Ang Aton Pascua (Passover)—ang Sakramento

Ni David A. Edwards

Mga Magasin sang Simbahan

May ara sang kinaandan nga koneksyon sa tunga sang dumaan nga Pascua kag sang aton semanal nga sakramento.

Antes makabiya ang dumaan nga mga Israelnon sa ila pagkaulipon sa Egipto, ginpangabay sila nga tumanon ang partikular nga mga instruksyon halin sa Ginuo agud nga ang manuglaglag nga anghel magluwas sa ila, ukon maglabay sa ila (tan-awa sa Exodo 12). Paghalin nila sa Egipto, ang mga Israelnon nagasaulog sang isa ka piesta kada tuig, nga ginatawag Pascua, sa pagdumdum kon paano ginluwas sang Ginuo ang Iya katawhan sang kasugtanan.

Sa hingapusan nga semana sang Iya dutan-on nga kabuhi, si Jesucristo ara sa panyapon sang Pascua. Ginatawag naton ina karon nga pagkaon nga Katapusan nga Panihapon. Gingamit sang Manluluwas ina nga okasyon sa pagpakilala sang ordinansa sang sakramento, nga sa karon aton ginapartisiparan kada semana. (Tan-awa sa Mateo 26:26–28; Lucas 22:19–20; Doktrina kag mga Kasugtanan 20:77, 79.)

Ari ang duha ka pareho nga koneksyon sa tunga sang Pascua, sang Katapusan nga Panihapon sang Ginuo, kag sa karon nga sakramento nga makabulig sa aton nga dumdumon ang kaluwasan paagi sa Manluluwas.

Ang Tinapay

Pascua (Passover): Sa pito ka adlaw, ang mga Israelnon nagkaon sang tinapay nga wala sing tapay [pampahabok] (nga mas madasig himuon kag indi madali agup-upon kag madunot).

Katapusan nga Panihapon: Gintipiktipik kag ginbendisyonan ni Jesurcristo ang tinapay sang Pascua nga wala sing tapay, kag Iya ini ginpanagtag sa mga disipulo. Ginsilingan Niya sila nga kaunon ini sa pagdumdum sa Iya lawas, sa diin nahibal-an Niya nga sa indi madugay maguba kag mapatay apang magabangon liwat.

Sakramento: Nagakaon kita sang tinapay sa pagdumdum sa lawas ni Jesucristo.

Si Jesucristo amo ang Tinapay sang Kabuhi. Paagi sa Iya Pagkabanhaw, kita tanan mabanhaw nga may perpekto, di-madinulunton, imortal nga mga lawas. Pagaluwason Niya kita halin sa kamatayon.

Ang Dugo sang Cordero

Pascua (Passover): Ang cordero sang Pascua wala sing dagta, isa ka tuig nga lalaki nga karnero. Ginpatay ini, kag ang dugo sini ginsalod sa isa ka yahong. Ang hisopo (isa ka hilamon) gintusmog sa yahong kag gingamit sa paglapta sang dugo sa palibot sang naguwa nga puwertahan sang balay. Amo ini ang panggwa nga senyales nga makilal-an ang katawhan-sang-kasugtanan sang Ginuo nga pagalabyan sang manuglaglag nga anghel para maluwas sila halin sa pagkaulipon sa Egipto.

Katapusan nga Panihapon: si Jesucristo naggamit sang alak sa pagrepresentar sang Iya dugo. Ginsilingan Niya ang Iya mga disipulo nga imnon ini sa pagdumdum sang Iya dugo, nga igapaagay para sa ila para sa kapatawaran sang mga sala kag bilang bahin sang bag-o nga kasugtanan.

Sakramento: Nagainom kita sang tubig sa pagdumdum sang dugo ni Jesuristo.

Si Jesucristo ang Cordero sang Dios. Ang Iya dugo ginpaagay sang Iya gin-antos ang aton mga sala kag mga kaluyahon. Ang Iya dugo—ang Iya sakripisyo—nagatinlo sa aton. Ginaluwas Niya kita halin sa mga sala.

© 2026 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, March 2026. Hiligaynon. 19936 861