Rongorongo Ibukin Kakorakoraia Kairake ni Katoa Namwakaina, Beberuare 2026
Ko Tangiria Bwa Ko na Rangi ni Kukurei? Kataia Kakaitau
Ngkana e korakora te bitaki inanon maium, e kona te kakaitau ni buokiko ni kabotoa am iango i aon bwaai aika a raraoi ao ni karekea te kantaninga ma te nano ae tamaroa.
Kamatataan te tamnei iroun Maggie Stephenson
“Ko na aki kona ni karekea te kukurei nakon ae ko na rangi ni kakaitau riki.”
N aron ana taeka Unimwaane Gary B. Sabin man te Itingaun ngke e taku, arom n namakina te kukurei e riki man arom ni kakaitau . E bon mataata —ngkana ko kakaitau, e bon boboto am iango i aon bwaai aika a raraoi ma tiaki ni bwaai aika a buakaka.
N te aro ae teimatoa, e aki kona n nakoraoi te maiu n aron ae kantaningaaki. Bitaki aika aki kantaningaaki a kona ni karika korakain te nano, nanokawaki, ke te un nakon te kukurei. Ma ngkana a nakobuaka bwaai, e kona te kakaitau ni buokiko n teimatoa ni karekea te kantainga ma te nano ae tamaroa. Katai teniua kawai ake a na uota riki te kakaitau nakon maium.
1. Tataraa te Raoiroi
N angiin te tai, e bon kangaanga bwa ko na kakaitau ngkana ko namakinna bwa akea te bwai ae ko karekea. Ma baikara kakabwaia aika ko tarariaoi man kabotoan am iaongo i aon bwaai aika akea iroum nakon bwaai aika iai iroum?
Ngkai ko ukoukora te tamaroa inanon maium, e na taraa ni bebete karekeana n te tai teuana ma teuana.
2. Kaota te Kakaitau nakon te Tia Anganga
Ngkana ko wareki am kakabwaia, tai mwaninga bwa a roko mai iaa.
Te kakaitau nakon Tamara are i Karawa ibukin Ana bwaintangira—ni ikotaki ma bwaintangira ibukin Natina—e kona ni kakorakora am tangira ao am onimaki Irouna. Beretitenti D. Todd Christofferson, te Kauoman ni Kauntira n te Moan Beretitentii, e kamatataata naba, “Namakinan ao kaotakin te kakaitau nakon te Atua … e karina te ang ni kan nebonebo ma kaboouan te namakin ae kakimwareirei,” e uota te kukurei ao te kakorakora nakoim ao ni buoka ni kamanoa am koaua.
3. Kabotoa am iango i aon ana babaire Tamara are i Karawa
N ae mataata, karekean te kakaitau e aki nanonaki bwa kakeaan bwaai aika a kangaanga n te maiu ke namakinan te kukurei n taai nako. N aron naba Iesu Kristo e namakina ao e ataa te maraki (taraa Aramwa 7:11; Reirei ao Berita aika Tabu 19:18–19). Te nanokawaki bon mwakoron te maiu ae mamate.
Ma e aki kakangai bwa tera, teuana te bwai e bon aki kona ni bita ana babaire n naoanga Tamara are i Karawa. Te nanokawaki ao te maraki are ko rinanona ni kabane inanon maium e na nakoraoi ibukin Iesu Kristo ao Ana Mwakuri ni Kamaiu (taraa Te Kaotioti 21:4).
Unimwaane Dieter F. Uchtdorf man te Kooram n Abotoro n te Tengaun ma Uoman e taku: “Te karabwarabwa n taai n korakai tiaki nanona bwa ti kukurei n aroarora. E nanonaki n ae kona taratara ma maata n onimaki n taraa are imwiin ara kangaanga ake ti aitara ma ngaia n te tai aio.”
© 2026 by Intellectual Reserve, Inc. All rights reserved. Boretiaki i USA. Kariaiakaki te Ingiriti: 6/19. Kariaiakaki rairana: 6/19. Rairan te Monthly For the Strength of Youth Message, February 2026. Kiribati. 19935 859