Binulan a Mensahe iti Para iti Pigsa dagiti Agtutubo , Pebrero 2026
Kayatmo kadi ti Agbalin a Naragragsak? Padasem ti Agyaman
No napno ti biagmo kadagiti panagbalbaliw, makatulong kenka ti panagyaman a mangipamaysa iti positibo ken agtalinaed a manangnamnama.
Dagiti panangiladawan ni Maggie Stephenson
“Saankanto a pulos a naragragsak ngem iti kinamanagyamanmo.”
Kas iti isingasing daytoy a naadaw a sasao manipud ken Elder Gary B. Sabin ti Pitopulo, no kasano ti kinaragsakmo ket direkta a maimpluensiaan no kasano ti panagyamanmo. Adda kaipapanan dayta—no managyamanka, agpokuska kadagiti positibo a banag imbes a kadagiti negatibo a banag.
Nupay kasta, saan a kanayon a mapasamak ti planotayo iti biag. Mabalin a dagiti di ninamnama a panagbalbaliw ti mamagbalin kenka nga ad-adda a ma-stress, malidayan, wenno maupay imbes a maragsakan. Ngem no narigat ti kasasaad, makatulong ti kinamanagyaman tapno agtalinaedka nga addaan namnama. Padasem dagitoy tallo a wagas tapno ad-adda a mangyeg iti panagyaman iti biagmo.
1. Kitaem ti Naimbag
Masansan a narigrigat ti maaddaan iti kinamanagyaman no mariknam a kasla adda kurang kenka. Ngem ania dagiti bendision a mabalin a maliwayam no ti ipamaysam ket ti awan kenka imbes a no ania ti adda kenka?
Bayat ti panangbirokmo iti naimbag iti biagmo, in-inut nga agbalinto a nalaklaka a masarakan dayta.
2. Iyebkas ti Panagyaman iti Manangited
No bilangem dagiti bendisionmo, dimo liplipatan no sadino ti naggapuan dagitoy.
Ti panagyaman iti Nailangitan nga Ama gapu kadagiti sagutna—agraman ti sagut ti Anakna—ket mabalin a mangpauneg iti panagayat ken pammatim Kenkuana. Ni Presidente D. Todd Christofferson, Maikadua a Mammagbaga iti Umuna a Panguluen, inlawlawagna met a, “Ti pannakarikna ken panangyebkas iti panagyaman iti Dios … ket mangpunno iti panagdaydayaw a naragsak a pannakapabaro,” a mangyeg kenka iti rag-o ken pigsa ken panangtulong iti pammatim nga agtalinaed a natalged.
3. Ipamaysam ti Plano ti Nailangitan nga Ama
Nabatad a ti kaadda ti panagyaman dina kaipapanan a di ikankano dagiti narigat a banag iti biag wenno kanayon a marikna ti ragsak. Uray ni Jesucristo nariknana ken nabigbigna ti saem (kitaen iti Alma 7:11; Doktrina ken Katulagan 19:18–19). Ti ladingit ket gagangay a paset ti biag.
Ngem uray ania ti mapasamak, maysa a banag ti saan a pulos nga agbaliw: ti plano ti asi ti Nailangitan nga Ama. Amin a ladingit ken pannakasair a mapasaranyo iti biag ket maaturto gapu ken ni Jesucristo ken ti Pannubbotna (kitaen iti Apocalipsis 21:4).
Inlawlawag ni Elder Dieter F. Uchtdorf ti Korum ti Sangapulo-ket-dua nga Apostol: “Ti panagbalin a managyaman kadagiti panawen ti pannakariribuk saanna kayat a sawen a maragsakantayo kadagiti kasasaadtayo. Ti kayatna a sawen babaen iti mata ti pammati kitaentayo ti labes dagiti agdama a karittayo.”
© 2026 by Intellectual Reserve, Inc. All rights reserved. Naimaldit iti Pilipinas. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, February 2026. Ilokano. 19935 864