Tsamaea le ´Na

Na u kile ua koptjoa ho etsa ntho eo u neng u sa nahane hore u ka e etsa? Mohlomong u ne u sa ikutloe u le matla ho lekana kapa u se bohlale ho lekana, kapa u ts´oenyehile ka hore ba bang ba tla u ts´eha le ho u nyatsa. Haeba u kile ua ikutloa ka tsela ena, ha u mong.

Likete tsa lilemo tse fetileng monna o ne a le teng ea neng a bitsoa Henoke. Molimo o ile a kopa Henoke hore a bolelle batho pako—ba bang ba batho ba khopo ka ho fetisisa ba kileng ba bonoa lefats´eng.

Henoke o ne a sa nahane hore a ka etsa seo. O ile a bolella Molimo hore o sa le monyenyane haholo, ha ho motho ea mo ratang, ’me o “lieha ho bua” (bona Moshe 6:31).

Empa Molimo o ile etsa ts´episo ho Henoke. O ile a bolella monna ea ts´ohileng, “Tsamaea, u etse kamoo ke u laetseng ka teng,” ´me “lithaba li tla sutha pel´a hau, le linoka li tla sokoloha tsela ea tsona; ´me u lule ho ´na, le ´na ho uena; ka baka leo tsamaea le `na” (Moshe 6:32, 34).

“Tsamaea le ´Na” Ke memo e bonolo, e ntle hakakang.

Molimo o ile a ts´episa Henoke hore haeba a ka ba le sebete sa ho qala, joale Molimo o tla ba le eena mohatong o mong le o mong tseleng eo a e tsamaeang. Molimo o ne a tla etsa hore Henoke a be matla ´me a mo matlafatse hore a etse ho eketsehileng ´me a mo thuse ho feta kamoo a neng a ka nahana ka teng.

Le leng la mabitso a mangata a Mopholosi ke Emmanuele, kapa “Molimo o na le rona” (Mattheu 1:23). lebitsong la Morena le tlholehong ea hae ho tsamaea le rona. Khetho ke ea rona—na le rona re tla tsamaea le Eena?

Matsatsing ana, re sheba ho Henoke e le monna oa tumelo le moporofeta le moetapele e moholo. Empa pele ho moporofeta Henoke, ho ne ho e-na le Henoke e monyenyane ea neng a belaela empa a ntse a khetha ho tsamaea le Molimo.

Ha bophelo bo le thata, ha u ikutloa eka ha ua lekana, hopola ts´episo ea Morena ho Henoke, le ho uena. O tla tsamaea le uena. A ke ke a u tlohela u le mong, leha e le ka mohato o le mong feela.

Emmanuele. Molimo o na le rona Molimo o na le uena!

Joaloka lona bahlankana, Morena o ile a kopa Henoke ho phethahatsa boikarabelo ba bohlokoa ba boprista. Mosebetsi oa hae e ne e le ho bolela pako ho batho ba khopo. Henoke o ile a bonts´a lipelaelo tsa hae. “[Ke] moshemane feela,” a rialo. “Batho bohle ba ntlhoile … ke na le ho bua butle; ke baka leo, na ke mohlanka oa hau?” (Moshe 6:31).

Morena o ile a arabela ka matla le khothatso. “Tsamaea ´me u etse kamoo ke u laetseng kateng. … Bula molomo oa hau, ´me o tla tlala … . Moea oa ka o holim´a hau … ; lithaba li tla sutha pela hau … ; kahoo tsamaea le ’na” (Moshe 6:32, 34).

Henoke o ithutile hore ha Morena a re fa mosebetsi, ha re tobane le oona re le bang. Ha re etsa le ho boloka lilekane le Kreste, re tsamaea le eena le ho arolelana matla a hae—re fetoha lisebelisoa matsohong a Hae.

Joalo ka Henoke, u na le karolo ea bohlokoa: ho bosebeletsi, ho sebeletsa tempeleng, ho fana ka selallo, ho ithuta mangolo a halalelang, ho phela ka litekanyetso tsa evangeli, pako, ho itokisetsa boromuoa lichabeng, le tse ngata. Ho ka utloahala ho le boima haholo. U ka ikutloa u fokola. Ho LOKILE. Ha se taba ea ho e etsa u le mong. Ke ho khetha kajeno—letsatsi lena le letsatsi le leng le le leng—ho tsamaea le Molimo.

Ka thuso ea hae, u ka etsa lintho tsohle. O tla u matlafatsa, a u ts´oarele, ´me a u nolofalletse ho feta matla a hau a tlhaho. Oa u rata! Joaloka Moetapele ea Akaretsang oa Bahlankana, rea le rata ´me re labalabela ho tsamaea le lona ha re hlahloba mohoo o susumetsang oa 2026: “Tsamaea le ´Na.”