Porous Ren Ewe Pochokunen SerafoIteiten Maram, February 2026
Mochen Upwe Pwapwa? Sotuni Kinisou
Nupwen manauom a uren ekesiwin, kinisou a tongeni anisuk om kopwe anonga om ekiek won ewe murinon me nom non epinukunuk.
Chunga seni Maggie Stephenson
“Kose tongeni pwapwa nap seni om kopwe kinisou.”
Ussun chok ei kapas seni Elter Gary B. Sabin seni kewe Fik a apasa, ifa ussun om pwapwa mi wenengeni om mefi ren unusen om kinisou. Mi weweoch—nupwen ka kinisou, ka anonga om ekiek won mettoch mi murinno nap seni ekkewe mettoch mi ngaw.
Mi chok fis, pwe fansoun meinisin manau ese mokut won pusin an koko. Weiweitan ekesiwin meni epwe fori om kopwe kon ourek, netipengaw, ika ningeringer nap seni pwapwa. Nge mwirin ekkewe mettoch ra weires, kinisou a tongeni anisuk om kopwe nom non epinukunuk. Sotuni ekkei unungat anen om kopwe wato chommong kinisou non manauom.
1. Kutta ewe Murinno
Fan ekkoch, a weires an epwe wor kinisou nupwen ka mefi pwe ese wor mettoch remw. Nge epwe met feioch kose eteneki ren om ka chok anonga om ekiek won metese remw nap seni met mei wor remw?
Nupwen ka kutta ewe murinno non manauom, ekis me ekis epwe mecheresino om kopwe kuna.
2. Pwarano Kinisou ngeni ewe Chon Awora
Nupwen ka aneani om kewe feioch, kosap monuki ika ian ra feito seni ian.
Kinisou ngeni Samach Kot won Nang ren An niffang—pachenong ewe nifangen Noun we—a tongeni anononueno om tong ren me nuku non I. Preseten D. Todd Christofferson, Aruemonun Chon Aninis non ewe Aewin Presetensi, a pwan awewei, “Memef me pwarano kinisou ngeni Kot … amasowa ach mwareiti ngeni ew memefin pwapwan minefosefan,” uwei ngonuk pwapwa me pochokun me anisi om kapasen pwarata nonnom non tumun.
3. Anonga om Ekiek won An Samach won Nang Kokot
Fatafatochun, awora kinisou esap wewen sipwe amonungaw seni ewe weiresin mettoch non manau ika memefin pwapwa fansoun meinisin. Pwan mo Jises Kraist a mefi me etiwa metek (nengeni Alma 7:11; Doctrine and Covenants 19:18–19). Netipengaw mi ew pusin kinikinin ei manau iei.
Nge inamo ika met, ew mettoch ese tongeni epwe siwin: An Samach won Nang kokotun umoumoch. Meinisin ekkewe netipengaw me metek ka mefi non manau repwe fori kewe pung pokiten Jises Kraist me An Achasefan (nengeni Pwarata 21:4).
Elder Dieter F. Uchtdorf seni ewe Mwichen ekkewe Engon me Ruemon Aposel a awewei: “Ren ach kinisou non fansoun netipengaw esap wewen pwe sia pwapwa fiti nonnomuch. A fori wewen pwe seni mesen nuku sia neno pekinon sosotun ach fansoun iei.”
© 2026 ren Intellectual Reserve, Inc. Meinisin pung mi kawor. Mi katou non USA. Kapunguno non fosun Merika: 6/19. Kapungunon chiakun: 6/19. Chiakun Porous ren ewe Pochokunen Sarafo Iteiten Maram, February 2026. Chuukese. 19935 901