Wiyuc Fahsr

Kuh oasr pacl se siyuckyuck kom in oruh ma se ma kom nuhnkuh muh kom koflah in oruh? Sahp kom tiacna fokoko kuh etuh yohk kac, kuh kom elyah muh mwet sahyac e isruhn kom ac ahktonongye kom. Fin oasr pacl kom puhla ohinge, kom tiacna muhkwena.

Tausin yac tari ah, oasr mukul se pahngpahng Enoch. God El siyuck sel Enoch elan luti auliyak nuh sin mwet—kuhtuh mwet na kuluk ma oasr facluh.

Enoch el tiac puhla muh el kuh in oruh. El fahk nuh sel God muh el fuhsr laclac, wacngihn mwet luhngse el, ac el “tiac pihsrpihsr ke sramsram uh” (liye Moses 6:31).

Tuhsruhk God El sang nuh sel Enoch olwelah se. El fahk nuh sin mukul sahngweng se inge, “Fahsrot ac oruh oacna nga sapkihn nuh sum” ac “finohl uh e mukwi lac met liki kom, ac infacl uh e kuhruh lac liki kahsruh la; ac kom fah muhta in nga, ac nga in kom; ohinge wiyuc fahsr” (Moses 6:32, 34).

“Wiyuc fahsr.” Solsol fihsracsr, kahto se.

God El olwelah nuh sel Enoch lah el fin puhlaik in muhtacwacack, na God Elac fah weluhl ke fahsr lal nuhkwewa. God Elac oruh Enoch elan fokoko ac ahkkweyacl in oruh yohk ac kahsrel in ke ma puhs liki na el etuh uh.

Sie sin ine puhs lal Mwet Lahngo ah pa Emmanuel, kuh “God El oasr yorosr” (Matthew 1:23). Kuht us fahsr inen Leum ac ma raunikuhtlac. Sulwaclah uh ma lasr—kuh kuht e Weluhl pac, fahsr?

In pacl inge, kuht liyacl Enoch muh el mukul oasr luhlahlfongi se ac mwet pahluh ac mwet kol wowo se. Tuhsruhk met luhkel na mwet pahluh Enoch sacn, oasr pac Enoch fuhsr se suc suhlahlfongel sifacna tuhsruhk sulwaclah in fahsr wi God.

Ke moul uh upac, ke pacl kom puhla muh kom tiac oraclah, esam olwelah luhn Leum nuh sel Enoch, ac nuh sum. El ac wi kom fahsr. El ac tiac fihlikomlac in muhkwena, finne step se fana.

Emmanuel. God El oasr yorosr. God El oasr yurum!

Oacna kom tuhlihk mukul fuhsr, Leum El siyuck sel Enoch in ahkfohnyelah kunohkohn yohk srihpac ke pristut. Kunohkohn lal pa in luti auliyak nuh sin mwet koluk ah. Enoch el ahkahlwemye tahfuh luo lal. “[Nga] mwet fuhsr se,” el fahk. “Mwet nuhkwewa kaseyuc … Nga sihpihsrpihsr ke sramsram uh; fine ohingacn yac nga mwet kuhlwacnsap lom?” (Moses 6:31).

Leum El topuk ke kuh ac ahkkweye. “Fahsrot ac oruh oacna Nga sapkihn. … Ikacslah inwaclom, ac e fah nwacnwaclah … . Nguhn Luhk oasr in kom … ; finohl uh fah mukwi ye motom … ; ohinge wiyuc fahsr” (Moses 6:32, 34).

Enoch el lotelah lah fin Leum El use kunohkohn se lasr, kuht tiac kuh in muhkwena kac. Ke kuht oraclah ac karuhnguhnacl wuhlweacng nuh sin Kraist, kuht fahsr Weluhl ac akacsruhi ke kuh Lal—kuht eklac mwet in orekma ke Pahol.

Oacna Enoch, oasr kunohkohn yohk srihpac lom: muhtwacta luti, kuhlwacnsap lin tempuhl, ahkfahsrye kuhfa luhn Leum, lutlutkihn ma suhmuhslah, moulkihn akwuck ke wosasuc, auliyak, ahkolah nuh ke misin, ac puhs pac. Kuh in arulacna toasr ma inge. Kom e puhla muh kom suhfal nuh kac. Ac WONA. Tiac kalmac pa kom muhkena oruh. Kalmac pa kom sulwaclac mihsenge—lwen se inge ac lwen nuhkwewa—in fahsr wi God.

Ke kahsruh Lal, kom kuh in oruh ma nuhkwewa. Elac ahkkweye, nuhnak muhnahs, ac kahsre kom in som oruh ma kom tiac kuh in oruh. El luhngse kom! Ekihn Prestuhn luhn Mwet Fuhsr, kuht luhngse kom ac rahrahlac in wi kom puhlakihn ma wolacna ke sifac luhlahp ke 2026: “Wiyuc Fahsr.”