Parau poro’i tā’āva’e Nō te pūai o te feiā ’āpī, Fepuare 2026
Hina’aro ’ia ’oa’oa atu ā ? Tāmata i te ’ā’au mēhara
’Ia ’ī tō ’outou orara’a i te mau tauira’a, e nehenehe te mēhara e tauturu ia ’outou ’ia rōtahi i ni’a i te maita’i ’e ’ia vai noa te tīa’ira’a.
Fa’ahōho’ara’a nā Maggie Stephenson
« E’ita roa atu tō ’outou ’oa’oa e hau atu i tō ’outou māuruuru. »
Mai tā teie fa’ahitira’a a Elder Gary B. Sabin nō te Hitu ’Ahuru e parau nei, te rahi o tō ’outou ’oa’oa nō roto mai ïa i tō ’outou fāito māuruuru. Tē aura’a ra—’ia māuruuru ana’e ’outou, tē rōtahi ra ïa ’outou i ni’a i te mau mea maita’i ’eiaha rā te mau mea ’ino.
Noa atu ā, ’e’ita te orara’a e tere mai tei fa’anahohia. E nehenehe te mau tauira’a mana’o-’ore-hia e fa’atupu i te urupu’upu’u, i te ’oto ’e i te ’ino’ino, hau atu i te ’oa’oa. ’Ia fifi ana’e rā te mau mea, e nehenehe te ’ā’au mēhara e tauturu ia ’outou ’ia vai noa te tīa’ira’a. ’A tāmata i teie nā rāve’a e toru nō te fa’atupu i te ’ā’au mēhara rahi a’e i roto i tō ’outou orara’a.
1. ’Imi i te maita’i
Mea pinepine, e mea fifi roa te ’ā’au mēhara mai te mea ē, tē mana’o ra ’outou ē, tē ’ere ra ’outou i te hō’ē mea. Terā rā, e aha te mau ha’amaita’ira’a tā ’outou e hi’o maita’i ra nā roto i te ha’atumura’a i ni’a te mau mea aita ’outou i fa’ari’i ’eiaha rā i ni’a i tā ’outou e fāri’i ra ?
’A ’imi ai ’outou i te maita’i i roto i tō ’outou orara’a, i te roara’a o te tau, e ’ōhie mai te reira ’ia ’ite.
2. Fa’a’ite i te ’ā’au mēhara i tei Hōro’a
’Ia tai’o ana’e ’outou i tā ’outou mau ha’amaita’ira’a, ’eiaha e ha’amo’e nō hea mai te reira.
E nehenehe te ha’amāuruurura’a i te Metua i te ao ra nō tāna mau hōro’a—tae noa atu i te hōro’a nō tāna Tamaiti—e fa’ahōhonu i tō ’outou here ’e tō ’outou fa’aro’o iāna ra. ’Ua fa’ata’a ato’a mai te peresideni D. Todd Christofferson, tauturu piti i roto i te Peresidenira’a Mātāmua : « Te putapūra’a ’e te fa’a’itera’a i te māuruuru i te Atua, ’o te mea […] ïa e ha’apuru ai i te ha’amori i te tahi mana’o fa’a’āpīra’a ’oa’oa », ma te hōpoi mai i te ’oa’oa ’e i te pūai ’e ma te tauturu i tō ’outou ’itera’a pāpū ’ia pāruru-noa-hia.
3. Rōtahi i ni’a i te fa’anahora’a a te Metua i te ao ra
Mea pāpū maitai, ’aita te ’ā’au mēhara e tāu’a ’ore i te mau fifi i roto i te orara’a ’e ’aore rā ’aita te mana’o ’oa’oa i te mau taime ato’a. ’Ua fa’ari’i ato’a ’o Iesu Mesia ’e ’ua fā’i ho’i i te māuiui (hi’o Alama 7:11 ; Te Ha’api’ira’a Tumu ’e te mau Fafaura’a 19:18–19). Te ’oto e tuha’a iho ā te reira nō te tāhuti nei.
Noa atu ā te mea, ’e’ita roa atu te hō’ē mea e taui : Te fa’anahora’a nō te aroha a te Metua i te ao ra. Te mau ’oto ato’a ’e te mau māuiui tā ’outou e fa’aruru nei i roto i te orara’a, e fa’atītī’aifarohia ïa maoti ’o Iesu Mesia ’e tāna tāra’ehara (hi’o Apokalupo 21:4).
’Ua parau ’o Elder Dieter F. Uchtdorf nō te pupu nō te Tino ’Ahuru Ma Piti ’āpōsetolo : « Te fa’a’itera’a i te māuruuru i roto i te taime pe’ape’a e ’ere ïa nō tō tātou māuruuru i tō tātou huru orara’a. Tōna aura’a maori rā, nā roto i te mata o te fa’aro’o e hi’o tātou i’ō atu i tō tātou mau fifi nō teie taime. »
© 2025 nā Intellectual Reserve, Inc. Fatura’a pāruruhia. Nene’ihia i te fenua Marite. Parau fa’ati’a nō te reo Peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly For the Strength of Youth Message, February 2026. Tahitian. 19935 895