Afta long ol Mistek blong Yu—Iven ol Bigfala Wan

Aposol Pita i wan intresting man long NiuTesteman. Hem i gat fet mo strong tingting blong wokbaot long wota i go fored long Jisas, be sam taem afta hem i letem ol fraet blong hem oli winim hem mo i stat blong draon, i stap singaot i go long Lod from help (luk longMatiu 14:28–31). Yumi no save evri ditel blong laef blong Pita, be yumi save se wan taem hem i krae from bigfala harem nogud.

Sam aoa nomo bifo oli arestem Jisas Kraes, Hem i profesae se Pita bae i talem se i no save Hem tri taem bifo faol i singaot nambatu taem. Pita i no wantem bilivim wan profesi olsem mo i "talem strong se, sapos olgeta i wantem blong kilim ded mi wetem be bambae mi no save talem se mi no save yu" (Mak 14:31).

Mo yes, profesi blong Sevya i kamtru. Wetem ol fraet we i stap taem oli arestem Sevya, strong tingting ia blong Pita i stap lus sloslo. Afta we hem i talem se hem i no save Sevya tu taem, mo oli askem hem bakegen nambatri taem, Pita "i mekem strong tok, i talem se, mi mi no save man ia we yufala i stap talem"(Mak 14:71).

Taem we faol i singaot nambatu taem mo Pita i tingbaot profesi ia blong Sevya, "hem i harem nogud tumas, nao i krae (Matiu 26:75).

!Be hemia i no en blong stori blong hem!

Yumi lanem tru long ol skrija se, ol fraet blong Pita oli nomo winim testemoni blong hem abaot Jisas Kraes bakegen. Hem i testifae strong abaot Sevya long evri janis we hem i gat, nomata sapos hemia i putum hem long denja. !Tingbaot se Pita i stap tijim ol pipol we i bin kilim Jisas Krae i ded! I tru se bae laef blong hem i stap long denja.

Taem Pita i hilim wan man we i no save wokbaot stat long taem we hem i bon i kam, i talem long hem, "Long nem blong Jisas Kraes, man Nasaret, mi mi talem long yu, yu girap, yu wokabaot" (Ol Wok 3:6), oli arestem hem wetem Jon mo oli askem hem olsem wanem hem i mekem merikel ia.

Pita i talem strong se, "oraet, yufala evriwan i mas save samting ia. Mo olgeta laen blong Isrel tu oli mas save. Man ia i stap stanap long fes blong yufala, we leg blong hem i gud finis, long paoa blong nem blong Jisas Kraes, man Nasaret. Hemia Jisas ia we yufala i nilim hem long kros, nao hem i ded, be God i mekem hem i laef bakegen.

"Hemia i pos ia we yufala man blong wokem haos, yufala i sakem finis, naoia hem i kam nambawan pos blong haos. Mo i nogat wan narafala man nating we i save sevem yumi, from we olbaot long wol ia, God i no givim nem blong wan narafala man nating long yumi, we hem i stap yusum blong sevem yumi" (Ol Wok 4:10–12).

!Hemia i wan ansa we i fulap wetem strong tingting! Mo wan klia pruf blong strong tingting blong hem.

Wanwan long yumi bae i mekem sin long laef ia. Nomata long ol bigfala hadwok blong yumi, bae ol hop blong yumi i go daon mo ol samting we yumi stap wet from bae i no save hapen folem tingting blong yumi. Olsem Presiden Jeffrey R. Holland (1940–2025), Presiden blong Kworom blong Olgeta Twelef Aposol, i bin tijim wan taem se, “God i stap wok nomo wetem ol man we oli no stret evriwan, mo hemia i no inkludum Pikinini blong Hem we i stret evriwan mo we Hem i Lavem Tumas.”

!Ol mistek blong yu oli no mekem valiu blong yu long saed blong spirit i go daon—iven ol bigfala wan! From se hem i sakem sin mo Kraes i fogivim hem, fasin blong Pita we i talem se i no save Kraes i no stopem hem afta blong testifae, tij, mo jenisim ol laef wetem bigfala paoa. Ol skripja oli fulap long ol eksampol blong ol nara disaepol we oli mekem sin, oli sakem sin, mo oli gohed wetem fet long Kraes.

Setan bae i traem oltaem blong winim tingting blong yu se ol mistek blong yu oli stap kam antap mo se bae yu neva save winim olgeta. !No tekem not long ol giaman blong hem!

Sista Tamara W. Runia, Fas Kaonsela long Yang Woman Jeneral Presidensi i tijim: “Yu nid blong harem hemia, nao bae mi talemaot laod: Yu yu no voes ia long hed blong yu o ol mistek we yu mekem. Maet yu tu bae yu nid blong talemaot hemia laod. Talem long Setan, ’Bae i no tedei.’ Putum hem bihaen long yu.

“Filim paoa ia we i pulum yu, harem nogud ia we i tanem yu i go long Sevya blong yu, mo wajem taem sore blong Hem i kam insaed long laef blong yu mo long laef blong olgeta we yu lavem. Mi promes se taem we yumi tekem wan hat we i brok i kam long Hem wetem strong tingting, wantaem nomo Hem i stap ia.”

Long Ista sisen ia, taem yu stap tingting hevi moa fulwan long Atonmen blong Sevya, tingbaot se paoa blong sakem sin mo fasin blong traem bakegen i wan long ol bigfala presen we yu save kasem. Tru long Jisas Kraes, yumi save kasem fogivnes mo sakemaot ol rop blong ol bigfala mo rabis mistek blong yu.

“Laet blong Sevya i oltaem bigwan bitim tudak blong sem,” Sista Runia i tijim.

Tru long Jisas Kraes, laet blong hop i save saen bigwan long fored blong yumi taem yumi lukluk nomo long Hem.