ຂ່າວສານປະຈຳເດືອນ For the Strength of Youth, ເດືອນກຸມພາ 2026
ຢາກມີຄວາມສຸກຫລາຍກວ່າເກົ່າບໍ? ໃຫ້ລອງຄວາມກະຕັນຍູ
ເມື່ອຊີວິດເຕັມໄປດ້ວຍການປ່ຽນແປງ, ຄວາມກະຕັນຍູສາມາດຊ່ວຍໃຫ້ເຈົ້າສຸມໃສ່ສິ່ງທີ່ເປັນທາງບວກ ແລະ ມີຄວາມຫວັງຢູ່ສະເໝີ.
ພາບປະກອບ ໂດຍ ແມກກີ ສະຕີບເວັນສັນ
“ເຈົ້າຈະບໍ່ມີວັນມີຄວາມສຸກຫລາຍກວ່າທີ່ເຈົ້າຮູ້ສຶກຂອບຄຸນ.”
ເຊັ່ນດຽວກັບຄຳເວົ້ານີ້ຈາກແອວເດີ ແກຣີ ບີ ຊາບິນ ແຫ່ງສາວົກເຈັດສິບ ແນະນຳ, ຄວາມສຸກຂອງເຈົ້າໄດ້ຮັບອິດທິພົນໂດຍກົງຈາກຄວາມຮູ້ສຶກຂອບຄຸນ. ມັນສົມເຫດສົມຜົນ—ເມື່ອເຈົ້າຮູ້ສຶກຂອບຄຸນ, ເຈົ້າຈະສຸມໃສ່ສິ່ງທີ່ເປັນທາງບວກ ແທນທີ່ຈະເປັນທາງລົບ.
ເຖິງຢ່າງໃດກໍຕາມ, ຊີວິດຈະບໍ່ເປັນໄປຕາມແຜນສະເໝີ. ການປ່ຽນແປງທີ່ບໍ່ຄາດຄິດອາດເຮັດໃຫ້ເຈົ້າຕຶງຄຽດ, ໂສກເສົ້າ, ຫລື ອຸກອັ່ງໃຈ ຫລາຍກວ່າມີຄວາມສຸກ. ແຕ່ເມື່ອສິ່ງຕ່າງໆຍາກລຳບາກ, ຄວາມກະຕັນຍູສາມາດຊ່ວຍເຈົ້າໃຫ້ມີຄວາມຫວັງໄດ້. ໃຫ້ລອງສາມວິທີນີ້ ເພື່ອນຳເອົາຄວາມກະຕັນຍູເຂົ້າມາໃນຊີວິດຂອງເຈົ້າຫລາຍຂຶ້ນ.
1. ສະແຫວງຫາສິ່ງທີ່ດີ
ຫລາຍຄັ້ງ, ມັນຍາກທີ່ສຸດທີ່ຈະມີຄວາມກະຕັນຍູ ເມື່ອເຈົ້າຮູ້ສຶກວ່າເຈົ້າຂາດບາງສິ່ງບາງຢ່າງ. ແຕ່ພອນອັນໃດແດ່ທີ່ເຈົ້າອາດຈະມອງຂ້າມ ໂດຍການສຸມໃສ່ສິ່ງທີ່ເຈົ້າ ບໍ່ ມີ ແທນທີ່ຈະເປັນສິ່ງທີ່ເຈົ້າ ມີ?
ເມື່ອເຈົ້າຄົ້ນຫາສິ່ງທີ່ດີໃນຊີວິດຂອງເຈົ້າ, ເມື່ອເວລາຜ່ານໄປ ມັນຈະງ່າຍຂຶ້ນທີ່ຈະພົບເຫັນ.
2. ສະແດງຄວາມກະຕັນຍູຕໍ່ຜູ້ໃຫ້
ເມື່ອເຈົ້ານັບພຣະພອນຂອງເຈົ້າ, ຢ່າລືມວ່າມັນມາຈາກໃສ.
ການຂອບພຣະໄທພຣະບິດາເທິງສະຫວັນສຳລັບຂອງປະທານຂອງພຣະອົງ—ລວມທັງຂອງປະທານທີ່ເປັນພຣະບຸດຂອງພຣະອົງ—ສາມາດເຮັດໃຫ້ຄວາມຮັກ ແລະ ຄວາມສັດທາໃນພຣະອົງເລິກເຊິ່ງຫລາຍຂຶ້ນ. ປະທານດີ ທອດ ຄຣິສໂຕເຟີສັນ, ທີ່ປຶກສາທີສອງໃນຝ່າຍປະທານສູງສຸດ, ກໍໄດ້ອະທິບາຍວ່າ, “ການຮູ້ສຶກ ແລະ ການສະແດງຄວາມຂອບຄຸນພຣະເຈົ້າ … ເຮັດໃຫ້ການນະມັດສະການເຕັມໄປດ້ວຍຄວາມຮູ້ສຶກເຖິງການເລີ່ມຕົ້ນໃໝ່ດ້ວຍຄວາມຊື່ນຊົມ,” ຊຶ່ງນຳຄວາມສຸກ ແລະ ຄວາມເຂັ້ມແຂງມາສູ່ເຈົ້າ ແລະ ຊ່ວຍໃຫ້ປະຈັກພະຍານຂອງເຈົ້າໝັ້ນຄົງ.
3. ສຸມໃສ່ແຜນຂອງພຣະບິດາເທິງສະຫວັນ
ເຫັນໄດ້ຢ່າງຊັດເຈນວ່າ, ການມີຄວາມກະຕັນຍູບໍ່ໄດ້ໝາຍຄວາມວ່າ ຕ້ອງລະເລີຍສິ່ງຍາກລຳບາກໃນຊີວິດ ຫລື ຮູ້ສຶກມີຄວາມສຸກຕະຫລອດເວລາ. ແມ່ນແຕ່ພຣະເຢຊູຄຣິດກໍເຄີຍຮູ້ສຶກ ແລະ ຍອມຮັບຄວາມເຈັບປວດ (ເບິ່ງ ແອວມາ 7:11; ຄຳສອນ ແລະ ພັນທະສັນຍາ 19:18–19). ຄວາມໂສກເສົ້າເປັນສ່ວນປົກກະຕິຂອງຄວາມເປັນມະຕະ.
ແຕ່ບໍ່ວ່າຈະເປັນແນວໃດກໍຕາມ, ສິ່ງໜຶ່ງທີ່ບໍ່ເຄີຍປ່ຽນແປງ ນັ້ນຄື: ແຜນແຫ່ງຄວາມເມດຕາຂອງພຣະບິດາເທິງສະຫວັນ. ຄວາມໂສກເສົ້າ ແລະ ຄວາມເຈັບປວດທັງໝົດທີ່ເຈົ້າປະສົບໃນຊີວິດ ຈະຖືກແກ້ໄຂໃຫ້ຖືກຕ້ອງ ຍ້ອນພຣະເຢຊູຄຣິດ ແລະ ການຊົດໃຊ້ຂອງພຣະອົງ (ເບິ່ງ ພຣະນິມິດ 21:4).
ແອວເດີ ດີເດີ ແອັຟ ອຸກດອບ ແຫ່ງກຸ່ມອັກຄະສາວົກສິບສອງ ໄດ້ອະທິບາຍວ່າ: “ການມີຄວາມກະຕັນຍູໃນເວລາທີ່ມີຄວາມໂສກເສົ້າ ບໍ່ ໄດ້ໝາຍຄວາມວ່າ ເຮົາພໍໃຈກັບສະພາບການຂອງເຮົາ. ມັນ ໝາຍ ຄວາມວ່າ ຜ່ານຕາແຫ່ງສັດທາຂອງເຮົາ ເຮົາໄດ້ມອງຂ້າມຄວາມທ້າທາຍທີ່ເຮົາມີຢູ່ໃນປະຈຸບັນ.”
© 2026 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, February 2026. Laotian. 19935 331