UMyalezo wangenyanga Okwenzelwe Ukomeleza uLutsha, EyoMdumba 2026
Ufuna Ukonwaba Ngakumbi? Zama Umbulelo
Xa ubomi bakho buzele ziinguqu, umbulelo unokukunceda ugxile kwizinto ezintle kwaye uhlale unethemba.
Imizobo nguMaggie Stephenson
“Awusoze wonwabe ngaphezu kokuba unombulelo.”
Njengoko esi sicatshulwa esivela kuMdala uGary B. Sabin wamaShumi asixhenxe sisitsho, indlela onoyolo ngayo ichaphazeleka ngokuthe ngqo yindlela onombulelo ngayo. Kuyavakala—xa unombulelo, ugxila kwizinto ezintle endaweni yezinto ezingalunganga.
Sekunjalo, ubomi abuhlali buhamba njengoko bucebiwe. Iinguqu ezingalindelekanga zinokukwenza uxinzeleke, udane, okanye ukhathazeke kunokuba wonwabe. Kodwa xa izinto zinzima, umbulelo unokukunceda uhlale unethemba. Zama ezi ndlela zintathu zokuzisa umbulelo ongakumbi ebomini bakho.
1. Khangela Okuhle
Amaxesha amaninzi, kuba nzima ukuba nombulelo xa uziva ngathi kukho into oswele yona. Kodwa zeziphi iintsikelelo onokuthi uzilibale xa ugxila koko ongenako kunoko unako?
Njengoko ukhangela okuhle ebomini bakho, ngokuhamba kwexesha kuya kuba lula ngakumbi ukukufumana.
2. Bonisa Umbulelo kuLowo Unikayo
Xa ubala iintsikelelo zakho, musa ukulibala apho zivela khona.
Ukubulela uBawo waseZulwini ngezipho zaKhe—kuquka isipho soNyana waKhe—kunokwenza nzulu uthando lwakho nokholo lwakho kuYe. UMongameli D. Todd Christofferson, uMcebisi weSibini kuBongameli bokuQala, kananjalo ucacisile, “Ukuva nokubonisa umbulelo kuThixo … kuzalisa ukunqula ngomoya wokuhlaziywa kovuyo,” okukuzisela uvuyo namandla kwaye kuncede ubungqina bakho buhlale buqinile.
3. Gxila kwiCwebo likaBawo waseZulwini
Ngokuqinisekileyo, ukuba nombulelo akuthethi ukungahoyi izinto ezinzima ebomini okanye ukuhlala wonwabile ngalo lonke ixesha. KwanoYesu Krestu waziva waza wazivuma iintlungu (bona Alma 7:11; IMfundiso neMinqophiso 19:18–19). Usizi yinxalenye eqhelekileyo yobomi basemhlabeni.
Kodwa nokuba kwenzeka ntoni, into enye ayitshintshi: icebo lenceba likaBawo waseZulwini. Lonke usizi nentlungu oyivayo ebomini ziya kulungiswa ngenxa kaYesu Krestu neNtlawulelo yaKhe (bona IsiTyhilelo 21:4).
UMdala uDieter F. Uchtdorf weQumrhu labaPostile abaLishumi elineSibini wachaza wathi: “Ukuba nombulelo ngamaxesha oxinzelelo akutsho ukuba siyayonwabela imeko esikuyo. Kodwa kuthetha ukuba ngamehlo okholo sijonga ngaphaya kwemingeni yethu yangoku.”
© 2026 ngu Intellectual Reserve, Inc. All rights reserved. Ishicilelwe eMelika. Imvume yesiNgesi: 6/19. Imvume yenguqulelo: 6/19. Inguqulelo ye Monthly For the Strength of Youth Message, Eyomdumba 2026.. Xhosa. 19935 774