Mwirin Om kewe Muan—Pwan mwo ekkewe Mi Watte

Ewe Aposel Peter i emon aramas mi amwarar me non ewe Testament Sofo. A wor ren ewe nuku me pwaracho ne fetan won konik ngeni Jises, ekis chok fansoun mwirin i a mut ngeni an nuokus epwe akkufu i me poputa ne kokotiw, a sio ngeni ewe Samon ren aninis (nengeni Matthew 14:28–31). Inamo pwe sise sinei unusen tichikin manauen Peter, kich mi sinei eu fansoun nupwen a fokkun kechiw chapur.

Fitu chok awa me mwen Jises epwe kanapus, A osini pwe Peter epwe amam I unungat fansoun me mwen oruwen kokkon chuko. Peter a fangeta an epwe nuku ena sokkun osini me “ponuweni non pochokun, ‘Usap tongeni era ena sokkun, ina mo ika upwe fituk ne mano” (Mark 14:31).

Ewer, an ewe Chon Amanau oisini a punguno. Fiti ewe noninen me nuokus fansoun an ewe Chon Amanau a kanapus, an Peter pwaracho a turuseni. Mwirin an a fen amamam pwe i mi sisinei ewe Chon Amanau fan ru, me a echimw non ewe anunungatin fansoun, Peter a era “Ua akkopon pwe ngang ua kapas ennet! … Use sinei ena mwan oua kapas usun” (Mark 14:71).

Nupwen ewe chuko a kokko fan ru me Peter a chechemeni an ewe Chon Amanau we osini, “a fokkun kechiw chaper” (Matthew 26:75).

Nge esap ina nesoponon porousan!

Seni mettoch meinisin sia tongeni kaeo me non ekkewe pukefel, an Peter nuokus ese tongeni chiwen atano an kapasen pwarata usun Jises Kraist. A pwaracho ne pwarata usun ewe Chon Amanau iteiten fansoun, ese nifinifin ika mwo epwe feiengaw ren an fori. Chechemeni, Peter a osukuna eu aramas ekkewe ra keran chok irapengesieno Jises Kraist! Ewe feiengaw mi ennet.

Nupwen Peter a echikara emon mwan mi mwok seni an uputiw, a annuku i, “Fan iten Jises Kraist ewe re Nazareth ua erenuk kopwe uta o fetan” (Foffor 3:6), i a kanapus fengen me John me angei kapaseis ifa usun i a fori ei manaman.

Peter a pwaracho ne ponuweni, “Iwe ami meninisin oupwe sinei o chon Israel meinisin repwe pwan sinei, pwe ei mwan mi uta ikei mwemi a unusen pochokun pokiten manamanen iten Jises Kraist ewe re Nazareth, ewe oua irapengesieno nge Kot a amanauata seni mano.

“Ewe fau ami sou-kau imw oua poutano, iei a winiti ew fau a auchea seni meinisin. Aramas repwe kuna manau ren i chok, pun God ese ngeni aramasen fonufan pwan ew it a tongeni amanau kich” (Foffor 4:10–12).

Met ren eu ponuwan mi uren pwaracho! Me eu fatochun pwarata usun an nuku.

Emon me emon kich epwe tipis non ei manau. Inamo ren ach wesen achocho, sipwe tur seni ach epinukunuk me mochen seni fansoun me fansoun. Usun Preseten Jeffrey R. Holland (1940–2025), Presetenin ewe Mwichen ekkewe Engon me Ruemon Aposel, a osukuna fan eu, “Tiwenon chok usun met a fis ngeni Noun we chok Anamon mi unusoch, aramas rese unusoch ir unusen ekkewe Kot a angang rer.”

Aucheaom non ngun ese kapunguno ika kouk me ren om kewe muan—pwan mwo ekkewe mi watte! Pokiten i a aier me Kraist a omusano i, an Peter amam Kraist ese eppeti i mwirinon an epwe pwarata, osukun, me siwini aramas ren watten manaman. Ekkewe pukefel mi uren kapas awewe usun ekkoch chon kuno ra fen tipis, aier, me soposopono ren nuku non Kraist.

Setan epwe chok akachocho ne echimwok pwe om kewe muan ra chok kapacheta me kosap tongeni akkurur. Epinengaw seni an chofona!

Sister Tamara W. Runia, Aemonun Chon Aninis non ewe Presetenin Ekkewe Fopun Unus, a osukuna: “Mi namot oupwe rongorong ei, iwe upwe neuomong ne apasa ekkei kapas: Esap en ewe mongungu non mokurom ika ekkewe muan ka fen forir. Mi namot kopwe pwan neuomowng ne apasa ena. Ureni Setan, ‘Esap ikenai.’ Onomu i nukunupwom.

“Mefi ena pochokun, ewe netipechou a feito seni Kot a akunuk ngeni om Chon Amanau, me katon An chen a tonong non manauom me manauen ekkewe en mi tonger. Ua pwon pwe ewe minich sia pwaracho ne wato eu netipechou ngeni I, I mi mwirtir epwe nom ikewe.”

Ei fansoun Easter, nupwen ka kon ekipwichi ochu an ewe Chon Amanau Achasefen, chechemeni pwe ewe tufichin aier me sossot sefan ina eu me nein ekkewe watten niffang ka tongeni angei. Pokiten Jises Kraist, om kewe muan mi kon ngaw ra tongeni musono me katuruno usun choun sein.

“Ewe Chon Amanau mi saramaram feinfeino nap seni ewe rochopwaken saw,” Sister Runia a fen aitikich.

Pokiten Jises Kraist, epinukunuk mi tongeni epwe chok sasaram me mwan nupwen ka chok anonga I.