Vim li cas tus Tswv muaj ib lub Koom Txoos?

Lub hom phiaj ntawm Yexus Khetos lub Koom Txoos yog kom “cia tib neeg thiab tsev neeg pab ua Vajtswv txoj hauj lwm ntawm txoj kev cawm seej thiab kev tsa nto.” Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg pab “npaj [Vajtswv] cov me nyuam ncav tau theem yeeb koob siab tshaj plaws uas yog kev tsa nto los yog lub neej nyob mus ib txhis li.”

“Tus Cawm Seej … tau tso cai rau lub Koom Txoos ntawd los ua raws li Nws lub hom phiaj kom qhia Nws txoj moo zoo, ua Nws cov kab ke thiab tej kev khi lus, Nws lub hwj chim thiaj li yuav muab peb hloov ua neeg dawb huv thiab ua rau peb tsis muaj txim.”

Cov mej zeej hauv lub Koom Txoos muaj Yexus Khetos lub hwj chim thiab cov koob hmoov dhau los ntawm txoj cai pov thawj hwj thiab tej yawm sij pov thawj hwj, tej kev khi lus thiab cov kab ke, cov yaj saub tej lus qhia, cov vaj lug kub, thiab ib Haiv Neeg Ntseeg.

Tus Tswv kuj tau txib lub Koom Txoos kom: “Cia li sawv thiab ci mus, kom nej lub teeb yuav ua ib tug chij rau tej haiv neeg” (Lus Qhuab Qhia thiab Kev Khi Lus 115:5).

Cov mej zeej hauv lub Koom Txoos siv zog “ci mus” thaum lawv ua neej raws li txoj moo zoo, caw txhua tus txais txoj moo zoo, muab tsev neeg khi ua ke mus ib txhis li, thiab saib xyuas cov neeg pluag thiab cov neeg txom nyem. Nov yog Vajtswv txoj hauj lwm cawm seej thiab kev tsa nto.