Padahk en Sounpwung kan Ong Kakehlepen me Pwulopwul Kan Mahs 2026
Eksodus 12
Atail Pahsohpa—Kamadipw Sarawio
Mie iralaud ieu me kakonepene nanpwungen Pahsohpa en kawaho oh atail kamadipw sarawi en wihk koaros.
Mahlen kan sang Alyssa Gonzalez
Mwohn mehn Israel en kawaho kak kohkohsang arail wie ladu nan Isip, kaweid kohieng irail en peikiong soangen kaweid kei sang Kauno pwe meninkauo en kak mweid irailla, de daulih irail (kilang Eksodus 12). Mwurin arail kohkohsang Isip, mehn Israel kan kin kawawih kamadipw ieu ehu ehu pahr, kahdaniki Pahsohpa, pwe irail en tamataman ia mwomwen Kauno ah kapitala Sapwellime aramas en inou kan.
Nan keimwseklahn wihk en Sapwellime mour pohn sampah, Sises Krais ketier ni mwengehn Pahsohpa ieu. Met kitail kahdaniki ansoun mwenge wo ni Keimwseklahn Koanoato. Sounkomouro doadoahngki ansouo pwe en kapehse tiahk sarawi en kamadipw sarawi, me met kitail kin patehng nan wihk koaros. (Kilang Madiu 26:26–28; Luk 22:19–20; Doctrine and Covenants 20:77, 79.)
Met iei riau mehkot me kowpurupwurieng nanpwungen keioun Pahsohpao, sapwellimen Kauno Keimwseklahn Koanoato, oh kamadipw sarawi en rahn pwukat me kak sewese kitail tamataman atail kepitipitla sang Sounkomouro.
Pilawaho
Pahsohpa: Erein rahn isuh, mehn Israewl kan kang pilawa sohte dol ihs (me kin mwadang en wiawihda oh sohte keh kiteila).
Keimwseklahn Koanoato Sises Krais kapaiada oh pilingpeseng pilawa sohte dol ihs en Pahsohpao, oh E ketkihong pilawaho sapwellime tohnpadahk ko. E mahsanihong irail en alehda ni arail tamaniki Sapwellime war, me E ketin mwahngih me ansou keren pahn ohla oh pahn mehla ahpw pahn pwurehng iasada.
Kamadipw sarawi: Kitail kin alehda pilawa pwe en tamaniki paliweren Sises Krais.
Sises Krais iei Pilawa en Komour. Sang ni Sapwellime Iasadaho, kitail koaros pahn iasada ki paliwar me unsek, sohte samin, oh sohte kak pwurehng mehla. E kin ketin kapitkitaillsang mehla.
Nta en Sihmpwuhlo
Pahsohpa: Sihmpwul en Pahsohpaho iei sihpw wol men me unsek, oh mahki sounpar ehu. E kamakamalahr, oh ntahu kohpenehr nan pwohl ehu. Isop (tehn tuhke ieu) koduhdier nan pwohlo oh kihpesengehr ntahu ni wenihmw en ihmwo. Met iei kilelen masliki me kasalehda sapwellimen Kauno aramas en inouo me tohnleng en kauo pahn daulih pwe irail en pitilahsang arail sensel nan Isip.
Keimwseklahn Koanoato: Sises Krais ketin doadoahngki wain pwe en wia weliepen Sapwellime nta. E mahseniong irail ehu nim pwe en tamataman Sapwellime nta, me pahn kerekihdi ong irail ong mahkepen diparail akan oh me wia kisehn inou sarawi kapw ehu.
Kamadipw Sarawi: Kitail kin nim pihl pwe kitail en tamatamanki ntahn Sises Krais.
Sises Krais iei Sihmpwul en Koht. Sapwellime ntaho keredier ni Ah ketin lokolongkiher dipatail kan oh atail Sapwellime nta—Sapwellime tohnmetei—kin kamwakellei kitailda. E kin ketin kapitakitaillsang dihp.
© 2026 by Intellectual Reserve, Inc. All rights reserved. Ntingda nan USA. Kamanamanla ong ni Lokaiahn wai: 6/19. Kamanamanohng kawehwehdi: 6/19. Kawehwepen Monthly For the Strength of Youth Message, March 2025.Pohnpeian19284 885