Taug Kev nrog Kuv Mus

Puas tau muaj ib lub sij hawm thaum nej yuav tsum ua ib yam uas nej xav tias nej ua tsis taus? Tej zaum nej xav tias nej muaj zog tsis txaus los ntse tsis txaus, los sis nej txhawj tias lwm tus yuav luag thuam nej. Yog tias nej tau xav li no los, tsis yog nej ib leeg xav li ntawd xwb.

Txhiab txhiab xyoo tas los, muaj ib tug txiv neej hu ua Enauj. Vajtswv hais kom Enauj qhia txog kev hloov siab lees txim rau cov neeg—ib co neeg phem tshaj uas ib txwm nyob hauv lub ntiaj teb no.

Enauj xav tias nws ua tsis taus. Nws hais rau Vajtswv tias nws hluas dhau, tsis muaj leej twg nyiam nws, thiab nws “hais lus taj” (saib Mauxes 6:31).

Tiam sis Vajtswv cog lus rau Enauj. Nws qhia tus txiv neej uas ntshai heev tias, “Cia li mus thiab ua li kuv tau txib koj” thiab “tej roob yuav khiav ntawm koj xub ntiag mus, thiab tej dej yuav lem ntawm txoj kev uas tej dej ntws; thiab koj yuav ua neej nrog kuv, thiab kuv nrog koj; yog li ntawd taug kev nrog kuv mus” (Mauxes 6:32, 34).

“Taug kev nrog kuv mus.” Yeej yog ib lo lus caw uas yooj yim thiab zoo nkauj.

Vajtswv cog lus rau Enauj tias yog nws ruaj siab txaus kom pib, ces Vajtswv yuav nrog nws mus txhua lub sij hawm. Vajtswv yuav ua rau Enauj muaj sia muaj zog txaus kom muaj peev xwm ntxiv thiab pab nws hloov los ua ib tug neeg zoo dua li nws ib txwm txawj xav.

Tus Cawm Seej ib lub npe hu ua Emaunu-es, los yog hais tias “Vajtswv nrog peb” (Mathais 1:23). Yeej yog tus Tswv lub npe thiab Nws muaj cwj pwm xav nrog peb mus kev. Peb yuav tsum xaiv—peb puas yuav nrog Nws mus kev, thiab?

Niaj hnub no, peb saib Enauj yog ib tug txiv neej uas muaj kev ntseeg thiab yog ib tug yaj saub thiab thawj coj zoo kawg. Tiam sis ua ntej Enauj uas yog tus yaj saub, muaj ib tug Enauj uas tsis ntseeg nws tus kheej tiam sis nws tseem xaiv taug kev nrog Vajtswv mus.

Thaum koj lub neej nyuaj heev, thaum koj xav tias koj tsis txaus, cia li nco ntsoov tus Tswv cov lus cog tseg rau Enauj, thiab rau nej. Nws yuav taug kev nrog nej mus. Nws yuav tsis tso nej tseg kom nej nyob nej ib leeg ib zaug li.

Emanu-es. Vajtswv nrog peb. Vajtswv nrog nej!

Ib yam li nej cov tub hluas, tus Tswv hais kom Enauj ua raws li tej hauj lwm pov thawj hwj uas tseem ceeb. Nws txoj hauj lwm yog kev hais kom ib co neeg phem hloov siab lees txim. Enauj hais lus qhia tias nws tsis ntseeg nws tus kheej. Nws hais tias, “Kuv tsuas yog ib tug tub hluas xwb. … tag nrho cov neeg ntxub kuv … kuv hais lus taj; ua cas kuv ho yog koj ib tug tub qhe?” (Mauxes 6:31).

Tus Tswv tej lus teb muaj hwj chim thiab nplij nws lub siab. “Cia li mus thiab ua li kuv tau txib koj. … Cia li qhib koj lub qhov ncauj, thiab yuav ua kom muaj puv npo … . Saib seb kuv tus Ntsuj Plig twb nrog koj … ; tej roob yuav khiav ntawm koj xub ntiag mus … ; yog li ntawd taug kev nrog kuv mus” (Mauxes 6:32, 34).

Enauj kawm tias thaum tus Tswv muab ib txoj hauj lwm rau peb, peb tsis nyob peb ib leeg xwb. Thaum peb nrog Yexus Khetos khi lus thiab ua raws li tej kev khi lus ntawd, peb taug kev nrog Nws mus thiab siv Nws lub hwj chim—peb hloov los ua cov cuab yeej hauv Nws txhais tes.

Ib yam li Enauj, nej muaj ib lub luag hauj lwm tseem ceeb: txhawb pab lwm tus, ua hauj lwm hauv lub tuam tsev, muab lub cim nco txog, kawm cov vaj lug kub, ua raws li tej kev cai ntawm txoj moo zoo, hloov siab lees txim, npaj ua tub txib, thiab ntxiv. Yeej ua rau yus txhawj heev. Tej zaum nej xav tias nej tsis txaus. Tsis ua li cas. Nej yuav tsis ua nej ib leeg xwb. Yeej yog ib yam uas yus xaiv hnub no—hnub no thiab txhua hnub—kom taug kev nrog Vajtswv mus.

Nrog Nws txoj kev pab, nej muaj peev xwm ua txhua yam. Nws yuav txhawb nej zog, zam txim rau nej, thiab muab hwj chim rau nej tshaj nej muaj taus nej tus kheej. Nws hlub nej! Peb cov nyob hauv Koom Haum Tub Hluas Pawg Tuam Thawj Tswj Hwm, peb hlub nej thiab zoo siab koom nrog nej kawm txog lub ntsiab lus zoo rau xyoo 2026: “Taug Kev nrog Kuv Mus.”