Bosoom bosoom Ma Mbabun Enya Ahoɔdzen Amandzɛɛbɔ, Kwakwar 2026
Epɛ dɛ W’enyi Gye Ara Yie? Sɔ Enyisɔ hwɛ
Sɛ nsesã pii wɔ w’abrabɔ mu a, enyisɔ botum aboa wo ma etsim wɔ dza oye do na enya eyidado.
Maggie Stephenson yɛɛ nsaano mfonyin horow no
“W’enyi rinngye da nnsin w’enyisɔ.”
Dɛ mbrɛ Elder Gary B. Sabin a ɔka Eduosuon ho no ɔserɛkã kyerɛ no, w’enyisɔ wɔ nhyɛdo tsenn wɔ w’enyigye do. Ɔtɔ asowa mu—sɛ ekyerɛ enyisɔ a, iritsim wɔ ndzɛmba a oye do nnyɛ ndzɛmba a ɔnnyɛ.
Ampaara, abrabɔ nnkɔ do dɛ mbrɛ enyi da kwan no aber biara. Nsesa a enyi nnda kwan botum ahaw wo, ama wo werɛ ahow, anaa w’abaw mu egura kyɛn dɛ w’enyi bɛgye. Mbom sɛ ndzɛmba yɛ dzen a, enyisɔ botum aboa wo ma enya enyidado. Sɔ akwan ahorow ebiasa yi hwɛ fa enyigye kɛse bra w’abrabɔ mu.
1. Hwehwɛ dza Oye no
Mpɛn pii no, ɔyɛ dzen ankasa dɛ ibenya enyisɔ sɛ inya nkãtse dɛ innyi biribi a. Naaso ebɛn nhyira na bia irubu w’enyiwa egu do ber iritsim wɔ dza innyi do kyɛn iritsim wɔ dza ewɔ do?
Ber a ehwehwɛ dza oye wɔ w’abrabɔ mu no, mber rugu mu no ɔnnkɛyɛ dzen dɛ ibohu.
2. Kyerɛ Enyisɔ ma Nyia Ɔdze Ma no
Sɛ ekan wo nhyira a, mma wo werɛ mmfir bea a wofi.
Ereda Ɔsor Egya ase wɔ N’akyɛdze horow ho—a Ne Ba akyɛdze no ka ho—botum ama wo dɔ na gyedzi wɔ No mu akɔ bun mu. President D. Todd Christofferson, Ɔpamfo a Otsĩa Ebien wɔ President a Odzi Kan na n’Apamfo mu no, so kyerɛkyerɛɛ mu dɛ, “Yerinya na yɛrekyerɛ enyisɔ ma Nyame no … dze enyigye hyɛ hɛn mu ber a yɛsɔr” enyigye na ahoɔdzen a ɔroboa ma wo dasee esi pi.
3. Tsim wɔ Ɔsor Egya Ne Nhyehyɛɛ do
Ampaara, irinya enyisɔ no nnkyerɛ dɛ irubu w’enyiwa egu ndzɛmba a ɔyɛ dzen wɔ abrabɔ mu anaa w’enyiwa bɛgye aber biara. Jesus Christ mpo tsee na ohun yaw (hwɛ Alma 7:11; Nkyerɛkyerɛ na Ahyɛmudzi 19:18–19). Awerɛhow ka ɔnnkyebo abrabɔ yi ho.
Naaso mbrɛ ɔtse biara no, adze kor nsesa da: Ɔsor Egya N’ehumbɔbɔr nhyehyɛɛ. Osian Jesus Christ na No Werdambɔ ntsi, awerɛhow na yaw nyina ho sũahu a inya wɔ abrabɔ mu no wɔbɛyɛ no yie (hwɛ Nyikyerɛ 21:4).
Elder Dieter F. Uchtdorf a ɔkã Asomafo Duebien no hɔn Quorum ho no kyerɛkyerɛɛ mu: “Enyisɔ wɔ ɔhaw mber mu no nnkyerɛ dɛ hɛn enyiwa gye hɛn gyinabew no ho. Ɔkyerɛ dɛ yɛdze gyedzi enyiwa hwɛ tra hɛn ndɛ ber yi ɔhaw horow.”
© 2026 by Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛasee ngye ntomu: 6/19. Monthly For the Strength of Youth Message, February 2026 ne nkyerɛase. Fante. 19935 502