Mahlwem Nuhkwewa Mwe Ahkkweye Mwet Fuhsr Mwe Fahkwack, Fepweri 2026
Luhngse Engan Yohk Liki Met Ah? Srihke Kulohkihn
Ke pacl se moul lom an enenuh in eklac, sruikihn kuh in kahsre kom in lohacng nuh ke ohiyac wo ac muhta na in finsrak.
ahkuhtweyucki sel Maggie Stephenson
“Kom fah tiacna kuh in engan yohk liki kom srui.”
Oacna ke fahk se lal Elder Gary B. Sabin luhn Itngucul sruhmuhn, ke engan lom lihksreni na eklac ke ohiyacn srui lom an. Oasr kalmeyac—ke kom srui, kom lohacng nuh ke ma wowo likina in tiac ma wo.
Srwackna, moul uh tiac fahsr oacna ma plwacniyuck pacl nuhkwewa uh. Ayaol tiac pwacpa kuh in oraclah fohsack, ahsor, kuh kasrkuhsrak likina in engan. Tuhsruhk ke ma uh upac, srui kuh in kahsre kom in muhta na ke finsrak. Srihke ohiyac tolu inge in kahsre kom usot srui nuh ke moul lom an.
1. Suk ke ma Wo
Inkaiyen pacl uh, arlac upac in oasr srui ke kom puhla muh oasr ma wacngihn yurum uh. Tuhsruhk mwe insewowo fuhkah sahp kom tiacna liye ke kom liye na ma wacngihn lom likina ma oasr yurum?
Ke kom suk ma wowo ke moul lom an, ac fah eklac fihsrwacsr in konweyuckyak tok.
Ahkkahlwemye Kulohkihn nuh sin Mwet Sang
Ke kom oek mwe insewowo lom, nikmet muhlkuhnlah acn eltahl tuhkuh we an.
Sang kuloh nuh sin Pahpah Inkuhsrao ke mwe sang Lal—weacng pac mwe sang ke Wen Nahtuhl—kuh in ahkyohkye luhngse lom ac luhlahlfongi ke El. Prestuhn D. Todd Christofferson, Mwet Kahsruh Se Ahkluo ke Prestuhnsi Se Met, oacyacpac ahkuhtweyac, “Puhlakihn ac ahkkahlwemye srui nuh sin God … ma orek ke alu ke sie ohiyac sasuc pwacr,” use nuh sum engan ac kuh ac kahsruh luhlahlfongi pwacye lom in kawihl.
Lohacng nuh ke Plwacn luhn Pahpah Inkuhsrao
Pwacyelah, oasr luhn srui tiac kalmac pa in pihlesruh ma upac ke moul kuh engan pacl nuhkwewa. Finne Jisus Kraist El puhla ac etuh ke ngal (liye Alma 7:11; Doctrine and Covenants 19:18–19). Ahsor el ip se ke moul suhkawihl.
Tuhsruhk finne ohinge, oasr sie ma tiacna eklac: plwacn pahkotwen luhn Pahpah Inkuhsrao. Ac fah wangin misa, wangin asor ku tung ku keok, mweyen ma nukewa meet ah wanginla (liye Fwackyuck 21:4).
Elder Dieter F. Uchtdorf ke U luhn Mwet Sap Singucul Luo ahkuhtweyac: “In tarilacna ke pacl upac tiac kalmac pa kuht engankihn ma sikyak nuh sesr uh. Ac tuh kalmac pa kuht fin orekmakihn luhlahlfongi kuht kuhtanglah ma upac ke lwen lasr uh.”
© 2026 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac ke lweng: 6/19. Lwenglah luhn Mwe Fahkwack ke Mahlwem Nuhkwewa luhn Ma Nuh ke Kuhiyacn Mwet Fuhsr, Fepweri 2026. Kosraean. 19935 868