Bulanan nga Mensahe sa Para sa Kusog sang mga Lamharon, Pebrero 2026
Gusto Mo bala nga Mangin Mas Malipayon? Magpakita sang Pagpasalamat
Kon ang imo kabuhi puno sang mga pagbag-o, ang pagpasalamat makabulig sa imo nga magtutok sa positibo kag magpabilin nga may paglaum.
Mga drowing ni Maggie Stephenson
“Mangin mas malipayon ka kon mapinasalamaton ka.”
Ginapakita sa sining ginsambit ni Elder Gary B. Sabin sang Sitenta, nga kon ano ikaw kamalipayon epekto sang kon ano ikaw kamapinasalamaton. Husto gid ina—kon mapinasalamaton ka, nagatutok ka sa positibo nga mga butang imbes sang negatibo nga mga butang.
Pero sa gihapon, indi sa tanan nga tion nga malab-ot mo ang imo mga tinutuyo sa kabuhi. Ang wala ginapaabot nga mga pagbag-o mahimo nga magpa-stress, magpasubo ukon magpaakig pa gid sa imo sangsa magmalipayon. Pero kon mabudlay ang mga sitwasyon, ang pagpasalamat makabulig sa imo nga magpabilin nga may paglaum. Tilawi ining tatlo ka paagi agud magdala sing dugang nga pagpasalamat sa imo kabuhi.
1. Pangitaa ang Maayo
Masami nga mabudlay kaayo magpasalamat kon sa imo pamatyagan daw may ara ka sing kakulangan. Pero ano ayhan nga mga bugay ang wala mo matalupangdi tungod sa pagtutok sa kon ano ang wala sa imo sangsa kon ano ang ara sa imo?
Sa imo pagpangita sang maayo sa imo kabuhi, sa ulihi mangin mas mahapos na ini pangitaon.
2. Pasalamati ang Naghatag
Kon mag-isip ka sang imo mga bugay, indi pagkalimti kon diin ini halin.
Ang pagpasalamat sa Amay nga Langitnon para sa Iya mga regalo—lakip na ang pagregalo sang Iya Anak—makapadako pa gid sang imo pagpalangga kag pagtuo sa Iya. Si Pangulong D. Todd Christofferson, Ika-duhang Manuglaygay sa Unang Pangulohan, nagpaathag man, “Ang pagbatyag kag pagpakita sang pagpasalamat sa Dios … nagainspirar sa pagsimba sing may malipayon nga pagbag-o,” nga nagadala sa imo sang kalipay kag kabakod kag nagabulig sa imo testimonya nga magpabilin nga malig-on.
3. Tutoki ang Plano sang Amay nga Langitnon
Maathag nga ang pagpasalamat wala nagakahulugan nga nagapabaya lang sa mabudlay nga mga sitwasyon sa kabuhi ukon nagapangalipay lang pirme. Bisan si Jesucristo ginbatyag kag ginbaton ang kasakit (tan-awa sa Alma 7:11; Doktrina kag mga Kasugtanan 19:18–19). Ang kasubo isa ka normal nga bahin sang kabuhi sa duta.
Pero bisan ano pa man, isa lang ka butang ang wala nagabag-o: ang plano sang kaluoy sang Amay nga Langitnon. Ang tanan nga kasubo kag kasakit nga imo maeksperiyensyahan sa kabuhi paayohon tungod kay Jesucristo kag sa Iya Pagbayad-sala (tan-awa sa Bugna 21:4).
Si Elder Dieter F. Uchtdorf sang Korum sang Dose ka Apostoles nagpaathag: “Ang pagpasalamat sa mga tinion sang kasubo wala nagakahulugan nga nalipay kita sa aton mga sirkumstansya. Nagakahulugan ini nga paagi sa mga mata sang pagtuo nagatan-aw kita nga labaw pa sa aton mga hangkat sa karon.”
© 2026 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, February 2026. Hiligaynon. 19935 861