ပိုပြီးပျော်ရွှင်ချင်ပါသလား။ ကျေးဇူးတင်ကြည့်ပါ

မကြာခဏဆိုသလို၊ သင်သည် တစ်စုံတစ်ရာ ချို့တဲ့နေသည်ဟုခံစားရသောအခါ ကျေးဇူးတင်စိတ်ရှိဖို့ရန် အခက်ခဲဆုံးဖြစ်နေတတ်ပါသည်။ သို့သော် သင့်မှာ ရှိ သည့်အရာထက် သင့်မှာမရှိသည့်အရာကို အာရုံစိုက်ခြင်းအားဖြင့် သင်သည် မည်သည့်ကောင်းချီးများကို လျစ်လျူရှုမိနိုင်ပါသနည်း။

သင့်ဘဝရှိ ကောင်းသောအရာများကို သင်ရှာဖွေသည့်အခါ၊ အချိန်ကြာလာသည်နှင့်အမျှ ရှာဖွေရန် ပိုမိုလွယ်ကူလာပါလိမ့်မည်။

သင်၏ကောင်းချီးများကို သင်ရေတွက်သောအခါ၊ ၎င်းတို့မည်သည့်နေရာမှလာကြောင်းကို မမေ့ပါနှင့်။

ကောင်းကင်ဘုံရှင်အဘအား—သူ၏သားတော်ဆုကျေးဇူးအပါအဝင်—သူ၏ဆုကျေးဇူးများအတွက် ကျေးဇူးတင်ခြင်းသည် သူ့အတွက် သင်၏ချစ်ခြင်းမေတ္တာနှင့်သူ၌ယုံကြည်ခြင်းကို နက်ရှိုင်းစေနိုင်ပါသည်။ ပထမဥက္ကဋ္ဌအဖွဲ့၏ဒုတိယအတိုင်ပင်ခံဖြစ်သူ၊ ဥက္ကဋ္ဌ ဒီ၊ တော့ဒ် ခရစ္စတိုဖာဆန် ကလည်း ရှင်းပြခဲ့သည်မှာ၊ “ဘုရားသခင်အားကျေးဇူးတင်မှုကို ခံစားခြင်းနှင့်ဖော်ပြခြင်းက … ဝတ်ပြုကိုးကွယ်ခြင်းကို ဝမ်းမြောက်ဖွယ်ခံစားချက်အသစ်နဲ့ အသက်သွင်းပေးပါတယ်”၊ ၎င်းသည် သင့်ထံသို့ ဝမ်းမြောက်ခြင်းနှင့် ခွန်အားကို ယူဆောင်လာကာ သင်၏သက်သေခံချက်အား ဆက်လက်ခိုင်မာစေရန် ကူညီပေးပါသည်။

သိသာထင်ရှားသည်မှာ၊ ကျေးဇူးတင်စိတ်ရှိခြင်းသည် ဘဝ၏ခက်ခဲသောအရာများကို လျစ်လျူရှုခြင်း သို့မဟုတ် အချိန်တိုင်း ပျော်ရွှင်နေခြင်းဟု မဆိုလိုပါ။ ယေရှုခရစ်တော်ပင်လျှင် နာကျင်မှုကို ခံစားခဲ့ပြီး အသိအမှတ်ပြုခဲ့ပါသည် (ရှု အယ်လမာ ၇:၁၁၊ သြဝါဒနှင့်ပဋိညာဉ်များ ၁၉:၁၈–၁၉)။ ဝမ်းနည်းခြင်းသည် သေခြင်းရှိရာဘဝ၏ ပုံမှန်အစိတ်အပိုင်းတစ်ခု ဖြစ်ပါသည်။

သို့သော် မည်သည့်အရာများဖြစ်ပျက်ပါစေ၊ ဘယ်သောအခါမျှ မပြောင်းလဲသောအရာတစ်ခုမှာ၊ ကောင်းကင်ဘုံရှင်အဘ၏ ကရုဏာတော်အစီအစဉ်ဖြစ်ပါသည်။ ဘဝတွင် သင်ကြုံတွေ့ရသော ဝမ်းနည်းခြင်းနှင့် နာကျင်ခြင်းအားလုံးကို ယေရှုခရစ်တော်နှင့် သူ၏အပြစ်ဖြေခြင်းမင်္ဂလာကြောင့် မှန်ကန်စွာ ပြုပြင်ခြင်းခံရပါလိမ့်မည် (ရှု ဗျာဒိတ် ၂၁:၄)။

တမန်တော်တစ်ဆယ့်နှစ်ပါးအဖွဲ့၏ အသင်းလူကြီး ဒီရက်တာ အက်ဖ်၊ ဥဒေါ့ဖ် က ဤသို့ရှင်းပြခဲ့ပါသည်၊ “ဒုက္ခဆင်းရဲရောက်နေတဲ့အချိန်တွေမှာ ကျေးဇူးတင်ခြင်းဆိုတာ ကျွန်တော်တို့ရဲ့ အခြေအနေတွေကို ကျွန်တော်တို့ကျေနပ်နှစ်သက်တယ်လို့ မ ဆိုလိုပါဘူး။ အဲဒါက အမှန်တော့ ယုံကြည်ခြင်းမျက်စိနဲ့ ကျွန်တော်တို့ရဲ့ မျက်မှောက်ခေတ်စိန်ခေါ်မှုတွေကို ကျော်လွန်ကြည့်ရှုခြင်းကို ဆိုလိုပါတယ်။”