Zaj Lus hauv phau For the Strength of Youth Txhua Hli, Ob Hlis Ntuj 2026
Puas Xav Zoo Siab Ntxiv? Sim Ua Vajtswv Tsaug
Thaum koj lub neej hloov ntau heev, txoj kev ris txiaj yuav pab koj tsom ntsoov rau kev xav zoo thiab muaj kev cia siab.
Cov duab los ntawm Maggie Stephenson
“Nej yeej yuav tsis muaj kev zoo siab [ntau] dua li nej ris Vajtswv txiaj.”
Zoo ib yam li Txwj Laug Gary B. Sabin ntawm Pawg Xya Caum tau hais, koj txoj kev zoo siab yog los ntawm seb koj ris Vajtswv txiaj npaum li cas. Yeej yog lawm—thaum koj ris txiaj, koj tsom ntsoov rau tej yam uas zoo tsis xav txog tej yam phem.
Tiam sis tej lub sij hawm koj lub neej tsis mus raws li tau npaj lawm. Tej yam uas hloov hauv koj lub neej uas koj tsis tau xav txog yuav ua rau koj txhawj, tu siab, los sis nyuaj siab ntau dua li koj txoj kev zoo siab. Tiam sis thaum tej lub sij hawm nyuaj, kev ris txiaj yuav pab koj muaj kev cia siab. Sim peb yam ntawm no kom pab koj muaj kev ris txiaj ntxiv hauv koj lub neej.
1. Nrhiav Kom Pom Qhov Zoo
Ntau zaus, nyuaj tshaj rau koj ris Vajtswv txiaj thaum koj xav tias tshuav ib yam dab tsi uas koj tsis muaj. Tiam sis yog koj tsom ntsoov rau tej yam uas koj tsis tau ntau dua li koj xav txog tej yam uas koj tau ntshe yuav ua rau koj tsis pom tej koob hmoov twg?
Thaum koj nrhiav tej yam zoo hauv koj lub neej, yuav yooj yim rau koj nrhiav tau, thaum sij hawm dhau mus.
2. Hais Ua Tsaug rau tus uas Pub
Thaum koj suav koj cov koob hmoov, nco qab tias tej ntawd los qhov twg los.
Qhov uas koj ua Leej Txiv Saum Ntuj Ceeb Tsheej tsaug rau Nws tej txiaj ntsim—tsis hais lub txiaj ntsim uas yog Nws Leej Tub—pab tau koj muaj txoj kev hlub thiab kev ntseeg Nws ntxiv. Thawj Tswj Hwm D. Todd Christofferson, tus Pab Cuam thib Ib hauv Thawj Pawg Thawj Tswj Hwm, kuj tau hais tias, “Qhov uas peb ris Vajtswv txiaj thiab ua Nws tsaug yeej yog qhov uas ua rau peb zoo siab pe hawm Nws,” thiaj li pab koj muaj kev xyiv fab thiab muaj zog thiab pab koj zaj lus tim khawv nyob ruaj nrees.
3. Tsom Ntsoov rau Leej Txiv Saum Ntuj Ceeb Tsheej txoj Hau Kev
Qhov uas peb ris Vajtswv txiaj yeej tsis tsis txhais hais tias peb tsis xav txog tej yam nyuaj hauv peb lub neej los yog peb zoo siab txhua lub sij hawm. Yexus Khetos los twb paub thiab lees tej kev mob (saib Amas 7:11; Lus Qhuab Qhia thiab Kev Khi Lus 19:18–19). Kev tu siab yeej yog ib feem ntawm lub neej no.
Tiam sis txawm li ntawd los, muaj ib yam uas yeej yuav tsis hloov: Leej Txiv Saum Ntuj Ceeb Tsheej txoj hau kev hlub tshua. Tag nrho tej kev tu siab thiab kev mob uas koj raug hauv lub neej no los Nws yuav kho kom zoo vim muaj Yexus Khetos thiab Nws txoj Kev Theej Txhoj (saib Tshwm Sim 21:4).
Txwj Laug Dieter F. Uchtdorf ntawm Pawg Kaum Ob tug Thwj Tim tau piav hais tias: “Qhov uas peb ris Vajtswv txiaj thaum peb raug kev nyuaj tsis txhais hais tias peb zoo siab vim peb raug xwm txheej. Tiam sis qhov no txhais hais tias peb muaj kev ntseeg ntsia kom dhau tej kev cov nyom uas peb muaj tam sim no.”
© 2026 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, Ob Hlis Ntuj 2026. Hmong. 19935 295