යහපත් දවස් සඳහාත් යේසුස් ක්‍රිස්තුස්වහන්සේ සිටියි

දේවල් හොඳින් සිදුවන විට, ඔබේ ආශිර්වාද සහ ජයග්‍රහණ සැමරීම හොඳයි. නමුත් ඔබ සිටින තැන ඔබට සිටීමට හැකි වූයේ කවුරු නිසාද කියා අමතක කරන්න එපා. බෙන්ජමින් රජතුමා මොර්මන්ගේ පොතේ ඔහුගේ දේශනාවේදී මෙසේ සඳහන් කළා:

“මක්නිසාද බලව, අපි සියලු දෙනා හිඟන්නන් නොවේ ද? අප සතු සියලු වස්තුව සඳහා ද, ආහාර සහ වස්ත්‍ර සඳහා ද, රත්‍රන් සඳහා ද, රිදී සඳහා ද, අප සතු සියලු ආකාරයේ ධනය සඳහා අප සියලු දෙනා එකම ප්‍රාණය, එනම් දෙවියන්වහන්සේ, මත යැපෙන්නේ නැති ද?” (මොසායා 4:19).

ස්වර්ගික පියාණන්වහන්සේ සහ යේසුස් ක්‍රිස්තුස්වහන්සේ ඔබ වෙනුවෙන් කර ඇති දේ මතක තබා ගනිමින් ඔබේ සාර්ථකත්වය ගැන නිහතමානී වීම, උන්වහන්සේලාව ඔබේ යහපත් කාලයට ඇතුළත් කර ගැනීමට හොඳ ක්‍රමයක්.

උඩඟුකමට සහ අමතකවීමට හොඳම ප්‍රතිවිරෝධකයක් වන්නේ කෘතඥතාවයි. දෙවියන්වහන්සේට ස්තූති කිරීම ඔබට උන්වහන්සේව සහ උන්වහන්සේ සහ උන්වහන්සේගේ පුත්‍රයාණන් ඔබේ ජීවිතයේ කරන සියලු යහපත් දේ සිහිපත් කිරීමට උපකාරී වෙනවා. මෙය හොඳ කාලවලදී මෙන්ම දුෂ්කර කාලවලදීද ඵලදායී දෙයක්.

සාතන්ගේ ප්‍රියතම ප්‍රහාරයක් තමයි “[ඔබව] සංසිඳුවමින්, තවද [ඔබව] මාංශික සුරක්ෂිතභාවයට සැනසවීම” (2 නීෆායි 28:21). වෙනත් වචන වලින් කියනවා නම්, ඔබේ හොඳ කාලවලදී ඔබට වඩාත්ම වැදගත් දේ අමතක වන තරමට තෘප්තිමත් සහ ආරක්ෂිත බවක් දැනෙනවා නම්, ඔහු එයට කැමතියි. එමනිසා, දෙවියන්වහන්සේව අමතක කරන්න එපා! ඔබ සතුරාගේ සියුම් උපක්‍රම ගැන දැනුවත්ව සිටින විට සහ ඔබේ යහපත් කාලවලදී පවා ඒවාට විරුද්ධ වන විට, ඔබට ස්වර්ගික පියාණන්වහන්සේට සහ යේසුස් ක්‍රිස්තුස්වහන්සේට සමීපව සිටින්න පුළුවන්.

සභාපති රසල් එම් නෙල්සන් මෙසේ ඉගැන්වූවා: “අපගේ ජීවිතයේ අවධානය යොමු වී ඇත්තේ දෙවියන්වහන්සේගේ ගැලවීමේ සැලැස්ම … හා යේසුස් ක්‍රිස්තුස්වහන්සේ සහ උන්වහන්සේගේ ශුභාරංචියට වන විට, අපගේ ජීවිතයේ සිදුවෙමින් පවතින දේ—හෝ සිදු නොවෙන දේ—කුමක් වුවත් අපට ප්‍රීතිය අත්විඳින්න පුළුවන්. ප්‍රීතිය පැමිණෙන්නේ උන්වහන්සේගෙන් සහ උන්වහන්සේ නිසායි. සියලු ප්‍රීතියේ උල්පත උන්වහන්සේයි.”

ජීවිතය හොඳින් ගෙවීගෙන යන විට, ප්‍රීතිය පිළිබඳ මෙම සත්‍යය ගැන ඔබ කොපමණ වාරයක් සිතා තිබෙනවා ද? මෙය දුෂ්කර අවස්ථා සඳහා පමණක් සැනසිලිදායක උපදෙසක් නොවේ. ඔබේ හොඳම දින සඳහා ඇතුළුව, එය සැමවිටම සත්‍යයක්. ඒ නිසා හොඳ හෝ නරක කුමක් වුවත්, ක්‍රිස්තුස්වහන්සේ කෙරෙහි අවධානය යොමු කිරීමට ඔබට කළ හැකි සියල්ල කරන්න.