ຂ່າວສານປະຈຳເດືອນ For the Strength of Youth, ເດືອນທັນວາ 2025

ເຮົາຮູ້ຫຍັງແດ່ກ່ຽວກັບຄົນລ້ຽງແກະໃນຄຣິດສະມາດຄັ້ງທຳອິດ?

ເຮົາຮູ້ພຽງເລັກນ້ອຍກ່ຽວກັບຄົນລ້ຽງແກະໃນຄຣິດສະມາດຄັ້ງທຳອິດ.

ພວກເຂົາຢູ່ໃກ້ເມືອງເບັດເລເຮັມ. ຄົນລ້ຽງແກະໄດ້ອາໄສຢູ່ “ໃນຂົງເຂດ” ບ່ອນທີ່ພຣະຄຣິດໄດ້ກຳເນີດ (ລູກາ 2:8). ແລະ ພວກເຂົາສາມາດຍ່າງໄປເມືອງເບັດເລເຮັມ ໃນຂະນະທີ່ພຣະອົງຍັງຢູ່ທີ່ນັ້ນ (ເບິ່ງ ລູກາ 2:15–16).

ພວກເຂົາກຳລັງເຮັດໜ້າທີ່ຂອງຕົນຢູ່. ຄົນລ້ຽງແກະເຫລົ່ານີ້ໄດ້ “ຢູ່ຕາມທົ່ງ ນອນເຝົ້າຝູງແກະຂອງພວກເຂົາໃນເວລາກາງຄືນ” (ລູກາ 2:8). ພວກເຂົາເປັນຄົນລ້ຽງແກະທີ່ດີ ແລະ ຊື່ສັດ, ເຊັ່ນດຽວກັບພຣະຜູ້ຊ່ວຍໃຫ້ລອດ—ເປັນ ຜູ້ລ້ຽງແກະທີ່ດີ (ເບິ່ງ ໂຢຮັນ 10:11, 14).

ພວກເຂົາຮູ້ເຖິງຄຳທຳນາຍກ່ຽວກັບພຣະເມຊີອາ. ທີ່ຈິງແລ້ວ ພວກເຂົາຮູ້ວ່າທູດສະຫວັນເວົ້າກ່ຽວກັບຫຍັງ ເມື່ອເພິ່ນປະກາດການກຳເນີດວ່າ “ພຣະຄຣິດ [ພຣະຜູ້ເປັນເຈົ້າ]” (ລູກາ 2:11), ພຣະເມຊີອາ ທີ່ທຳນາຍໄວ້ໃນສະໄໝບູຮານ.

ພວກເຂົາມີຄວາມກະຕືລືລົ້ນຫລາຍ. ເມື່ອທູດສະຫວັນໄດ້ບອກພວກເຂົາກ່ຽວກັບ “ພຣະກຸມມານ … ພັນຜ້າອ້ອມນອນຢູ່ໃນຮາງຫຍ້າ” (ລູກາ 2:12), ພວກເຂົາໄດ້ “ຮີບໄປ” ເພື່ອພົບກັບພຣະອົງ (ລູກາ 2:16).

ພວກເຂົາໄດ້ແບ່ງປັນຂ່າວດີ. ພວກເຂົາ “ໄດ້ເລົ່າເລື່ອງ” ເຖິງສິ່ງທີ່ພວກເຂົາໄດ້ຍິນ ແລະ ໄດ້ເຫັນເຖິງຂ່າວສານຂອງທູດສະຫວັນກ່ຽວກັບການກຳເນີດຂອງພຣະຄຣິດ (ລູກາ 2:17).

ພວກເຂົາໄດ້ຂອບພຣະຄຸນ ແລະ ສັນລະເສີນພຣະເຈົ້າ. ຫລັງຈາກທັງໝົດນີ້, ພວກເຂົາ “ກໍກັບຄືນໄປ, ຮ້ອງເພງສັນລະເສີນພຣະເຈົ້າ ໃນທຸກສິ່ງທີ່ຕົນໄດ້ຍິນ ແລະ ໄດ້ເຫັນ” (ລູກາ 2:20).

© 2025 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, December 2025. Laotian. 19617 331