iTukutuku Vakavula ni Me iSakisaki ni iTabagone Feperueri 2026
Vinakata mo Bula Mamarau? Tovolea na Vakavinavinaka
Ni sa sinai tu na nomu bula ena veisau, sa rawa ni vukei iko na vakavinavinaka mo raimatua tiko ki na veika dodonu ka nuitaki tikoga.
Droini mai vei Maggie Stephenson
“O na sega vakadua ni bula mamarau cake mai na nomu vakavinavinaka.“
Me vaka ga na malanivosa oqo mai vei Elder Gary B. Sabin ena Vitusagavulu, na nomu bula marau sa vakauqeti sara ga mai na nomu vakavinavinaka. E vakaibalebale—ena gauna o vakavinavinaka kina, o sa vakanamata tiko ki na veika dodonu ka sega ni veika ca.
Ia, e sega ni dau yaco tikoga na bula me vaka sa tuvanaki tu. Na veisau sega ni namaki ena rawa ni vakavuna mo lomaocaoca, rarawa, se lomabibi ka sega ni marau. Ia ni sa dredre na ka, na vakavinavinaka ena rawa ni vukei iko mo nuitaki iko tikoga. Tovolea na tolu na sala oqo me kauta mai vakalevu na vakavinavinaka ki na nomu bula.
1. Vakasaqara na Vinaka
Sa dau vakavuqa, me dredre sara meda dau vakavinavinaka ni o vakila ni sega vei iko e dua na ka. Ia na veivakalougatataki cava soti o sa rairai raibaleta tiko ena nomu sa vakanamata ga kina veika e sega ni tu vei iko ka sega ena veika sa tiko vei iko?
Nio vakasaqara na vinaka ena nomu bula, ena yaco na gauna ena rawarawa na kena kunei.
2. Vakaraitaka na Vakavinavinaka vei Koya sa Solia
Nio wilika na nomu kalougata, kakua ni guilecava na vanua era lako mai kina.
Na vakavinavinakataki ni Tamada Vakalomalagi ena Nona isolisoli—oka kina na isolisoli ni Luvena—sa rawa ni vakatitobutaka na nomu lomana ka vakabauti Koya. A vakamacalataka talega o Peresitedi D. Todd Christofferson, iKarua ni Daunivakasala ena Mataveiliutaki Taumada, “Me sa yalomu ka mo vakaraitaka na vakavinavinaka vua na Kalou e vakatikora na sokalou ena yalo ni reki sa vakavoui,“ ena kauta mai vei iko na reki kei na kaukauwa ka vukea me taqomaki tikoga na nomu ivakadinadina.
3. Raicamatua Tiko na iTuvatuva nei Tamada Vakalomalagi
E dina, na vakavinavinaka e sega ni kena ibalebale na noda vagaluya na veika dredre ena bula oqo se na yalo mamarau ena veigauna taucoko. A vakila mada ga o Jisu Karisito ka tusanaka na mosi (raica na Alama 7:11; Vunau kei na Veiyalayalati 19:18–19). Na rarawa e dua dina na tiki ni bula oqo.
Ia veitalia ga se cava, e dua na ka e sega ni veisau: Na ituvatuva ni loloma veivueti nei Tamada Vakalomalagi. Na rarawa kece kei na mosi o sotava ena bula oqo ena vakadodonutaki ena vuku i Jisu Karisito kei na Nona Veisorovaki (raica na Ai Vakatakila 21:4).
E kaya o Elder Dieter F. Uchtdorf ena Kuoramu ni iApositolo Le Tinikarua: “Na vakavinavinaka ena gauna ni leqa e sega ni kena ibalebale nida marautaka na veika eda sotava. E kena ibalebale ga ena rai ni vakabauta eda sa raibaleta yani kina na ibolebole eda sotava tiko nikua.“
© 2026 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka Valagi: 6/19. Vakadonui me vakadewataki: 6/19. iVakadewa ni iTukutuku Vakavula ni Me iSakisaki ni iTabagone, Feperueri 2026. Fijian. 19935 858