Mwe Fahkwack ke Mahlwem Nuhkwewa ke Mwe Ahkkweye Mwet Fuhsr, Septempuh 2025
Jisus Kraist El ma nuh ke Lwen Wowo Pac
Ke ma uh fahlac wona uh, kuht e lohacng fuhkah nuh sin Mwet Lahngo lasr? Pa inge kuhtuh mwe nuhnak.
Srihke nuhnkuh ke sie kawuhk ma wi kom ke pacl elos puhlakihn elyah ac kahingkihn kom ke pacl elos engan. Inmahsrlomtacl wo? Tiac arulacna.
Yac kuht na oruh kain se nuh sin Mwet Lahngo lasr—sokuhl ke pacl upac lasr ac muhlkuhnuhllah ke pacl wowo lasr?
Kuht sramsramkihn yohk ke pacl Jisus Kraist El kahsre kuht ke pacl upac lasr, sahp mweyen mwet nuhkwewa, ke pacl se kuh pacl luo, sun ma upac.
Tuhsruhk oasr lwen—wik kuh finne yac, fin wo ohiyacsr—ma uh e wona. Kuhtuh pacl uh kuht muhlkuhnlah Mwet Lahngo ke pacl ingacn. Mwet ke Puk luhn Mormon elos oruh. Elos moul wowo ke mwe insewowo sin God ke puhluhn pacl tuhsruhk kahkahsrihk na puhtatyang nuh ke insefuhlwact ke pacl elos muhlkuhnuhllah.
Pacl wowo uh tiac kalmac pa kuht tilac enenwacl Jisus Kraist. Pacl in insewowo pa pacl wowo lasr in enganwack sin Mwet ac tiac muhlkuhnuhllah.
Ohinge kuht e esam fuhkah Jisus Kraist ac Pahpah Inkuhsrao ke ma upac uh tiac ahkacsmakihnye kuht in for nuh Yohrohlos uh?
Puhsisacl Na
Ke ma uh fahlac wona uh, wo ke kom kaksak ke mwe insewowo lom ac oraclah wo lom an. Tuhsruhk tiac muhlkuhnlah lah suc usot nuhs um in kuh in oasr ke acn se kom oasr kac ingena. Tohkohsrah Benjamin el fahk ke luti lal ke Puk luhn Mormon:
“Tuh liye, yac tiac kuht nuhkwewa mwet nguhsr? Yac tiac kuht nuhkwewa luhlahlfongi ke Mwet Se pacna, finne God, ke ma nuhkwewa ma oasr yohrohsr, ke kwewana mongo ac nuknuk, ac ke kol, ac ke selfuh, ac ke mwe kahsruhp nuhkwewa ma oasr lasr ke kain nuhkwewa?” (Mosiah 4:19).
Ke kom puhsisacl na ke oraclah wo lom ke kom esam ma Pahpah Inkuhsrao ac Jisus Kraist ke ma elos oraclah wo nuh sum el innek na wowo se in esamuhlos ke pacl wowo lom.
Kulohkin Pacl Nuhkwewa
Kulohkihn pa sie ono wo emet nuh ke insefuhlwact ac wac muhlkihn. Sang kuloh nuh sin God e kahsrwe kom in esamuhl ac ma wo nuhkwewa El ac Wen nahtuhl oraclah ke moul lom. Ma se inge orekma ke pacl wowo oacna ke pacl upac uh.
Acsmak Na
Sie ma Setuhn el oruh uh pa in “ahkmisye, ac [pwenkomlac] nuh ke ohiyac wo luhn ikoac” (2 Nephi 28:21). El ac arulacna luhngse fin kom puhla insewowo ac puhla karihngihnyuhk ke pacl wowo lom ne kom muhlkuhnlah lah meac yohk sripac uh. Pwacnwacng, tiac muhlkuhnlah God! Ke kom acsmak na ke mwe sruhf lal Setuhn ac kahingkihn finne ke pacl wowo lom, kom kuh in fototo nuh yurin Pahpah Inkuhsrao ac Jisus Kraist.
Mwet Sheperd Wo, sel Michael Malm
Siiyac na Kraist
Prestuhn Russell M. Nelson el luti: “Ke kuht fihliyac moul lasr nuh ke plwacn in molwelah luhn God … ac Jisus Kraist ac wosasuc Lal, kuht kuh in puhla engan finne lah meac sikyak—kuh tiac sikyak—ke moul lasr. Engan tuhkuh Sel me ac ke Srihpacl. El pa oraclah engan nuhkwewa.”
Pacl ekahsr kom nuhnkuh ke ma pwacye ke engan ke pacl moul lom wona uh? Ma inge tiac kahs in kahsruh nuh ke pacl upac muhkwena. Pwacye pacl nuhkwewa, finne ke pacl wo emet lom. Pwacnwacng sang kuhiyom nohfohn in lohacng sin Kraist; finne tuhkuh ma koluk kuh wo nuh sum.
© 2025 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac ke lweng: 6/19. Lwenglah luhn Mwe Fahkwack ke Mahlwem Nuhkwewa ke Mwe Ahkkweye Mwet Fuhsr, Septempuh 2025. Kosraean. 19626 868