Mulwol ni Ngan Thapeg ko Biney e Pul Ni Fan ko Gelngin e Pi’in ni Fal’yangren ko, September 2025
Yesus Kristus e Ir e ko Fapi Rran nib Mangil
Ngiyal’ nib fel’ rogon e yafos rodaed, urogon nrayag ni ngad ul’ul’gad ngan laek fare Tathapeg? Ba’aray boech rogon nrayag ni ngan rrin’ e biney.
Tafney nag ni fa’anra bay reb e tafagar rom nikemus ni ma yib nge guyem ko ngiyal’ nibe gafgow machane dabi yib ngom ko ngiyal’ nibe falfalaen’. Biney e tha’ gabe lemnag mab mangil? Dani mangil.
Gabe lemnag ma gadaed ma rrin’ e biney ngak fare Tathapeg—nikemus ni gadaed ma yib ngak ko ngiyal’ nike yib e gafgow ngodad machane gathi ngiyal’ nib fel’ rogon e yafos rodad?
Baga’ ni gadaed ma weliy rogon nima ayuwegdaed Yesus Kristus ko ngiyal’ nike tu’uf e ayuw rodad, sana bachan e biney ya gubin e gidii’, nra taw bangiyal’ riy, mara yib ban’en ngak nib momaw’ rogon.
Machane bay boch e rran ngay—fa boch e wik fa boch e duw, ni fa’anra fel’ wa’than dad—ma wod ni rib fel’ rogon e yafos rodad. Bochingiyal’ ma gadad ma pagtilin fare Tathapeg ko ngiyal’ ney. Fapi gidii’ ulan fare Babyor ku Mormon e buch rok’ e biney. Taw bangiyal’ riy nri mon’og gad ko fapi tawa’ath ni pi’ Got ngorad machane yibi buch nramul gad ni bachan e uf nge bachan e kar pagtilined Got.
Fapi rran nib mangil e dar yipfan ni ngad pagtilined Yesus Kristus. Ngiyal’ ne fla’ab ko yafos ni yibe mon’og riy e irreram e ngiyal’ nib mangil ni nge falfalaen’uy ngak fare Tathapeg, ma gathi ngan pagtilin Mornga’agen.
Ere urogon nrayag ni ngad pired ni gadaed bchuchugur ngak Yesus Kristus nge Chitamangdaed nu Tharmiy ko ngiyal’ ni daryib e lumel ngodaed ni ngad sapgad Ngorow?
Msobut’aen’ Nigem
Ngiyal’ nib fel’ rogon e yafos rodaed, mangil ni nge falfalaen’um ko tawa’ath rom nge tin nikam thapeg ulan e yafos rom. Machane dam pagtilin e en nike ayuwegnem kam taw ko ginney. Pilung i Benjamin ni yog ni ba’aray rogon ko welthin rok’ ulan fare Babyor ku Mormon:
“Ya musap gaed, gathi gadaed gubin ma gafgow? Gathi gadaed gubin ma gadaed be tagaʼ ngakʼ taʼabeeʼ, ni ir Got, ko gubin e pinʼen ni bay rodaed, ko ggan nge mad, nge gol nge silber, nge gubin mite falaʼab ni bay rodaed ko urngin mit?” (Mosiah 4:19).
Sobut’aen’ nigem ko mornga’agen e fla’ab rom ni gabe tay u wun’um e n’en nike rrin’ e Chitamangdaed nu Tharmiy nge Yesus Kristus nifan ngom e ir kanawo’en nib mangil ya aram ni gabe uneg row ko ngiyal’ nib fel’ gubin ban’en ulan e yafos rom.
Ognag e Magar
Ognag e magar e ir e falay ne uf nge pagtilin ban’en. Ognag e magar ngak Got era ayuwegnem nga’i par Fak u wun’um nge Ir ko gubin e pin’en nikar rrin’ew nifan ngom nge yafos rom. Biney e rikab ta’ab rogon ko ngiyal’ nib fel’ rogon e yafos rom nge ngiyal’ ni gabe gafgow.
Naqab An’um
Reb kanawo’en nima wawliyey Mo’oniyan’ e wod nra “baen nag e yaʼel [rom] me wawliyraed ko falwok nu fayleng” (2 Nephi 28:21). Biney e be yipfan, ni riba’adag ni ngam adag me fal’ e tafney rom ko tin nibay rom ko ngiyal’ nib fel’ e yafos rom nge mada’ ko ngiyal’ nikam pagtilin e tin nth’abi ga’fan. Ere, damu pagtiltin Got! Fa’an gara par ni gab naqab an’um ko wawliy rok’ mo’oniyan’ mag gay rogon ni dam un ngay ko ngiyal’ nib fel’ rogon e yafos rom, ma rayag ni gara par ni gab chugur ngak e Chitamangdaed nu Tharmiy nge Yesus Kristus.
Fare Saaf nib Mangil, Michael Malm
Mpar nibay Kristus u Lukungun e Yafos Rom
President Russell M. Nelson e machib nag: “Nap’an ni gadaed ra sap ko tonon rok’ Got ko fare thapeg … nge Yesus Kristus nge fare gospel Rok’, rayag ni ngaed thamiyed e falfalaen’ ni demuturug ko mang e be buchbuch—fa tin ndar buch—ulan e yafos rodaed. Falfalaen’ e ma yib ni bachan Ir. I’ir e tabolngin ko urngin e falflaen’.”
Urngin yay ni gama lemnag mornga’agen e biney nib riyul’ ko ngiyal’ nib fel’ rogon e yafos rom? Biney e gathi kemus niba mulwol nifan e ngiyal’ nibe yib e gafgow ngom. Gubin ngiyal’ mab riyul’, nib mu’un e tin ba’aray e rran ngay ni rib mangil. Ere mu rin’ urngin ni rayog rom ni ngam ul’ul’ ngam sap ngak Kristus, ndemuturug ko ngiyal’ nib fel’ fa ngiyal’ ni gabe gafgow.
© 2025 ko Intellectual Reserve, Inc. Gubin nibay mat’won. Kan yoloey u USA. Kan micheg nag ko thin nu Ngalis: 6/19. Micheg i pilyeg: 6/19. Pilyegthin ko Mulwol ni Fan ko Gelngin e Pi’in ni Fal’yangren, September 2025. Yapese. 19626 905