I mwiin Am Kaairua—E Ngae Ngke a Bubura

Te Abotoro ae Betero bon te aomata ae kakaongora taekana n te Nu Tetemanti Iai ana onimaki ao n ninikoria n nakonako i aon taari nakon Iesu, ma n te tai ae aki maan i mwiina ao e kariaia ma ni katokanikaia te maaku i aona ao e a moanna n iinako, e tang nakon te Uea ni bubuti ibukin buokana (taraa Mataio 14:28-31). Ngkai ti aki ataa rongorongon maiun Betero ni kabane, ti ataa teuana te tai ngke e korakai n tang.

Tabeua te aoa i mwaain katikan Iesu Kristo, E taetae ni burabetiia ae Betero e na kaakeaa teniua te tai i mwaain ae kauoua tangira te moa. E rawa Betero ni kakoaua te taetae ni burabeti ae aron anne ma e kakorakora riki ana taeka, Ngkana tao I mate ma ngkoe, ao I bon aki kaakeako" (Mareko 14:31).

E koaua, e koro bukin ana taetae ni burabeti te Tia Kamaiu. Ma te nakonnano ao te maaku n aron katikan te Tia Kamaiu, e a bwaka Betero n arona n ninikoria. I mwiin are ngke e kaakeaa ao n ataa te Tia Kamaiu te kauoua n tai, ao n namakina te nanokawaki te kateniua n tai, Betero "e karereanti ma n tuea, ao e kangai, I aki kina te aomata are kam atongnga" (Mareko 14:7).

Ngke e tang te moa te kauoua n tai ao e uringa ana taetae ni burabeti te Tia Kamaiu Betero, “e … tang ni korakai“ (Mataio 26:75).

Ma tiaki anne tokin karakinana!

Ni koauana ti kona n reiakinaki ni booki aika tabu, maakun Betero e aki manga kakeaa ana kakoaua iroun Iesu Kristo. E kakoaua te Tia Kamaiu ma te ninikoria n taai nako, e aki kakawaki bwa tera te mwakuri ae karaoaki. Uringnga, e angareirei Betero nakoia aomata ake a tibwa tia ni taura Iesu Kristo i aon te kaibangaki! E a bon riki te kangaanga.

Ngke e kamarurunga te mwaane ae mwauku man bungiakina Betero, e tuangnga, "Ko na nakonako n aran Iesu Kristo are te I Natareta" (Mwakuri 3:6), e katikaki n ikotaki ma Ioane ao n titiraki bwa e kanga ni karaoa te kakai aei.

E kaeka Betero ma te ninikoria, "Kam na bane n ataia ma aomata aika Iteraera ni kabaneia, ba e tei ni maiu teuaei n aran Iesu Kristo are te I Natareta, are kam kamatea n te kaibangaki, are e a manga kautia te Atua mai buakoia mate, eng e tei ni maiu i matami.

"Boni ngaia te atibu are e kakeaki bongana iroumi ngkami aika taan katei maneaba, are e riki ni bouan te maninganinga. Bon akea te kamaiu iroun temanna: bwa bon akea te ara teuana i ani karawa ae a anganaki aomata, ae ti kona ni kamaiuaki iai bwa ti te Ara aei” (Mwakuri 4:10–12).

Bon te kaeka ae rangi ninikoria! Ao te kakoaua ae itiaki n ana onimaki.

Ngaira n tatabemaniira nako ti na rinanon te bure n te maiu aei. N aki tabe ma ara konabwai aika a rangi n tamaroa, ti na bon kabwaka n ara kantaninga ao nanora n te tai teuana ma teuana. N aron ae reirei n tetaina Beretitenti Jeffrey R. Holland (1940--2025), te Beretitenti n te Kooram n Abotoro n te Tengaun ma Uoman, "Ma tii man ana mwakuri Natina ae Kororaoi ae te Rikitemanna, aomata aika aki tau bon ana aomata te Atua ni kabane aika e na mwakuri mangaiia."

Kakawakim n te maiu n tamnei e aki warekaki ke tianaki man am kairua—e ngae ngke a bubura! Ibukina bwa e raira nanona ao e kabwaraaki ana bure iroun Kristo, kakeaan Kristo iroun Betero e aki tuukia man ana kakoaua, angareirei, ao te rairaki ma te mwaaka ae korakora. A onrake booki aika tabu n taian banna ni katooto ibukiia reirei ake tabeman ake a bure, a rairi nanoia, ao a waakinako ma te onimaki iroun Kristo.

N tainako ao e kataia Tatan n anaa nanom ae a ikoiko am bure ao ko na bon aki kona n tokanikai i aoia. Tai ongo n ana kewe!

Titita Tamara W. Runia, te Moan Kauntira n te Beretitentii n te Bootaki n Ataeinnaine, e reirei: “Ko riai n ongo aei, ngaia are N na taekin taeka aikai n takarua: Tiaki ngkoe te bwanaa i atuum ke kaairua ake ko karaoi. Ko riai n taekina anne n takarua naba. Tuanga Tatan, ’Tiaki n te bong aei.’ Kaaki i akuum.

“Namakina te katikitiki anne, e bitiko te nanokawaki n atua nakon am Tia Kamaiu, ao taraa ana akoi n rin ni maium ao ni maiuia naake ko tangiriia. I berita bwa te miniti are ti uota te aomata ae uruaki nanona ma te ninikoria Nakoina, E bon mena ikanne n te tai naba anne."

N te Itita aei, ngkai ko iangoa raoi ana Mwakuri ni Kamaiu te Tia Kamaiu, uringnga bwa te konabwai n rairannano ao ni kataia riki bon teuana ibuakon te bwaintituaraoi ae korakora ae ko kona ni karekea. Ibukin Iesu Kristo, am kaairua aika moan te kakaiaki a kona ni kabwaraaki ao i mwiina karenakoi n aron te tiein.

“Akea tokin otamwakan te Tia Kamaiu nakon te rotongtong ae kamaemae,“ e reirei Titita Runia.

Ibukin Iesu Kristo, e kona n otamwaaka te kantaninga n tainako ngkai ko kabanea nanom i aona.