ຂ່າວສານປະຈຳເດືອນ For the Strength of Youth, ເດືອນກັນຍາ 2025
ພຣະເຢຊູຄຣິດ ແມ່ນສຳລັບ ວັນທີ່ດີ ເຊັ່ນກັນ
ເມື່ອທຸກສິ່ງເປັນໄປດ້ວຍດີ, ເຮົາຈະສຸມໃຈໃສ່ທີ່ພຣະຜູ້ຊ່ວຍໃຫ້ລອດແນວໃດ? ຕໍ່ໄປນີ້ແມ່ນແນວຄິດບາງຢ່າງ.
ໃຫ້ລອງຄິດເບິ່ງວ່າ ຖ້າເພື່ອນຄົນໃດຄົນໜຶ່ງພຽງແຕ່ໃຊ້ເວລາກັບເຈົ້າ ຕອນທີ່ເຂົາມີບັນຫາເທົ່ານັ້ນ ແລະ ຫລີກລ້ຽງເຈົ້າເມື່ອເຂົາມີຄວາມສຸກຈະເປັນແນວໃດ. ນີ້ເປັນຄວາມສຳພັນທີ່ດີບໍ? ບໍ່ເລີຍ.
ເຮົາເຄີຍເຮັດແບບນັ້ນກັບພຣະຜູ້ຊ່ວຍໃຫ້ລອດຂອງເຮົາບໍ—ສະແຫວງຫາພຣະອົງໃນຊ່ວງເວລາທີ່ຍາກລຳບາກ ແລະ ລືມພຣະອົງໃນເວລາທີ່ດີບໍ?
ເຮົາເວົ້າຫລາຍຢ່າງກ່ຽວກັບວິທີທີ່ພຣະເຢຊູຄຣິດຊ່ວຍເຮົາຜ່ານຜ່າຄວາມຫຍຸ້ງຍາກຂອງເຮົາ, ອາດຈະເປັນເພາະທຸກຄົນ, ໃນເວລາໃດເວລາໜຶ່ງ, ປະເຊີນກັບສິ່ງທີ່ຍາກລຳບາກ.
ແຕ່ມີບາງມື້—ອາທິດ ຫລື ແມ່ນແຕ່ປີ, ຖ້າເຮົາໂຊກດີ—ທີ່ທຸກສິ່ງເປັນໄປດ້ວຍດີ. ບາງຄັ້ງເຮົາລືມພຣະຜູ້ຊ່ວຍໃຫ້ລອດໃນເວລາເຫລົ່ານັ້ນ. ຜູ້ຄົນໃນພຣະຄຳພີມໍມອນໄດ້ເຮັດ. ພວກເຂົາໄດ້ຈະເລີນຮຸ່ງເຮືອງຈາກພອນຂອງພຣະເຈົ້າຊົ່ວໄລຍະໜຶ່ງ ແຕ່ໃນທີ່ສຸດກໍຕົກເປັນເຫຍື່ອຂອງຄວາມທະນົງຕົວ ເມື່ອພວກເຂົາລືມພຣະອົງ.
ເວລາທີ່ດີບໍ່ໄດ້ໝາຍຄວາມວ່າ ເຮົາບໍ່ຕ້ອງການພຣະເຢຊູຄຣິດອີກຕໍ່ໄປ. ເວລາແຫ່ງຄວາມຈະເລີນຮຸ່ງເຮືອງເປັນຊ່ວງເວລາທີ່ດີທີ່ສຸດ ທີ່ຈະປິຕິຍິນດີກັບພຣະຜູ້ຊ່ວຍໃຫ້ລອດ, ບໍ່ແມ່ນລືມພຣະອົງ.
ສະນັ້ນ ເຮົາຈະຕິດພັນກັບພຣະເຢຊູຄຣິດ ແລະ ພຣະບິດາຜູ້ສະຖິດຢູ່ໃນສະຫວັນຂອງເຮົາໄດ້ແນວໃດ ເມື່ອການທົດລອງບໍ່ໄດ້ເຕືອນເຮົາໃຫ້ຫັນໄປຫາພວກພຣະອົງ?
ຖ່ອມຕົວສະເໝີ
ເມື່ອທຸກສິ່ງເປັນໄປດ້ວຍດີ, ມັນເປັນການດີທີ່ຈະສະເຫລີມສະຫລອງພອນ ແລະ ຄວາມສຳເລັດຂອງເຈົ້າ. ແຕ່ຢ່າລືມວ່າໃຜຊ່ວຍໃຫ້ເຈົ້າໄດ້ມາຢູ່ໃນຈຸດນີ້. ກະສັດເບັນຢາມິນໄດ້ກ່າວໄວ້ໃນທາງນີ້ໃນຄຳເທດສະໜາຂອງເພິ່ນໃນພຣະຄຳພີມໍມອນ:
“ເພາະຈົ່ງເບິ່ງ, ພວກເຮົາບໍ່ໄດ້ເປັນຄົນຂໍທານທັງໝົດບໍ? ພວກເຮົາບໍ່ໄດ້ອາໄສພຣະເຈົ້າອົງດຽວກັນ, ເພື່ອເຂົ້າຂອງທັງໝົດ ຊຶ່ງພວກເຮົາມີຢູ່ເພື່ອອາຫານ ແລະ ເຄື່ອງນຸ່ງຫົ່ມ, ແລະ ເພື່ອຄຳ, ແລະ ເງິນ, ແລະ ເພື່ອຂອງມີຄ່າທັງໝົດທີ່ພວກເຮົາມີຢູ່ທຸກຊະນິດບໍ?” (ໂມໄຊຢາ 4:19).
ການຖ່ອມຕົວຕໍ່ຄວາມສຳເລັດຂອງເຈົ້າ ໂດຍການຈື່ຈຳສິ່ງທີ່ພຣະບິດາເທິງສະຫວັນ ແລະ ພຣະເຢຊູຄຣິດໄດ້ເຮັດເພື່ອເຈົ້າ ເປັນວິທີທີ່ດີທີ່ຈະລວມພວກພຣະອົງໄວ້ໃນເວລາທີ່ດີຂອງເຈົ້າ.
ກະຕັນຍູສະເໝີ
ຄວາມກະຕັນຍູເປັນຢາແກ້ພິດທີ່ດີທີ່ສຸດໃຫ້ກັບຄວາມທະນົງຕົວ ແລະ ການຫລົງລືມ. ການຂອບຄຸນພຣະເຈົ້າຈະຊ່ວຍໃຫ້ເຈົ້າຈື່ຈຳພຣະອົງ ແລະ ທຸກສິ່ງທີ່ພຣະອົງ ແລະ ພຣະບຸດຂອງພຣະອົງເຮັດໃນຊີວິດຂອງເຈົ້າ. ວິທີນີ້ໄດ້ຜົນທັງໃນຊ່ວງເວລາທີ່ດີ ແລະ ຊ່ວງເວລາທີ່ຍາກລຳບາກ.
ລະວັງຕົວສະເໝີ
ການໂຈມຕີທີ່ຊາຕານມັກຊອບຢ່າງໜຶ່ງຄື ເຮັດໃຫ້ “ສະຫງົບ, ແລະ ກ່ອມ [ເຈົ້າ] ໄປໃນຄວາມໝັ້ນຄົງທີ່ເຕັມໄປດ້ວຍກາມມະລົມ” (2 ນີໄຟ 28:21). ໃນອີກຄຳໜຶ່ງ, ມັນມັກຫລາຍຖ້າຫາກເຈົ້າຮູ້ສຶກພໍໃຈ ແລະ ປອດໄພໃນເວລາທີ່ດີຂອງເຈົ້າ ຈົນລືມສິ່ງທີ່ສຳຄັນທີ່ສຸດ. ສະນັ້ນ, ຢ່າລືມພຣະເຈົ້າ! ເມື່ອເຈົ້າຄອຍເຝົ້າລະວັງກົນອຸບາຍທີ່ອ່ອນໂຍນຂອງຜູ້ປໍລະປັກ ແລະ ຕ້ານທານມັນແມ່ນແຕ່ໃນຊ່ວງເວລາທີ່ດີຂອງເຈົ້າ, ແລ້ວເຈົ້າຈະສາມາດຢູ່ໃກ້ພຣະບິດາເທິງສະຫວັນ ແລະ ພຣະເຢຊູຄຣິດສະເໝີ.
The Good Shepherd [ພຣະຜູ້ລ້ຽງທີ່ດີ], ໂດຍ ໄມໂກ ມອມ
ມີສູນກາງທີ່ພຣະຄຣິດສະເໝີ
ປະທານຣະໂຊ ເອັມ ແນວສັນ ໄດ້ສິດສອນວ່າ: “ເມື່ອເຮົາເຮັດໃຫ້ຊີວິດຂອງເຮົາສຸມໃສ່ແຜນແຫ່ງຄວາມລອດຂອງພຣະເຈົ້າ, … ແລະ ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ, ເຮົາສາມາດຮູ້ສຶກເຖິງຄວາມສຸກໄດ້ ບໍ່ວ່າແມ່ນຫຍັງຈະເກີດຂຶ້ນ—ຫລື ບໍ່ເກີດຂຶ້ນກໍຕາມ—ໃນຊີວິດຂອງເຮົາ. ຄວາມສຸກມາຈາກພຣະອົງ ແລະ ເພາະພຣະອົງ. ພຣະອົງເປັນແຫລ່ງຂອງຄວາມສຸກທັງໝົດ.”
ເຈົ້າຄິດເຖິງຄວາມຈິງນີ້ເລື້ອຍສ່ຳໃດກ່ຽວກັບຄວາມສຸກເມື່ອຊີວິດເປັນໄປດ້ວຍດີ? ນີ້ບໍ່ແມ່ນພຽງແຕ່ຄຳແນະນຳທີ່ປອບໂຍນສຳລັບເວລາທີ່ຫຍຸ້ງຍາກເທົ່ານັ້ນ. ມັນເປັນຄວາມຈິງສະເໝີ, ລວມທັງໃນມື້ທີ່ດີທີ່ສຸດຂອງເຈົ້າ. ສະນັ້ນ ຈົ່ງເຮັດທຸກສິ່ງທີ່ເຈົ້າສາມາດເຮັດໄດ້ເພື່ອສຸມໃຈໃສ່ພຣະຄຣິດ, ບໍ່ວ່າຈະຮ້າຍ ຫລື ດີກໍຕາມ.
© 2025 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, September 2025. Laotian. 19626 331