sa sini nga propesiya kag “nagsabat nga may pagpamilit kag sa mabaskog nga tingog, “Indi gid ako magpanghiwala sa imo, bisan pa nga patyon ako upod sa imo!” (Marcos 14:31).

Siyempre, nagmatuod ang propesiya sang Manluluwas. Upod sa kapintas kag kahadlok sa pagdakop sa Manluluwas, gintalawan si Pedro. Pagkatapos nga ipanghiwala nga kilala niya ang Manluluwas sing duha ka beses, kag napwersahan nga magsabat sa ikatatlo ka beses, si Pedro “nagsugod sa pagpanuloy kag sa pagsumpa, “Wala ako makakilala sining tawo nga inyo ginahambal” (Marcos 14:71).

Sang magpamalo ang manok sing ikaduha ka beses kag nadumduman ni Pedro ang propesiya sang Manluluwas, “naghilibion sia” (Mateo 26:75).

Pero indi pa ina ang katapusan sang iya nga istorya!

Suno sa tanan naton nga matun-an sa balaan nga kasulatan, ang kahadlok ni Pedro wala na gid nagpangibabaw sa iya testimonya kay Jesucristo. Maisog sia nga nagpamatuod sa Manluluwas sa tagsa ka oportunidad, bisan may personal nga risgo ang paghimo niya sini. Tandai, ang gintudloan ni Pedro amo ang katawhan nga bag-o lang nagpalansang kay Jesucristo! Matuodtuod gid ang peligro.

Sang gin-ayo ni Pedro ang tawo nga piang halin sang pagkabata, nga ginasugo sia nga, “Sa ngalan ni Jesucristo nga taga-Nazaret, tindog ka kag maglakat” (Mga Binuhatan 3:6), gindakop sia upod ni Juan kag gin-usisa kon paano niya ginhimo ini nga milagro.

Maisog si Pedro nga nagsabat, “Dapat mahibaluan ninyo tanan kag sang bug-os nga katawhan sang Israel, nga ini nga tawo nga nagatindog diri sa inyo atubang, nag-ayo sa gahum sang ngalan ni Jesucristo nga taga-Nazaret, nga inyo ginlansang sa krus kag ginbanhaw sang Dios.

“Si Jesus amo ang ginatumod sang kasulatan: ‘Ang bato nga ginsikway ninyo nga mga manunokod nanginpamakod nga bato. Ang kaluwasan maagom paagi sa iya lamang, kay wala na sing iban nga ngalan sa bug-os nga kalibutan nga ginhatag sang Dios sa mga tawo nga makaluwas sa aton” (Mga Binuhatan 4:10–12).

Daw ano kaisog nga sabat! Kag klaro nga ebidensya sang iya ginapatihan.

Ang kada isa sa aton makasala gid sa sining kabuhi. Bisan ano naton ka pagtinguha, kada tion-tion nagakabos kita sa aton mga ginalauman kag katuyuan. Sa gintudlo sadto ni Pangulong Jeffrey R. Holland (1940–2025), Presidente sang Korum sang Dose ka Apostoles, “Magluwas sa kaso sang nagaisahanon Niya nga perpekto nga Bugtong nga Anak, indi perpekto lang gid nga mga tawo ang kaupod sang Dios sa trabaho.”

Ang espiritwal mo nga bili wala nabase ukon ginalimitahan sang imo mga kasaypanan—bisan sang dalagko nga mga kasaypanan! Tungod naghinulsol sia kag ginpatawad ni Cristo, ang pagpanghiwala ni Pedro kay Cristo wala nagpugong sa iya sang ulihi nga magpamatuod, magtudlo, kag maghaylo nga may dako nga gahum. Ang balaan nga kasulatan puno sang mga ehemplo sang iban pa nga mga disipulo nga nakasala, naghinulsol, kag nagpadayon nga may pagtuo kay Cristo.

Si Satanas magakumbinsir gid sa imo pirme nga ang imo mga kasaypanan nagasupot kag indi mo na ini malampuwasan. Indi pagsapaka ang iya mga kabutigan!

Si Sister Tamara W. Runia, Unang Manuglaygay sa Young Women General Presidency, nagtudlo: “Kinahanglan ninyo ini nga mabatian, gani ihambal ko ini sing mabaskog: Indi ikaw ang tingug sa imo ulo ukon ang mga sala nga imo nahimo. Basi kinahanglan mo man ina ihambal sing mabaskog. Hambala si Satanas, ‘Indi subong.’ Ibutang sia sa likod mo.

“Pamatyagi inang panawagan, ang diosnon nga kasubo nga nagaliso sa imo nga magdangop sa imo Manluluwas, kag tan-awa ang Iya grasya nga magsulod sa imo kabuhi kag sa mga kabuhi sang imo mga pinalangga. Ginapromisa ko nga sa oras nga maisog naton nga dalhon ang nagakasubo naton nga tagipusuon sa Iya, ara Sia gilayon.”

Sining panahon sang Paskwa sang Pagkabanhaw, samtang ginabinagbinag mo sing maayo ang Pagbayad-Sala sang Manluluwas, dumduma nga ang ikasarang sa paghinulsol kag pagtinguha liwat isa sang pinakadako nga mga regalo nga pwede mo mabaton. Tungod kay Jesucristo, ang pinakalala mo nga kasaypanan pwede mapatawad kag mapahigad pareho sang mabug-at nga mga kadena.

“Ang Manluluwas wala katubtuban nga mas masanag sangsa kadulom sang kahuy-anan,” gintudlo ni Sister Runia.

Tungod kay Jesucristo, masanag pirme nga magasilak ang paglaum samtang padayon ka nga nagatutok sa Iya.