Maandelikse Vir die Krag van die Jeug-boodskap, Maart 2026
Exodus 12
Ons Pasga—die Nagmaal
Daar is ʼn gemeenskaplike draad tussen die antieke Pasga en ons weeklikse nagmaal.
Illustrasies deur Alyssa Tallent
Voordat die antieke Israeliete hul slawerny in Egipte kon verlaat, is hulle gevra om spesifieke instruksies van die Here te gehoorsaam sodat die verderwer hulle sou spaar, of verby hulle sou gaan (sien Exodus 12). Nadat hulle Egipte verlaat het, het die Israeliete elke jaar ʼn fees gehou, die Pasga genoem, om te onthou hoe die Here sy verbondsvolk verlos het.
Gedurende die laaste week van sy sterflike lewe was Jesus Christus by ʼn Pasga-ete. Ons noem daardie maaltyd nou die Laaste Avondmaal. Die Saligmaker het daardie geleentheid gebruik om die ordinansie van die nagmaal in te stel, waaraan ons nou elke week deelneem. (Sien Matthéüs 26:26–28; Lukas 22:19–20; Leer en Verbonde 20:77, 79.)
Hier is twee algemene drade tussen die eerste Pasga, die Here se Laaste Avondmaal, en vandag se nagmaal wat ons kan help om ons bevryding deur die Saligmaker te onthou.
Die Brood
Pasga: Vir sewe dae het die Israeliete ongesuurde brood geëet (wat vinniger gemaak kan word en minder geneig is tot skimmel en ontbinding).
Laaste Avondmaal: Jesus Christus het die ongesuurde brood van die Pasga geseën en gebreek, en Hy het dit aan die dissipels gegee. Hy het vir hulle gesê om dit te eet ter herinnering aan sy liggaam, wat Hy geweet het binnekort sou breek en sou sterf, maar weer sou opstaan.
Nagmaal: Ons eet brood ter herinnering aan Jesus Christus se liggaam.
Jesus Christus is die Brood van die Lewe. Deur sy Opstanding sal ons almal met volmaakte, onverganklike, onsterflike liggame opgewek word. Hy red ons van die dood.
Die Bloed van die Lam
Pasga: Die Pasga-lam was sonder gebrek, ʼn jaaroud-rammetjie. Dit is doodgemaak, en sy bloed is in ʼn bak versamel. Hisop (ʼn krui) is in die bak gedoop en gebruik om die bloed rondom die deurraam van die huis te stryk. Dit was die uiterlike teken wat die Here se verbondsvolk aangedui het om deur die verderwer verbygegaan te word sodat hulle uit slawerny in Egipte bevry kon word.
Laaste Avondmaal: Jesus Christus het wyn gebruik om sy bloed te verteenwoordig. Hy het vir sy dissipels gesê om dit te drink ter herinnering aan sy bloed, wat vir hulle gestort sou word vir die vergifnis van sondes en as deel van ʼn nuwe verbond.
Nagmaal: Ons drink water ter herinnering aan Jesus Christus se bloed.
Jesus Christus is die Lam van God. Sy bloed is vergiet terwyl Hy vir ons sondes en gebreke gely het. Sy bloed—sy offerande—reinig ons. Hy verlos ons van die sonde.
© 2026 deur Intellectual Reserve, Inc. All rights reserved. Gedruk in die VSA. Engelse goedkeuring: 6/19. Vertalingsgoedkeuring: 6/19. Vertaling van Monthly For the Strength of Youth Message, March 2026. Afrikaans. 19936 501