मासिक युवाहरूको शक्तिका लागि सन्देश, सेप्टेम्बर २०२५
येशू ख्रीष्ट असल दिनहरूका लागि पनि हुनुहुन्छ
जब सबै चीजहरू सही भइरहेको हुँदा पनि हामी कसरी मुक्तिदातामा केन्द्रित रहन सक्छौँ ? यहाँ केही तरिकाहरू छन् ।
कुनै साथीले उहाँको कठिन समयमा मात्रै तपाईंसँग समय बिताएको र खुसी हुँदा तपाईंलाई बेवास्ता गरेको कल्पना गर्नुहोस् । स्वस्थ सम्बन्ध हो ? वास्तवमा होइन ।
के हामी हाम्रा मुक्तिदातासँग कहिल्यै त्यसो गर्छौँ—कठिन समयमा उहाँलाई खोज्छौँ र सहज समयमा उहाँलाई बिर्सन्छौँ ?
सम्भवत: सबैजनाले कुनै न कुनै समयमा कठिन चीजहरूको सामना गर्ने हुनाले हामी येशू ख्रीष्टले हाम्रो कठिन समयमा हामीलाई कसरी सहयोग गर्नुहुन्छ भन्ने सम्बन्धमा धेरै कुरा गर्छौँ ।
परन्तु त्यहाँ त्यस्ता केही दिनहरू—हप्ताहरू वा वर्षहरू पनि छन् यदि हामी भाग्यशाली छौँ भने—जहाँ सबै चीजहरू वास्तवमा नै सही रूपमा भइरहेका हुन्छन् । कहिलेकाहीँ हामी ती समयमा मुक्तिदातालाई बिर्सन्छौँ । मोर्मोनको पुस्तकका मानिसहरूले त्यसो गरे । केही समयका लागि तिनीहरू परमेश्वरका आशीर्वादहरूबाट समृद्ध बने तर अन्ततः जब तिनीहरूले उहाँलाई बिर्से उनीहरू घमण्डको शिकार बने ।
राम्रो समयको अर्थ अब अचानक हामीलाई येशू ख्रीष्टको आवश्यकता पर्दैन भन्ने होइन । समृद्धिका समयहरू मुक्तिदातासँग आनन्दित हुने उत्तम समय हुन्, उहाँलाई बिर्सने होइन ।
त्यसोभए जब चुनौतीहरूले हामीलाई उहाँहरूतर्फ फर्कन सम्झाउँदैनन् तब हामी येशू ख्रीष्ट र स्वर्गमा हुनुहुने हाम्रा पितासँग कसरी सम्पर्कमा रहिरहन सक्छौँ ?
विनम्र हुनुहोस्
जब सबै चीजहरू सही भइरहेको हुँदा आफ्ना आशीर्वाद र उपलब्धिहरूको उत्सव मनाउनु उपयुक्त हुन्छ । परन्तु तपाईं जहाँ हुनुहुन्छ त्यहाँ पुग्न कसले सम्भव बनाउनुभयो भन्ने विषय नबिर्सनुहोस् । राजा बेन्यामिनले मोर्मोनको पुस्तकको आफ्नो प्रवचनमा यसलाई यसरी राखेका छन्:
“किनकि हेर, के हामी सबै मगन्ते होइनौँ र ? हामीसँग भएको सबै सम्पत्तिका लागि, खाना र वस्त्र दुबैका लागि र सुनका लागि र चाँदीका लागि अनि हामीसँग भएका हरेक किसिमका सबै धनहरूका लागि उही व्यक्तिमा, परमेश्वरमा समेत, के हामी सबै भर पर्दैनौँ ? (मोसीयाह ४:१९) ।
स्वर्गका पिता र येशू ख्रीष्टले तपाईंका लागि गर्नुभएको काम सम्झेर आफ्नो सफलताका सम्बन्धमा विनम्र हुनु भनेको तिनीहरूलाई तपाईंका सही समयहरूमा समावेश गर्ने एक उत्तम तरिका हो ।
कृतज्ञ रहनुहोस्
घमण्ड र विस्मृतिका लागि कृतज्ञता उत्तम औषधिहरू मध्ये एक हो । परमेश्वरलाई धन्यवाद दिनाले तपाईंलाई उहाँ अनि उहाँ र उहाँका पुत्रले तपाईंको जीवनमा गर्नुभएका सबै असल कार्यहरू सम्झन सहयोग गर्ने छ । कठिन समयमा जत्तिकै यो राम्रो समयमा पनि प्रभावकारी हुन्छ ।
सचेत रहनुहोस्
शैतानका मनपर्ने आक्रमणहरू मध्ये एक “शान्त पार्नु र [तपाईंलाई] शारीरिक सुरक्षामा झुलाउनु हो” (२ नफी २८:२१) । अर्को शब्दमा, तपाईंको राम्रो समयमा यदि तपाईंले अति नै सन्तुष्ट र सुरक्षित महसुस गर्नुभयो र तपाईंले सबैभन्दा महत्त्वपूर्ण चीज बिर्सनुभयो भने यो उसलाई मन पर्ने छ । त्यसैले, परमेश्वरलाई नबिर्सनुहोस्! जब तपाईं शत्रुका सूक्ष्म चालहरूका सम्बन्धमा सचेत रही आफ्नो राम्रो समयमा पनि तिनीहरूको प्रतिरोध गर्नुहुन्छ, तपाईं स्वर्गका पिता र येशू ख्रीष्टको नजिक रहन सक्नुहुन्छ ।
असल गोठालो, माइकल मल्मद्वारा
ख्रीष्टमा केन्द्रित रहनुहोस्
अध्यक्ष रसल एम. नेल्सनले सिकाउनुभयो: “जब हाम्रो जीवनको केन्द्रबिन्दु परमेश्वरको मुक्तिको योजना … अनि येशू ख्रीष्ट र उहाँको सुसमाचारमा हुन्छ, हाम्रो जीवनमा—के भइरहेको छ—वा भइरहेको छैन भन्ने विषयलाई बेवास्ता गरी हामी प्रसन्नता महसुस गर्न सक्छौँ ।” प्रसन्नता उहाँबाट र उहाँको कारण आउँछ । उहाँ नै सबै प्रसन्नताको स्रोत हुनुहुन्छ ।”
जीवन राम्रोसँग चलिरहेको समयमा प्रसन्नता सम्बन्धि यो सत्य तपाईं कति पटक सम्झनुहुन्छ ? यो केवल कठिन परिस्थितिमा दिइने सान्त्वनादायी सल्लाह मात्रै होइन । तपाईंका उत्कृष्ट दिनहरूमा पनि यो सदैव सत्य छ । त्यसैले खराब वा असल दुबैमा ख्रीष्टमा ध्यान केन्द्रित गर्न सम्भव भएसम्म प्रयास गर्नुहोस् ।
© २०२५ Intellectual Reserve, Inc. द्वारा सर्वाधिकार सुरक्षित । संयुक्त राज्य अमेरिकामा मुद्रित । अङ्ग्रेजी अनुमोदन: ६/१९ । अनुवाद अनुमोदन: ६/१९ । Monthly For the Strength of Youth Message, September 2025 को अनुवाद Nepali. 19626 372