Mesej Blong Ol Yut Oli Kam Strong blong Evri Manis, Febwari 2026
?Yu Wantem blong Stap Glad Moa? Traem Soem Gladhat blong Yu
Taem laef blong yu i fulap wetem ol jenis, fasin blong talem tangkyu i save helpem yu blong lukluk nomo long ol gudfala samting mo blong gat hop.
Ol pikja droing oli kam long Maggie Stephenson
“Yu kam moa hapi taem yu gat wan hat we i fulap long tangkyu.”1
Olsem kwot blong Elda Gary B. Sabin blong olgeta Seventi i talem, fasin blong yu blong talem tangkyu i soem hamas yu hapi. Hem i mekem sens—taem yu gat fasin ia blong talem tangkyu, yu lukluk nomo long ol gudfala samting be i no long ol nogud samting.
Be yet, laef i no hapen oltaem olsem we yumi wantem. Bae i gat sam jenis we maet bae i mekem yu no hapi be bae tingting blong yu i fasfas, bae yu harem nogud, o kros. Be taem oli samting i kam had, fasin blong talem tangkyu i save helpem yu blong gat hop. Traem ol tri wei ia blong gat moa fasin blong talem tangkyu long laef blong yu.
1. Lukaotem Gud Saed blong ol Samting
Samtaem, i had tumas blong talem tangkyu taem yu filim se yu no gat wan samting. ?Be, wanem nao i sam long ol blesing we maet yu no stap luksave taem yu stap lukluk nomo long wanem we yu no gat moa bitim wanem we yu gat?
Taem yu stap lukaotem ol gud samting long laef blong yu, wetem taem bae i kam moa isi blong yu faenem.
2. Talem tangkyu i go long Man we i Givim [Papa long Heven]
Taem yu stap kaontem ol blesing blong yu, no fogetem weaples nao ol samting ia oli kam long hem.
Blong talem tangkyu long Papa long Heven from ol presen blong Hem—mo tu presen ia blong Pikinini blong Hem—i save mekem lav blong yu mo fet blong yu long Hem i kam strong moa. Presiden D. Todd Christofferson, Seken Kaonsela long Fas Presidensi, i eksplenem tu se, “Filing mo fasin blong talem tangkyu long God … i fulumap yumi wetem filing blong wosip wetem hapines,”2 i givim yu filing ia blong glad mo paoa mo helpem testemoni blong yumi i stap sef.
3. Lukluk nomo long Plan blong Papa long Heven
I tru se, blong stap talem tangkyu i no minim blong no lukluk long ol hadtaem long laef o blong stap hapi oltaem. Iven Jisas Kraes i filim mo akseptem harem nogud (luk long Alma 7:11; Doktrin mo Kavenan 19:18–19). Harem nogud i wan nomol pat blong laef long wol ia.
Be nomata long ol samting ia, wan samting i neva jenis: Plan ia blong sore blong Papa long Heven. Evri harem nogud we yu gotru long hem long laef bae i kam oraet tru long Jisas Kraes mo Atonmen blong Hem. (luk long Revelesen 21:4).
Elda Dieter F. Uchtdorf blong Kworom blong Olgeta Twelef Aposol i talem: “Blong talem tangkyu long ol taem blong soa i no minim se yumi harem gud long ol situesen blong yumi. Hem i minim se tru long ol ae blong fet, yumi lukluk i go bitim ol jalenj blong tedei.”3
© 2026 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen Blong Ol Yut Oli Kam Strong blong Evri Manis, Febwari 2026. Bislama. 19635 000