Bosoom bosoom Ma Mbabun Enya Ahoɔdzen Amandzɛɛbɔ, Ebɔw 2026
Exodus 12
Hɛn Apaho—Sacrament no
Tsetse Apaho afe na hɛn dapɛn dapɛn sacrament no dza ɔsɛ wɔ mu.
Alyssa Tallent yɛɛ nsaano mfonyin no
Ansaana tsetse Israelfo no botum efi hɔn nkowaasom mu wɔ Egypt no, wɔkãe kyerɛɛ hɔn dɛ wondzi ahyɛdze pɔkyee a ofi Ewuradze hɔ no do ama bɔfo a ɔyɛ ɔsɛɛfo no dze efir hɔn, anaa wɔapa hɔn ho (hwɛ Exodus 12). Wofii Egypt ekyir no, Israelfo no dzii afahyɛ afe biara, wɔfrɛɛ no Apaho, dɛ wɔdze kaa mbrɛ Ewuradze gyee N’ahyɛmu mba.
Dapɛn no a No ɔnnkyebo somdwuma rokɔ ewiei no, nna Jesus Christ wɔ Apaho edzidzi ase. Seseiara yɛfrɛ no Edzidzi a Odzi Ewiei. Agyenkwa no duaa dɛm dwumadzi no do dze sacrament ayɛdze no too gua, a sesei yɛdze hɛnho hyɛ mu dapɛn biara. (Hwɛ Matthew 26:26-28; Luke22:19-20; Nkyerɛkyerɛ na Ahyɛmudzi 20:77, 79.)
Iyinom nye su ebien a wɔsɛ a ɔwɔ Apaho a odzi kan no, Ewuradze ne Edzidzi a Odzi Ewiei no, na ndɛ sacrament a ɔboa hɛn ma yɛkaa hɛn ɔgye a ɔnam Agyenkwa no do baa no.
Paanoo no
Apaho Nda esuon no, Israelfo dzii epitsi boodoo (a ne yɛ kɔ ntsɛm na ɔmmbɔ etur na ɔnnsɛɛ ntsɛm).
Edzidzi a Odzi Ewiei Jesus Christ hyiraa na obubuu Apaho epitsi boodoo, na ɔdze maa N’esuafo no. Ɔkãa kyerɛ hɔn dɛ wondzi mfa nkaa Ne nyimpadua, a Onyim dɛ ɔrennkyɛr obobubu na oewu naaso ɔbɛsan asɔr bio.
Sacrament: Yedzi paanoo no dze kaa Jesus Christ ne nyimpadua.
Jesus Christ nye Nkwa Boodoo no. Ɔnam No wusoɛr do, hɛn nyinara dze bɛkyebo honandua a odzi mu, na ɔmmprɔw bɔsoɛr. Ɔgye hɛn fi owu mu.
Eguambaa no Bɔgyaa no
Apaho: Nna Apaho eguambaa no yɛ dza onndzi dzɛm, onyin a oedzi afrenhyia. Wokum no, na wɔgye no bɔgya wɔ tow bi mu. Wɔdze Hyssop (ahaban) hyɛ tow no mu na wɔdze tserɛw bɔgyaa no wɔ fie mpondua no ho. Iyi nye baguamu nsɛnkyerɛdze a ɔkyerɛ Ewuradze n’ahyɛmu mba no a ɔsɛɛ bɔfo no bɛpa hɔn ho ama wɔaagye hɔn efi Egypt nkowaasom mu.
Edzidzi a Odzi Ewiei Jesus Christ dze wenyin gyinaa hɔ maa No bɔgyaa. Ɔkãa kyerɛɛ N’esuafo dɛ wɔnnom mfa nkaa No bɔgyaa, a obekyi ama hɔn ama woeenya bɔnfakyɛ na dɛ ɔka ahyɛmudzi fofor ho no.
Sacrament: Yɛnom nsu no dze kaa Jesus Christ no bɔgyaa.
Jesus Christ nye Nyankopɔn N’Eguambaa no. Okyii bɔgya ber a Ohun amandze maa hɛn bɔn na mberɛwyɛ ahorow. No bɔgyaa—N’Afɔrbɔ—tsew hɛn ho. Ɔgye hɛn fi bɔn mu.
© 2026 Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛasee ngye ntomu: 6/19. Monthly For the Strength of Youth Message, March 2026 ne nkyerɛasee.. Fante. 19936 502