សារលិខិតប្រចាំខែ ដើម្បីកម្លាំងនៃយុវជន ខែកុម្ភៈ ឆ្នាំ២០២៦

ចង់មានសុភមង្គលជាងមុនឬទេ ? សូមសាកល្បងការដឹងគុណ

ដោយ ម៉ាដេលីន ម៉ាស្សហ្វៀល

ទស្សនាវដ្ដីសាសនាចក្រ

នៅពេលដែលជីវិតរបស់អ្នកពោរពេញទៅដោយការផ្លាស់ប្តូរ នោះការដឹងគុណអាចជួយអ្នកផ្តោតលើភាពវិជ្ជមាន និងបន្តមានសេចក្តីសង្ឃឹម ។

បុគ្គលម្នាក់នៅក្រោមពពកភ្លៀង និងបុគ្គលម្នាក់ដែលហ៊ុមព័ទ្ធដោយសត្វស្លាប និងមេអំបៅ ហើយនិងផ្កា

« យើងនឹងគ្មានអំណរទេ បើយើងមិនចេះដឹងគុណនោះ » ។

ដូចនឹងសម្រង់សម្តីនេះដែលមកពីអែលឌើរ ហ្គារី ប៊ី សាប៊ីន នៃពួកចិតសិបនាក់ បានផ្តល់យោបល់ ទំហំនៃភាពរីករាយរបស់អ្នកគឺទទួលបានឥទ្ធិពលពីទំហំនៃការមានអំណរគុណរបស់អ្នក ។ វាសមហេតុផលណាស់—នៅពេលដែលអ្នកចេះដឹងគុណ នោះអ្នកកំពុងផ្តោតលើរឿងវិជ្ជមានជំនួសឲ្យរឿងអវិជ្ជមាន ។

ទោះបីជាយ៉ាងណាក៏ដោយ ជីវិតមិនតែងតែដំណើរការដូចដែលបានគ្រោងទុកនោះទេ ។ ការផ្លាស់ប្តូរដែលមិននឹកស្មានដល់អាចធ្វើឲ្យអ្នកមានភាពតានតឹង សោកសៅ ឬខកចិត្តជាងសប្បាយរីករាយ ។ ប៉ុន្តែនៅពេលដែលមានការលំបាក នោះការដឹងគុណអាចជួយអ្នកឲ្យបន្តមានសេចក្តីសង្ឃឹម ។ សូមសាកល្បងវិធីទាំងបីនេះ ដើម្បីនាំមកនូវការដឹងគុណកាន់តែច្រើននៅក្នុងជីវិតរបស់អ្នក ។

១. រកមើលអ្វីដែលល្អ

ជាញឹកញាប់ វាជាការលំបាកបំផុតដើម្បីមានការដឹងគុណ នៅពេលដែលអ្នកមានអារម្មណ៍ថាអ្នកកំពុងខ្វះអ្វីមួយ ។ ប៉ុន្តែតើពរជ័យអ្វីខ្លះដែលអ្នកអាចមើលរំលង ដោយការផ្តោតលើអ្វីដែលអ្នក មិន មានជាជាងអ្វីដែលអ្នក មាន ?

នៅពេលដែលអ្នកស្វែងរកអ្វីដែលល្អនៅក្នុងជីវិតរបស់អ្នក យូរៗទៅវានឹងកាន់តែងាយស្រួលក្នុងការស្វែងរក ។

សូមសាកល្បងការណ៍នេះ ៖ ជារៀងរាល់យប់ សូមជញ្ជឹងគិតពីថ្ងៃរបស់អ្នកដោយផ្តោតលើការដឹងគុណ ។ តើរឿងល្អអ្វីខ្លះបានកើតឡើង ? តើអ្នកមានអំណរគុណសម្រាប់អ្វីខ្លះ ? រឿងទាំងនេះអាចជារឿងធំដុំ ដូចជាទង្វើនៃការបម្រើដែលនរណាម្នាក់បានធ្វើសម្រាប់អ្នក ឬរឿងតូចតាច ដូចជាការស្តាប់បទចម្រៀងដែលអ្នកចូលចិត្តនៅលើវិទ្យុ ។ ចូរសរសេររឿងទាំងបីនោះ ។

២. សម្តែងការដឹងគុណចំពោះអ្នកផ្តល់ឲ្យ

នៅពេលដែលអ្នករាប់ពរជ័យរបស់អ្នក សូមកុំភ្លេចថាពរជ័យទាំងនោះមកពីណា ។

ការអរព្រះគុណព្រះវរបិតាសួគ៌សម្រាប់អំណោយរបស់ទ្រង់—រួមទាំងអំណោយនៃព្រះរាជបុត្រារបស់ទ្រង់—អាចធ្វើឲ្យសេចក្តីស្រឡាញ់ និងសេចក្តីជំនឿរបស់អ្នកលើទ្រង់មានកាន់តែខ្លាំងឡើង ។ ប្រធាន ឌី ថត គ្រីស្តូហ្វឺសិន ទីប្រឹក្សាទីពីរក្នុងគណៈប្រធានទីមួយ ក៏បានពន្យល់ផងដែរ « ការមានអារម្មណ៍ និងការបង្ហាញការដឹងគុណដល់ព្រះ … បំពេញការថ្វាយបង្គំដោយអារម្មណ៍អរសប្បាយក្នុងការរំឭកជាថ្មី » នាំមកនូវសេចក្តីអំណរ និងកម្លាំងដល់អ្នក និងជួយឲ្យទីបន្ទាល់របស់អ្នកមានភាពនឹងនរ ។

សូមសាកល្បងការណ៍នេះ ៖ នៅពេលដែលអ្នកអធិស្ឋាន សូមចំណាយពេលដើម្បីថ្លែងអំណរគុណដោយស្មោះអស់ពីចិត្តរបស់អ្នក ។ អ្នកក៏អាចបង្ហាញការដឹងគុណរបស់អ្នកចំពោះអំណោយពីស្ថានសួគ៌ តាមរយៈការប្រើអំណោយទាំងនោះ ដូចជាការទៅព្រះវិហារបរិសុទ្ធ ឬការបង្ហាញពីការដឹងគុណចំពោះដង្វាយធួនរបស់ព្រះគ្រីស្ទតាមរយៈការប្រែចិត្ត ។

៣. ផ្តោតលើផែនការរបស់ព្រះវរបិតាសួគ៌

ជាការពិតណាស់ ការដឹងគុណមិនមានន័យថាមិនអើពើនឹងរឿងលំបាកនៅក្នុងជីវិត ឬមានអារម្មណ៍សប្បាយរីករាយគ្រប់ពេលនោះទេ ។ សូម្បីតែព្រះយេស៊ូវគ្រីស្ទក៏បានមានអារម្មណ៍ និងស្គាល់ការឈឺចាប់ផងដែរ ( សូមមើល អាលម៉ា ៧:១១; គោលលទ្ធិ និងសេចក្ដីសញ្ញា ១៩:១៨–១៩ ) ។ ភាពសោកសៅគឺជាផ្នែកមួយធម្មតានៃជីវិតរមែងស្លាប់ ។

ប៉ុន្តែទោះបីជាយ៉ាងណាក៏ដោយ មានរឿងមួយមិនដែលផ្លាស់ប្តូរ ៖ ផែនការនៃសេចក្ដីមេត្តាករុណារបស់ព្រះវរបិតាសួគ៌ ។ ភាពសោកសៅ និងការឈឺចាប់ទាំងអស់ដែលអ្នកជួបប្រទះនៅក្នុងជីវិតនឹងត្រូវបានធ្វើល្អវិញ ដោយសារព្រះយេស៊ូវគ្រីស្ទ និងដង្វាយធួនរបស់ទ្រង់ ( សូមមើល វិវរណៈ ២១:៤ ) ។

អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានពន្យល់ថា ៖ « ការដឹងគុណក្នុងគ្រាឈឺចាប់ ពុំ មានន័យថា យើងរីករាយនឹងស្ថានភាពរបស់យើងនោះទេ ។ វាមានន័យ ច្បាស់ ថា ដោយភ្នែកនៃក្តីជំនឿ យើងមើលឲ្យហួសពីឧបសគ្គបច្ចុប្បន្នរបស់យើង ។ »

សូមសាកល្បងការណ៍នេះ ៖ នៅពេលដែលការល្បងមកដល់ សូមផ្តោតលើផែនការរយៈពេលវែងរបស់ព្រះវរបិតាសួគ៌សម្រាប់អ្នក ហើយពឹងផ្អែកលើជំនួយរបស់ទ្រង់ ។ បញ្ហារបស់អ្នកប្រហែលជាមិនរលាយបាត់ភ្លាមៗនោះទេ ប៉ុន្តែទ្រង់នឹងជួយអ្នកឲ្យមានភាពសុខសាន្ត និងក្តីសង្ឃឹមក្នុងគ្រប់កាលៈទេសៈ ។

ការបង្ហាញការដឹងគុណរបស់ខ្ញុំ

សេចក្តីណែនាំសម្រាប់យុវជនបង្រៀនអំពីបទបញ្ញត្តិធំពីរ ( ឲ្យស្រឡាញ់ព្រះ និងស្រឡាញ់អ្នកជិតខាងរបស់ខ្ញុំ ) ។ វិធីមួយដែលខ្ញុំអាចបង្ហាញសេចក្តីស្រឡាញ់ចំពោះព្រះ គឺការអរព្រះគុណទ្រង់សម្រាប់ពរជ័យជាច្រើនរបស់ខ្ញុំ ! សូមពិនិត្យមើលការណែនាំសម្រាប់គំនិតបន្ថែម ។

© ឆ្នាំ២០២៦ ដោយ Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly For the Strength of Youth Message, February 2026 ។ Cambodian. 19935 258